ગુજરાત એન્ટિ કરપ્શન બ્યુરો દ્વારા છટકું ગોઠવી લાંચિયા આરોગ્ય અધિક સચિવ દિનેશ પરમાર અને નિવૃત્ત ડીન ગિરીશ પરમારને લાંચ લેતા રંગહાથ ઝડપી પાડવામાં આવ્યા હતા. ફરિયાદીના તરફેણમાં કામગીરી કરવા માટે ફરિયાદી અને તેમના ડૉક્ટર મિત્ર પાસે 30 લાખ રૂપિયાની મસમોટી લાંચ માંગી હતી. ત્યારે ફરિયાદએ એન્ટી કરપ્શન બ્યુરોને જાણ કરી હતી અને આરોપીને 15 લાખની રકમ એડવાન્સ પેટે સ્વીકારતા ઝડપી પાડ્યા હતા.
આરોપીઓની ઓળખ પ્રાથમિક અને વિભાગીય તપાસ માટે અધિક સચિવ, મેડિકલ એજ્યુકેશન સર્વિસ, મેડિકલ એજ્યુકેશન અને ગુજરાત મેડિકલ એજ્યુકેશન એન્ડ રિસર્ચ સોસાયટી (GMERS) દિનેશ બી પરમાર અને અમદાવાદમાં સરકારી ડેન્ટલ કોલેજ અને હોસ્પિટલના ડીન તરીકે નિવૃત્ત થયેલા ડૉ. ગિરીશ જેઠાલાલ પરમાર તરીકે થઈ છે.
આરોગ્ય વિભાગ દ્વારા બંને ડોકટર સામે પ્રાથમિક તપાસ શરૂ કરવામાં આવી હતી અને તપાસ અધિકારીએ આ ખાતાકીય તપાસ ઓકટોબર-2024માં પૂર્ણ કરી પોતાનો અહેવાલ જાન્યુઆરી-2025માં જમા કરાવ્યો હતો.
આ સમયગાળા દરમ્યાન ગિરીશભાઇ જેઠાલાલ પરમાર જે સરકારી ડેન્ટલ કોલેજ, અસારવા અમદાવાદ ખાતેના નિવૃત્ત ડીન હતા. તેમણે ફરિયાદીનો સંપર્ક કરીને ફરિયાદી તથા તેમના સાથી ડોકટર બન્ને વિરૂદ્ધની પ્રાથમિક તપાસનાં કામે તરફેણમાં કાર્યવાહી કરાવવા માટે દીનેશભાઇ પરમાર, અધીક સચીવ (તપાસ), વર્ગ-1 આરોગ્ય અને પરિવાર કલ્યાણ વિભાગ સાથે મીટિંગ કરવા બોલાવ્યા હતા.
જેથી ફરિયાદી અને તેમના સાથી ડોકટર મિત્ર ગાંધીનગર ખાતે જઇને ગિરીશ પરમાર અને દિનેશ પરમારને રૂબરૂમાં મળી વાતચીત કરી હતી. આ દરમિયાન બન્ને આરોપીઓએ તેમની પાસેથી રૂ. 30,00,000/- ની લાંચની માંગણી કરી હતી. જેમાં તે પૈકી રૂ.15,00,000/- એડવાન્સ અને બાકીના ફરિયાદીનું કામ થઇ ગયા પછી આપવાનો વાયદો કરવામાં આવ્યો હતો.
જ્યારે ગિરીશ પરમારે ફરિયાદીને લાંચની રકમનો પહેલો હપ્તો ચૂકવવા માટે ફોન કર્યો ત્યારે ફરિયાદીએ ACBનો સંપર્ક કર્યો. પોલીસ ઇન્સ્પેક્ટર એસ.એન. બારોટ અને એ.કે. ચૌહાણની આગેવાની હેઠળની ટીમે છટકું ગોઠવ્યું. ફરિયાદી સાથે આ બાબતે “હેતુપૂર્ણ વાતચીત” કર્યા બાદ ગિરીશ પરમારની ધરપકડ કરવામાં આવી હતી અને લાંચની રકમ સ્વીકારતા પકડાઈ ગયા હતા.
