પશ્ચિમ એશિયામાં ચાલી રહેલા તણાવ, ક્રૂડ ઓઈલના ભાવમાં વધઘટ અને વિદેશી રોકાણકારો દ્વારા વેચાણ સહિતના પરિબળોને કારણે આજે સ્થાનિક શેરબજારમાં નોંધપાત્ર ઘટાડો જોવા મળ્યો હતો. આ ઘટાડાને પગલે રોકાણકારોમાં ગભરાટ ફેલાયો હતો. 30 શેરો ધરાવતો સેન્સેક્સ 555 પોઈન્ટ ઘટીને 74,272.40 પર લાલ નિશાન સાથે ખુલ્યો હતો. સવારે 9:20 વાગ્યે, તે 643.55 પોઈન્ટ એટલે કે 0.86 ટકા ઘટીને 74,184.70 પર ટ્રેડ થઈ રહ્યો હતો.
50 શેરો ધરાવતો નિફ્ટી 9:21 વાગ્યે 0.92 ટકા ઘટીને 215.30 પોઈન્ટ ઘટીને 23,231.50 પર લાલ નિશાન સાથે ટ્રેડ થઈ રહ્યો હતો. આજના બિઝનેસ પ્રારંભે નિફ્ટી 23,221.80 હતો. શેરબજારમાં ઘટાડા અંગે નિષ્ણાતોએ શું કહ્યું?
શેરબજારમાં ઘટાડા અંગે એક ફાઇનાન્શિયલ સર્વિસીસના નિષ્ણાતને ટાંકીને એક મીડિયાના અહેવાલ મુજબ ક્રૂડ ઓઇલના ભાવમાં 102 ડોલરથી ઉપરનો તીવ્ર વધારો અને યુએસ 10-વર્ષના બોન્ડ યીલ્ડ 5.11 ટકા સુધી વધવાને કારણે આજે સ્થાનિક શેરબજાર દબાણ હેઠળ રહેશે. બજારમાં હાલમાં ઝડપી સુધારાની શક્યતા ઓછી દેખાઈ રહી છે.
શેરબજારમાં હાહાકાર, સેન્સેક્સમાં 600 પોઈન્ટનો કડાકો!
ગ્રેટર નોઈડા સ્લીપર બસ આગકાંડ: ડ્રાઈવર-કંડક્ટર ઝડપાયા, 9નાં મોત
મહોબા જઈ રહેલી સ્લીપર બસમાં આગ લાગવાની ઘટનામાં ફરાર ડ્રાઈવર અને કંડક્ટરની પોલીસે ધરપકડ કરી છે. દિલ્હીથી મહોબા જઈ રહેલી બસમાં બુધવારે મોડી રાત્રે યમુના એક્સપ્રેસવે પર ભીષણ આગ લાગી હતી. આ દુર્ઘટનામાં એક મહિલા સહિત 9 લોકોનાં મોત થયા છે, જ્યારે 20થી વધુ મુસાફરોને સુરક્ષિત બહાર કાઢવામાં આવ્યા હતા.
મુખ્ય ફાયર ઓફિસર પ્રદીપ કુમારે જણાવ્યું કે બસમાં આગ લાગ્યા બાદ પોલીસ, બચાવકર્મીઓ અને ફાયર બ્રિગેડની ટીમો ઘટનાસ્થળે પહોંચી હતી. બસની અંદર તપાસ દરમિયાન 9 મૃતદેહ મળી આવ્યા હતા. પ્રાથમિક તપાસમાં બસની એર કન્ડિશનિંગ સિસ્ટમમાં સ્પાર્ક અથવા વિસ્ફોટના કારણે એન્જિનના લુબ્રિકન્ટ ઓઇલમાં આગ લાગી હોવાની શક્યતા વ્યક્ત કરવામાં આવી છે.
પોલીસે કેસ નોંધીને બસના ડ્રાઈવર અને કંડક્ટરની ધરપકડ કરી છે અને આગ લાગવાનું ચોક્કસ કારણ જાણવા તપાસ હાથ ધરી છે. મુખ્યમંત્રી યોગી આદિત્યનાથે મૃતકોના પરિવારજનોને રૂ.2-2 લાખ અને ઘાયલોને રૂ.50-50 હજારની આર્થિક સહાય આપવાની જાહેરાત કરી છે.
UNમાં ઝેલેન્સ્કીનું મોટું નિવેદન : ભારત સહિત 47 દેશોના નાગરિકોને લઈને રશિયા પર ગંભીર આરોપ
યુક્રેનના રાષ્ટ્રપતિ વોલોદિમીર ઝેલેન્સ્કીએ સંયુક્ત રાષ્ટ્ર મહાસભામાં ભારત સહિત 47 દેશોના નાગરિકોનો મુદ્દો ઉઠાવ્યો. તેમણે દાવો કર્યો કે રશિયા આ દેશોના નાગરિકોને યુક્રેન સામેના યુદ્ધમાં ઉપયોગ કરી રહ્યું છે.
