સુરત શહેરમાં પાટીદાર આગેવાન અલ્પેશ કથીરિયા વિરુદ્ધ પોલીસ ફરિયાદ નોંધાઈ છે. પતંગ ખરીદવા આવેલા ત્રણ ગ્રાહકોને માર મારવાના આરોપસર સરથાણા પોલીસ મથકમાં આ ફરિયાદ દાખલ કરવામાં આવી છે. ફરિયાદમાં અલ્પેશ કથીરિયા તેમના ભાઈ અને અન્ય એક વ્યક્તિ સહિત કુલ ત્રણ સામે કાર્યવાહીની માગ કરવામાં આવી છે.
પ્રાથમિક માહિતી અનુસાર આ ઘટના પાટીદાર પાઘડીવાળા પતંગ સ્ટોર્સ ખાતે બની હતી. ગ્રાહકો અને અલ્પેશ કથીરિયાના ભાઈ વચ્ચે પતંગના ભાવ મુદ્દે બોલાચાલી થઈ હતી. આ માથાકૂટ ઉગ્ર બનતા અલ્પેશ કથીરિયાએ ભાઈ સાથે મળીને ગ્રાહકોને માર માર્યો હોવાનો ગંભીર આક્ષેપ લગાવવામાં આવ્યો છે.
આ સમગ્ર મામલે પોલીસે ફરિયાદ નોંધીને વધુ તપાસ હાથ ધરી છે. પતંગની ખરીદી દરમિયાન થયેલી આ બબાલ અને પાટીદાર નેતા સામે નોંધાયેલી ફરિયાદને કારણે સ્થાનિક વિસ્તારમાં ચર્ચાનો વિષય બન્યો છે.