અમેરિકાના ટેક્સાસમાં ભારે વરસાદને કારણે આવેલા પૂરે ભયંકર વિનાશ મચાવ્યો છે. અહીં પરિસ્થિતિ ભયાનક છે અને મૃત્યુઆંક 100 થી વધુ થઈ ગયો છે. અધિકારીઓએ જણાવ્યું હતું કે ઉનાળાની રજાઓ દરમિયાન આયોજિત સમર કેમ્પમાં ભાગ લેનારા ઘણા બાળકો પણ જીવ ગુમાવનારાઓમાં સામેલ હતા. તેમણે કહ્યું કે પૂરને કારણે ઓછામાં ઓછા 104 લોકો મૃત્યુ પામ્યા છે. પૂરને કારણે ઘણા લોકો હજુ પણ ગુમ છે.
ભારે વરસાદને કારણે શુક્રવારે વહેલી સવારે ટેક્સાસમાંથી પસાર થતી ગુઆડાલુપે નદીનું જળસ્તર માત્ર 45 મિનિટમાં 26 ફૂટ (લગભગ 8 મીટર) વધી ગયું હતું, જેના કારણે ટેક્સાસ હિલ કન્ટ્રી વિસ્તારમાં ભયંકર પુર આવ્યું છે.
પુરની સૌથી વધુ અસર રાજ્યની કેર કાઉન્ટીમાં થઇ છે. અધિકારીઓના જણાવ્યા અનુસાર, કેર કાઉન્ટીમાં, 28 બાળકો સહિત 84 લોકોના મૃતદેહ મળી આવ્યા છે. કાઉન્ટીમાં આવેલા ક્રિશ્ચિયન ઓલ-ગર્લ્સ સમર કેમ્પમાં આવેલી 27 છોકરીઓ અને સ્ટાફના મોતની પુષ્ટિ કરવામાં આવી છે, જયારે દસ છોકરીઓ અને એક કેમ્પ કાઉન્સેલર હજુ પણ ગુમ છે. આ ઉપરાંત કાઉન્ટીમાં ઘણા સમર કેમ્પ છે.
અધિકારીએ શું કહ્યું?
ટેક્સાસ હિલ કન્ટ્રીમાં આવેલા સમર કેમ્પ, કેમ્પ મિસ્ટિકના સંચાલકોએ જણાવ્યું હતું કે તેમના 27 કેમ્પર્સ પૂરમાં મૃત્યુ પામ્યા હતા. કેર કાઉન્ટીના અધિકારીઓએ જણાવ્યું હતું કે 11 કેમ્પર્સ ગુમ છે. કેમ્પ મિસ્ટિક અને અન્ય ઘણા સમર કેમ્પનું આયોજન કરતા કાઉન્ટીમાં બચાવ કાર્યકરોને 28 બાળકો સહિત 84 મૃતદેહો મળી આવ્યા હતા, એમ અધિકારીઓએ જણાવ્યું હતું.
અમેરિકામાં ભયંકર પૂર
- 2022 માં કેન્ટુકીમાં પૂરમાં 45 લોકોનાં મોત થયા હતા
- ઓગસ્ટ 2021 માં, ભારે વરસાદને કારણે ટેનેસીના નાના શહેરમાં વેવરલીમાં પૂર આવ્યું, જેના કારણે નદીઓ છલકાઈ ગઈ, જેમાં 20 લોકો માર્યા ગયા.
- ઓગસ્ટ 2017 માં ટેક્સાસમાં વાવાઝોડું હાર્વે ત્રાટક્યું હતું, જેના કારણે ઘણા વિસ્તારોમાં અચાનક પૂર આવ્યું હતું, જેમાં ઓછામાં ઓછા 68 લોકો માર્યા ગયા હતા.
- જૂન 2016 માં, પશ્ચિમ વર્જિનિયામાં વાવાઝોડું ત્રાટક્યું હતું. આ વાવાઝોડાને કારણે આવેલા પૂરમાં 23 લોકો મૃત્યુ પામ્યા હતા.
- ઓક્ટોબર 2012 માં, સુપરસ્ટોર્મ સેન્ડી ન્યૂ યોર્ક અને આસપાસના વિસ્તારોમાં ત્રાટક્યું હતું. આ વાવાઝોડાને કારણે આવેલા પૂરને કારણે 147 લોકો મૃત્યુ પામ્યા હતા.
- 2011 માં, ભારે વરસાદ અને પીગળેલા પાણીને કારણે મિસિસિપી નદીમાં પૂર આવ્યું હતું, જેના કારણે ઓક્લાહોમા, મિઝોરી, અરકાનસાસ, લ્યુઇસિયાના અને ટેનેસીમાં 24 લોકો માર્યા ગયા હતા.
- સપ્ટેમ્બર 2008 માં, ટેક્સાસના ગેલ્વેસ્ટનમાં વાવાઝોડા આઈકને કારણે આવેલા પૂરમાં 100 થી વધુ લોકો માર્યા ગયા હતા.
- 2005 માં આવેલ વાવાઝોડું કેટરિના યુએસ ઇતિહાસનું સૌથી ઘાતક વાવાઝોડું હતું, જેમાં લગભગ 1,400 લોકો માર્યા ગયા હતા.
- જૂન 2001 માં ઉષ્ણકટિબંધીય તોફાન એલિસનને કારણે હ્યુસ્ટનમાં ભારે પૂર આવ્યું હતું. જેમાં લગભગ 41 લોકો મૃત્યુ પામ્યા હતા.
