ડાયમંડ સિટી સુરતના સિંગણપોર-ડભોલી વિસ્તારમાં એક ચોંકાવનારી ઘટના સામે આવી છે. પ્રેમલગ્ન કરનાર યુવતીને તેના જ પરિવારજનોએ કથિત રીતે અપહરણ કરી લઈ જતાં ભારે ચકચાર મચી છે. પોલીસ ફરિયાદ બાદ સમગ્ર મામલો ચર્ચાનું કેન્દ્ર બન્યો છે.
પ્રાથમિક માહિતી મુજબ, યુવતી અને યુવકે થોડા સમય પહેલાં પરિવારની મરજી વિરુદ્ધ હિંદુ રીતિ-રિવાજ મુજબ પ્રેમલગ્ન કર્યા હતા. લગ્નથી નારાજ યુવતીના પરિવારજનોએ બાદમાં સમાધાનનો દેખાવ કરીને દંપતીનો વિશ્વાસ જીતવાનો પ્રયાસ કર્યો હતો.
માતાની માનતા પૂર્ણ કરવાના બહાને બોલાવ્યા
પરિવારજનોએ માતાની માનતા પૂર્ણ કરવાની વાત કહી યુવતી, તેના પતિ અને સાસરિયાઓને ઘરે બોલાવ્યા હતા. નક્કી કરાયેલા કાર્યક્રમ મુજબ તમામ લોકો યુવતીના કાકાના ઘરે પહોંચ્યા હતા, જ્યાં ધાર્મિક વિધિ પૂર્ણ કરવામાં આવી હતી.
ત્યારબાદ બીજી જગ્યાએ દીવાબત્તી કરવા જવાનું કહેવામાં આવ્યું હતું. આ દરમિયાન પરત ફરી રહ્યા હતા ત્યારે અચાનક યુવતીને બળજબરીપૂર્વક લઈ જવાનો પ્રયાસ કરવામાં આવ્યો હતો. યુવતીના પતિએ વિરોધ કરતાં તેની સાથે ઝપાઝપી થઈ હતી અને તેને ધક્કો મારી દૂર કરી દેવામાં આવ્યો હોવાનો આક્ષેપ છે.
યુવતીને કારમાં બેસાડી અજાણ્યા સ્થળે લઈ ગયા
ફરિયાદ મુજબ, ત્યારબાદ યુવતીને તેની ઇચ્છા વિરુદ્ધ લિફ્ટ મારફતે નીચે લઈ જઈ કારમાં બેસાડીને અજાણ્યા સ્થળે લઈ જવામાં આવી હતી. એટલું જ નહીં, યુવતીના કાકા, દાદા અને ફોઈએ યુવકના માતા-પિતાને ઘરમાં રોકી રાખી ધમકી આપી હોવાના પણ ગંભીર આક્ષેપો સામે આવ્યા છે. આ ઘટનાથી યુવક અને તેના પરિવારજનોમાં ભારે ભય અને ગભરાટનો માહોલ સર્જાયો હતો.
પોલીસ ફરિયાદ બાદ કાર્યવાહી શરૂ
ઘટના બાદ યુવકે તાત્કાલિક પોલીસનો સંપર્ક કરી ફરિયાદ નોંધાવી હતી. ફરિયાદના આધારે પોલીસે તપાસ શરૂ કરી છે. પ્રાથમિક તપાસમાં યુવતીના પિતા સહિત પરિવારના કુલ 6 સભ્યો અને અન્ય સંડોવાયેલા લોકો સામે ગુનો નોંધવામાં આવ્યો છે. પોલીસે વિવિધ કલમો હેઠળ કેસ દાખલ કરી સમગ્ર મામલે વધુ તપાસ હાથ ધરી છે.