ભારત સહિત 47 દેશોને શું અપીલ કરી?
ઝેલેન્સ્કીએ ભારત, ઘાના, નેપાળ, તાજિકિસ્તાન, યમન, કેન્યા, ઝિમ્બાબ્વે, ક્યુબા, બેલારુસ, સુદાન અને દક્ષિણ આફ્રિકા સહિત અનેક દેશોના નામ લીધા. તેમના દાવા મુજબ, કેટલાક નાગરિકોને છેતરપિંડી અથવા અન્ય રીતે રશિયા લઈ જઈને યુદ્ધમાં મોકલવામાં આવી રહ્યા છે.
તેમણે સંબંધિત દેશોની સરકારોને પોતાના નાગરિકોની સુરક્ષા સુનિશ્ચિત કરવા અને તેમને યુદ્ધના મોરચે જતા અટકાવવા અપીલ કરી.
પુતિનને લઈને શું કહ્યું?
ઝેલેન્સ્કીએ કહ્યું કે કોઈપણ દેશે રશિયાને પોતાના નાગરિકોને યુદ્ધમાં સામેલ કરવાની મંજૂરી આપવી જોઈએ નહીં. તેમણે રશિયાની યુદ્ધ કરવાની ક્ષમતા ઘટાડવા માટે તેના નાણાકીય સ્ત્રોતો પર વધુ દબાણ લાવવાની પણ અપીલ કરી.
રશિયા પર આર્થિક દબાણ વધારવાની માંગ
ઝેલેન્સ્કીએ રશિયાની આવકના સ્ત્રોતો મર્યાદિત કરવા અને તેના પર વધુ પ્રતિબંધો લાદવાની માંગ કરી. તેમના કહેવા મુજબ, રશિયાને મળતા નાણાં તેની યુદ્ધ કરવાની ક્ષમતાને જાળવી રાખવામાં મદદ કરે છે.
કાળા સમુદ્રમાં ભારતની ભૂમિકાનો ઉલ્લેખ
ઝેલેન્સ્કીએ કાળા સમુદ્રમાં સુરક્ષિત વ્યાપારી જહાજોની અવરજવર ફરી શરૂ કરવા માટે ભારત, ઈજિપ્ત અને તુર્કિયે દ્વારા કરવામાં આવેલા પ્રયાસોનો પણ ઉલ્લેખ કર્યો. તેમણે કહ્યું કે યુક્રેન દરિયાઈ યુદ્ધવિરામને સમર્થન આપવા તૈયાર છે અને હવે રશિયાના જવાબની રાહ જોઈ રહ્યું છે.
કાળા સમુદ્ર દ્વારા અનાજ સહિત જરૂરી ચીજવસ્તુઓની હેરફેર થતી હોવાથી સુરક્ષિત વેપારી અવરજવરનો મુદ્દો મહત્વપૂર્ણ છે.
શિયાળા પહેલાં યુક્રેન સામે પડકાર
ઝેલેન્સ્કીએ કહ્યું કે આગામી શિયાળો યુક્રેન માટે મુશ્કેલ બની શકે છે. રશિયાના મિસાઈલ અને ડ્રોન હુમલાઓ વચ્ચે યુક્રેનની હવાઈ સુરક્ષા વધુ મજબૂત કરવાની જરૂરિયાત પર તેમણે ભાર મૂક્યો. અમેરિકા સાથેની ચર્ચામાં હવાઈ સુરક્ષા અને પેટ્રિયટ મિસાઈલનું ઉત્પાદન વધારવાનો મુદ્દો પણ ઉઠાવ્યાનો તેમણે ઉલ્લેખ કર્યો.
24 સપ્ટેમ્બરે ખુલશે ભાગ્યના નવા દરવાજા? મેષથી મીન સુધી જાણો કોનો દિવસ રહેશે ખાસ
૨૪ સપ્ટેમ્બર ૨૦૨૬, ગુરુવાર માટેનું ૧૨ રાશીઓનું સચોટ રાશીફળ (Rashifal) રજૂ કરેલ છે:
મેષ (Aries):
ગુરુવારના શુભ પ્રભાવથી જ્ઞાન, બુદ્ધિ અને નિર્ણયશક્તિમાં સારો વધારો થશે. કાર્યક્ષેત્રે વરિષ્ઠ અધિકારીઓ અને સહકર્મચારીઓ તરફથી સંપૂર્ણ સહયોગ પ્રાપ્ત થતાં અટકેલા મહત્વપૂર્ણ પ્રોજેક્ટ્સ ઝડપથી પૂર્ણ થશે. આર્થિક રીતે લાભદાયી દિવસ રહેશે અને જૂની ઉઘરાણી કે અટવાયેલા નાણાં પરત મળવાના ઉત્તમ યોગ બનશે. પરિવાર સાથે સાંજનો સમય આનંદ અને શાંતિથી પસાર થશે. દાંપત્યજીવનમાં સુમેળ અને પરસ્પર વિશ્વાસ જળવાઈ રહેશે.
