મહિલા ક્રિકેટના ચાહકો માટે ગુજરાતમાંથી મોટા સમાચાર સામે આવ્યા છે. આંતરરાષ્ટ્રીય ક્રિકેટ પરિષદે (ICC) પ્રથમ વુમન્સ ચેમ્પિયન્સ ટ્રોફી 2027નું યજમાનપદ ભારતને સોંપ્યું છે અને આ ઐતિહાસિક ટૂર્નામેન્ટની મેચોમાં વડોદરાને પણ સ્થાન મળ્યું છે. 14થી 28 ફેબ્રુઆરી 2027 દરમિયાન યોજાનારી આ સ્પર્ધા મુંબઈ અને વડોદરામાં રમાશે.
સત્તાવાર માહિતી મુજબ તમામ મેચો મુંબઈના ક્રિકેટ ક્લબ ઓફ ઈન્ડિયા (CCI) અને વડોદરા ઈન્ટરનેશનલ ક્રિકેટ સ્ટેડિયમ ખાતે રમાશે. અગાઉ આ ટૂર્નામેન્ટનું આયોજન શ્રીલંકામાં થવાનું હતું, પરંતુ ત્યાં ચાલી રહેલી ક્રિકેટ વહીવટ સંબંધિત સુધારાની પ્રક્રિયાને ધ્યાનમાં રાખીને યજમાની ભારતમાં ખસેડવામાં આવી છે. ભારતની પસંદગી ત્રણ દાવેદાર દેશોના હોસ્ટ-ઇવેલ્યુએશન બાદ કરવામાં આવી હતી અને ICC બોર્ડે તેને મંજૂરી આપી હતી.
આ પ્રથમ આવૃત્તિમાં ભારત સહિત કુલ છ ટીમો ભાગ લેશે. ઓસ્ટ્રેલિયા, ઈંગ્લેન્ડ, ન્યૂઝીલેન્ડ, દક્ષિણ આફ્રિકા અને શ્રીલંકા અન્ય ટીમો છે. તમામ ટીમો રાઉન્ડ-રોબિન લીગ ફોર્મેટમાં એકબીજા સામે રમશે. લીગ તબક્કા બાદ પોઈન્ટ્સ ટેબલની ટોચની બે ટીમો 28 ફેબ્રુઆરીએ ફાઇનલમાં ટકરાશે.
વડોદરામાં આટલી મોટી ICC મહિલા ટૂર્નામેન્ટ યોજાવાથી શહેરના ક્રિકેટપ્રેમીઓમાં સ્વાભાવિક રીતે જ ઉત્સાહ વધશે અને ગુજરાતના ક્રિકેટ નકશા પર પણ વડોદરાની ઓળખ વધુ મજબૂત બનશે.
