દેશભરમાં વિવિધ સરકારી ક્ષેત્રોના 25 કરોડથી વધુ કર્મચારીઓ રાષ્ટ્રવ્યાપી સામાન્ય હડતાળ પર જઈ રહ્યા છે. કર્મચારીઓએ ભારત બંધનું એલાન આપ્યું છે. ભારત બંધના કારણે દેશમાં જાહેર સેવાઓમાં મોટો વિક્ષેપ પડવાની ધારણા છે અને તેના કારણે કામ, લોકોની અવરજવર અને બેંકિંગ કામગીરી પર મોટી અસર પડી શકે છે. આ દરમિયાન, ભારત બંધની અસર દેશભરમાં પણ દેખાવા લાગી છે. પશ્ચિમ બંગાળમાં તેની સૌથી વધુ અસર જોવા મળી રહી છે. અહીં સિલિગુડીમાં સરકારી બસોના સંચાલનને અસર થઈ છે. આ ઉપરાંત, ડાબેરી પક્ષોના સંગઠનોએ કોલકાતાના જાધવપુરમાં પગપાળા માર્ચ કાઢીને ‘ભારત બંધ’માં ભાગ લીધો હતો.
પશ્ચિમ બંગાળમાં ભારત બંધની અસર
જાધવપુરમાં એક બસ ડ્રાઈવરે કહ્યું, “આ લોકો (ભારત બંધનો ઉલ્લેખ કરીને) સાચી વાત કહી રહ્યા છે, પરંતુ અમારે અમારું કામ કરવું પડશે. અમે મજૂર છીએ, તેથી અમે બંધને સમર્થન આપીએ છીએ. અમે હેલ્મેટ પહેર્યા છે જેથી કંઈક થાય તો અમે સુરક્ષિત રહીએ.” જાધવપુરમાં બસ સ્ટેન્ડ પાસે મોટી સંખ્યામાં પોલીસ દળ તૈનાત કરવામાં આવ્યા છે. ઉપરાંત, બસ ડ્રાઈવરો સલામતી માટે હેલ્મેટ પહેરી રહ્યા છે. ભારત બંધ છતાં જાધવપુરમાં ખાનગી અને સરકારી બસો દોડાવવામાં આવી રહી છે.
પ્રદર્શનકારીઓ રેલ્વે સ્ટેશનમાં ઘૂસી ગયા
જાધવપુરમાં પોલીસ બંદોબસ્ત વધારી દેવામાં આવ્યો છે. આમ છતાં, ડાબેરી પક્ષોના યુનિયન સભ્યોએ જાદવપુર રેલ્વે સ્ટેશનમાં પ્રવેશ કર્યો અને કેન્દ્ર સરકારની કોર્પોરેટ-તરફી નીતિઓ સામે પોતાનો વિરોધ નોંધાવવા માટે રેલ્વે ટ્રેક બ્લોક કર્યો. કેટલીક જગ્યાએ આગચંપીના નાના બનાવો પણ બન્યા છે. જોકે, પરિસ્થિતિ હવે નિયંત્રણમાં છે. આ ઉપરાંત, પટણામાં કોંગ્રેસના કાર્યકરોએ રાજ્ય વિધાનસભા ચૂંટણી 2025 પહેલા બિહારમાં મતદાર યાદીના સ્પેશિયલ ઇન્ટેન્સિવ રિવિઝન (SIR) ના વિરોધમાં સચિવાલય હોલ્ટ રેલ્વે સ્ટેશન પર રેલ્વે ટ્રેક બ્લોક કર્યો હતો.
