અમેરિકામાં રહેતા ગુજરાતીઓ સાથે સંકળાયેલા ધોકાધડીના કેસો પાછલા કેટલાક સમયથી ફરીથી ચર્ચામાં આવી રહ્યા છે. તાજેતરમાં મસૌરી રાજ્યના વેરનોન કાઉન્ટીમાંથી ભાગ્ય પટેલ નામના યુવકની ધરપકડ કરાઈ છે. પોલીસ અનુસાર, ભાગ્ય પટેલ પર એક અમેરિકન નાગરિક સાથે 40,000 ડોલર પડાવવાના કૌભાંડમાં સામેલ હોવાનો આરોપ છે. આ કેસની જાણ ત્રીજી એપ્રિલે પોલીસને મળતા તરત જ કાર્યવાહી કરવામાં આવી હતી અને તે જ દિવસે આરોપીની ધરપકડ થઈ હતી. ધરપકડ દરમિયાન ભાગ્ય પટેલ પાસેથી 37,000 ડોલરની રોકડ રકમ પણ જપ્ત કરવામાં આવી હતી.
પોલીસનું કહેવું છે કે ભાગ્ય પટેલના વિરુદ્ધ ચોરી અને મની લોન્ડરિંગના ગંભીર આરોપો લગાવવામાં આવી શકે છે. હાલ તેના પર બે લાખ ડોલરનું કેશ બોન્ડ મૂકવામાં આવ્યું છે. તેની ધરપકડ મસૌરી અને નેવાડાની સ્થાનિક પોલીસ દ્વારા સંયુક્ત ઓપરેશનની મદદથી કરવામાં આવી હતી. હાલમાં પણ તેની વિરુદ્ધ તપાસ ચાલુ છે, જોકે આરોપી કેટલા સમયથી અમેરિકામાં રહે છે, તેની ઉંમર કેટલી છે અને તેનો ઈમિગ્રેશન સ્ટેટસ શું છે તેની હજુ સુધી કોઈ સત્તાવાર માહિતી બહાર આવી નથી.
ટ્રમ્પના શાસનકાળમાં એવા કિસ્સાઓમાં ઘટાડો નોંધાયો હતો, પરંતુ છેલ્લાં કેટલાક મહિનામાં આવી ગુનાહિત પ્રવૃત્તિઓ ફરીથી માથું ઊંચકતી જણાઈ રહી છે. છેલ્લા બે મહિનામાં જ પાંચથી વધુ ગુજરાતીઓ આવી જ નકલી કૌભાંડોની ઘટનામાં ધરપકડ થયા હોવાના રિપોર્ટ મળ્યા છે. હકીકતમાં આ આંકડો વધુ પણ હોઈ શકે છે, પરંતુ ઘણા કેસોમાં હજુ સુધી સત્તાવાર જાહેરાત થવી બાકી છે.
