ભારતીય બુલિયન માર્કેટમાં આજે મંગળવારે સોના અને ચાંદીના ભાવમાં ભારે કડાકો જોવા મળ્યો છે. વૈશ્વિક દબાણને કારણે કિંમતોમાં થયેલા આ અણધાર્યા ઘટાડાએ રોકાણકારો અને ગ્રાહકોને ચોંકાવી દીધા છે.
પશ્ચિમ એશિયામાં ચાલી રહેલા ભૌગોલિક તણાવની સીધી અસર ઝવેરાત બજાર પર જોવા મળી રહી છે. ઇન્ડિયા બુલિયન એન્ડ જ્વેલર્સ એસોસિએશન મુજબ આજે સોનાના ભાવમાં મોટો ઘટાડો નોંધાયો છે.
આજે 24 કેરેટ સોનું 1.40 લાખ રૂપિયા પ્રતિ 10 ગ્રામના સ્તરે બંધ થયું હતું. અગાઉના ટ્રેડિંગ સત્રની સરખામણીએ સોનાના ભાવમાં હજારો રૂપિયાનો ધરખમ ઘટાડો જોવા મળ્યો છે.
છેલ્લા 24 દિવસમાં ઈરાન સાથેના તણાવ વચ્ચે સોનું આશરે 20,000 રૂપિયા જેટલું સસ્તું થયું છે. જાન્યુઆરીમાં સોનું તેના સર્વોચ્ચ સ્તર 1.76 લાખ રૂપિયા સુધી પહોંચી ગયું હતું.
ચાંદીના ભાવમાં પણ આજે મોટો કડાકો બોલાયો છે અને તે 2.19 લાખ રૂપિયા પ્રતિ કિલો પર પહોંચી છે. ચાંદી તેના ઓલ-ટાઇમ હાઈ લેવલથી આશરે 1.67 લાખ રૂપિયા સસ્તી મળી રહી છે.
આંતરરાષ્ટ્રીય બજાર કોમેક્સ પર પણ સોના અને ચાંદીના ભાવમાં ભારે વેચવાલી જોવા મળી છે. એમસીએક્સ પર પણ કિંમતો ઘટતા ભારતીય બજારમાં તેની સીધી અસર વર્તાઈ રહી છે.
અમદાવાદમાં આજે સોનાનો ભાવ 1.39 લાખ અને દિલ્હીમાં 1.40 લાખ રૂપિયાની આસપાસ રહ્યો છે. જ્યારે અમદાવાદમાં ચાંદીનો ભાવ પ્રતિ કિલોગ્રામ 2.17 લાખ રૂપિયા નોંધાયો હતો.
બજારના નિષ્ણાતો માને છે કે લાંબાગાળાના રોકાણકારો માટે ખરીદી કરવાની આ એક ઉત્તમ તક હોઈ શકે છે. જોકે, વૈશ્વિક અસ્થિરતાને જોતા ગ્રાહકોએ સાવચેતીપૂર્વક રોકાણ કરવું હિતાવહ છે.
