સુરતના વેસુ વિસ્તારમાં આવેલી હેપી એલિગન્સ બિલ્ડિંગમાં બાલમુકુન્દ પરિવારના ચાર સભ્યોએ ઝેરી દવા પીને સામૂહિક આપઘાતનો પ્રયાસ કર્યો હોવાની હૃદયદ્રાવક ઘટના સામે આવી છે. આ ઘટનામાં પતિ-પત્ની અને એક માસૂમ દીકરી સહિત ત્રણ લોકોના કરૂણ મોત નીપજ્યા છે, જ્યારે બીજી દીકરીનો સમયસર સારવાર મળતા બચાવ થયો છે.
પોલીસ તપાસ દરમિયાન ઘટનાસ્થળેથી એક સુસાઇડ નોટ મળી આવી છે. પ્રાથમિક વિગતો મુજબ, નોટમાં વૈભવ રૂંગટા નામના શખ્સ દ્વારા રૂપિયા બાબતે આપવામાં આવતા ત્રાસનો ઉલ્લેખ કરવામાં આવ્યો હોવાનું સામે આવ્યું છે. હાલ મામલે સુરત પોલીસ દ્વારા વધુ તપાસ હાથ ધરવામાં આવી રહી છે.
મૃતક ઘરે બેઠા શેરબજારનું કામ કરતો હતો
મૂળ બિહારના વતની અને છેલ્લા બે વર્ષથી ઘરે બેઠા શેરબજારનું કામ કરનાર બાલમુકુન્દે પોતાના પરિવારના સભ્યો સાથે ઝેરી દવા પીને આત્મઘાતી પગલું ભર્યું હોવાનું જાણવા મળ્યું છે.ત્રણ પાનાની સુસાઇડ નોટ મળીપોલીસ તપાસ દરમિયાન ત્રણ પાનાની સુસાઇડ નોટ મળી આવી છે, જેમાં પરિવાર દ્વારા આ અંતિમ નિર્ણય પાછળના ગંભીર કારણોનો ઉલ્લેખ કરવામાં આવ્યો છે.
ગાડી અને ક્રેડિટ કાર્ડ પડાવી લીધાનો આરોપ
સુસાઇડ નોટમાં આરોપ મૂકવામાં આવ્યો છે કે વૈભવ રૂંગટાએ મૃતકની ગાડી અને ક્રેડિટ કાર્ડ લઈ લીધા હતા તથા તે કાર્ડનો દુરુપયોગ કરીને ખરીદી પણ કરી હતી. આ માનસિક અને આર્થિક ત્રાસને કારણે પરિવારે આત્મઘાતી પગલું ભર્યું હોવાનું મનાય છે. હાલ વેસુ પોલીસ દ્વારા આરોપી સામે ગુનો નોંધાઈ વધુ તપાસ ચાલુ છે.
