સુરતના ગોડાદરા વિસ્તારમાં ATM છેતરપિંડીનો એક વધુ કિસ્સો સામે આવ્યો છે. જોગણીમાતા સર્કલ નજીક આવેલી SBI બેંકના ATMમાં મદદના બહાને એક વેપારી સાથે ઠગાઈ આચરી તેના ખાતામાંથી ₹38 હજાર ઉપાડી લેવામાં આવ્યા હતા.
પોલીસ પાસેથી મળતી માહિતી મુજબ, દેવધ ગામ સ્થિત આનંદી હાઈટ્સમાં રહેતા અને વેપાર કરતા મહેશભાઈ સાદુળભાઈ ગુદરાસીયા 15 મે, 2026ના રોજ સાંજે જોગણીમાતા સર્કલ પાસે આવેલા SBI ATMમાં રૂપિયા ઉપાડવા માટે ગયા હતા. દરમિયાન તેમનું ATM કાર્ડ મશીનમાં ફસાઈ ગયું હતું. તે સમયે એક અજાણ્યા વ્યક્તિએ પોતાની ઓળખ SBI ATM હેલ્પલાઈનના કર્મચારી તરીકે આપી મહેશભાઈનો વિશ્વાસ જીત્યો હતો. મદદ કરવાના બહાને તેણે ATM કાર્ડનો પીન નંબર મેળવી લીધો હતો.
બાદમાં ઠગે ATM કાર્ડનો દુરુપયોગ કરીને મહેશભાઈના બેંક ખાતામાંથી ચાર અલગ-અલગ ટ્રાન્ઝેક્શનમાં કુલ ₹38 હજાર ઉપાડી લીધા હતા. ખાતામાંથી રકમ ઉપડી જવાની જાણ થતાં મહેશભાઈ ચોંકી ઉઠ્યા હતા.
આ બનાવ અંગે મહેશભાઈએ ગોડાદરા પોલીસમાં ફરિયાદ નોંધાવતા પોલીસે ગુનો દાખલ કરી વધુ તપાસ હાથ ધરી છે.
