લોકડાયરાના જાણીતા કલાકાર અને અનેકવાર વિવાદમાં રહેતા દેવાયત ખવડ ફરી એકવાર વિવાદમાં સપડાયા છે. તાલાલા ગીરના ચિત્રોડ ગામે તેમની ફોર્ચ્યુનર કાર અને એક કિયા ગાડી વચ્ચે અકસ્માત થયો હતો, જેના પગલે મારામારી થઈ હોવાના અહેવાલ છે.
પ્રાપ્ત માહિતી અનુસાર, દેવાયત ખવડ અને તેમના માણસો ફોર્ચ્યુનર કારમાં સવાર હતા. તેમની કાર અને ધ્રુવરાજસિંહ રામચંદ્ર ચૌહાણની કિયા કાર વચ્ચે ટક્કર થઈ હતી. આ અકસ્માતમાં કિયા કારને નુકસાન થયું હતું અને અમદાવાદના સનાથલ વિસ્તારના રહેવાસી ધ્રુવરાજસિંહ ચૌહાણને ઈજા પહોંચતા તેમને હોસ્પિટલમાં દાખલ કરવામાં આવ્યા છે.
પોલીસ સૂત્રોના જણાવ્યા અનુસાર, ધ્રુવરાજસિંહ ચૌહાણ તેમના મિત્રો સાથે ચિત્રોડ ગામની કૃષ્ણા હોટેલમાં રોકાયા હતા. તેમણે ગીરમાં હોવાનું સ્ટેટસ સોશિયલ મીડિયા પર મૂક્યું હતું, જેના કારણે દેવાયત ખવડ અને તેમના માણસોએ તેમની રેકી કરીને બબાલ કરી હોઈ શકે છે. અકસ્માત બાદ દેવાયત ખવડના માણસોએ ધ્રુવરાજસિંહને માર માર્યા હોવાના પણ સમાચાર છે.