વૃષભ (Taurus):
નાણાકીય બાબતોમાં આયોજનપૂર્વક આગળ વધવું અને બિનજરૂરી ખર્ચાઓ પર સમયસર અંકુશ રાખવો અત્યંત જરૂરી છે. કાર્યસ્થળે નવી તકો સામે આવી શકે છે, પરંતુ કોઈપણ મોટો નિર્ણય લેતાં પહેલાં અનુભવીઓની સલાહ લેવી હિતાવહ રહેશે. કૌટુંબિક જીવનમાં સુખ-શાંતિ જળવાઈ રહેશે અને પરિવારના સભ્યો સાથે મહત્વના વિષયો પર સકારાત્મક ચર્ચા થશે. બહારના તળેલા આહારથી દૂર રહેવું અને પૂરતો આરામ લેવો. ધાર્મિક ચિંતનથી માનસિક રાહત મળશે.
મિથુન (Gemini):
તમારી ઉત્તમ વાણીકળા અને તાર્કિક ક્ષમતાથી કાર્યક્ષેત્રે જટિલ સમસ્યાઓનો સરળ ઉકેલ લાવી શકશો. વેપાર-ધંધામાં નવી ભાગીદારી કે મોટા આર્થિક સોદા સફળ થવાની પૂરી સંભાવનાઓ સર્જાશે. વિદ્યાર્થીઓ માટે અભ્યાસ અને સ્પર્ધાત્મક વિષયોમાં એકાગ્રતા વધારવાનો આ શ્રેષ્ઠ સમય છે. મિત્રો અને સ્નેહીજનો સાથે મુલાકાત થતાં મન પ્રસન્ન અને ઉત્સાહિત રહેશે. નાની તેમજ ફાયદાકારક મુસાફરીનો સુંદર યોગ રચાઈ રહ્યો છે.
કર્ક (Cancer):
માનસિક શાંતિ જાળવી રાખવા માટે નકારાત્મક વિચારોથી દૂર રહેવું અને આધ્યાત્મિક કાર્યોમાં સમય પસાર કરવો શ્રેષ્ઠ રહેશે. નોકરીમાં તમારી કાર્યનિષ્ઠા અને સમર્પણની વરિષ્ઠ અધિકારીઓ દ્વારા યોગ્ય કદર કરવામાં આવશે. પારિવારિક સંબંધોમાં સ્નેહ અને મધુરતા જળવાઈ રહેશે તથા જીવનસાથી તરફથી દરેક મુશ્કેલીમાં સાથ મળશે. આર્થિક સ્થિતિ સ્થિર રહેશે, તેમ છતાં બજેટનું આયોજન જાળવી રાખવું. ખાનપાનમાં સંયમ રાખવો જરૂરી છે.
સિંહ (Leo):
આત્મવિશ્વાસ ઉત્તમ સ્તરે રહેશે અને તમારી નેતૃત્વ ક્ષમતાથી કાર્યક્ષેત્રે ધાર્યા પરિણામો સરળતાથી પ્રાપ્ત કરી શકશો. સામાજિક વર્તુળમાં તમારી પ્રતિષ્ઠા અને માન-સન્માનમાં સારો વધારો થતો જોવા મળશે. આર્થિક બાબતોમાં પ્રગતિ જોવા મળશે અને જૂના રોકાણોમાંથી ધાર્યો ઉત્તમ લાભ પ્રાપ્ત થશે. દાંપત્યજીવન સુખમય અને આનંદદાયક રહેશે, પરસ્પર નિકટતા વધશે. શારીરિક ઊર્જા અને ઉત્સાહ દિવસભર જળવાઈ રહેશે.
કન્યા (Virgo):
કામકાજનો બોજ વધુ હોવા છતાં યોગ્ય સમય વ્યવસ્થાપનથી તમે તમામ જવાબદારીઓ સમયસર પૂર્ણ કરી શકશો. નાણાકીય લેવડ-દેવડમાં ખાસ સાવચેતી રાખવી અને ઉતાવળા નિર્ણયો લેવાથી બચવું ફાયદાકારક રહેશે. પરિવારના સભ્યો તરફથી જરૂરી સહયોગ અને ઉત્સાહ મળશે, જેથી માનસિક હળવાશ અનુભવશો. ધ્યાન અને યોગને દિનચર્યામાં સામેલ કરવાથી શારીરિક તાજગી તેમજ સ્ફૂર્તિ જળવાશે. નકારાત્મક ચર્ચાઓથી દૂર રહેવું.
તુલા (Libra):
આજનો દિવસ તમારા માટે અત્યંત ભાગ્યશાળી અને આર્થિક સમૃદ્ધિ અપાવનારો સાબિત થશે. વેપાર-ધંધામાં સારો નફો મળવાના અને આવકના નવા વધારાના સ્ત્રોત ઊભા થવાના શુભ સંકેતો છે. કૌટુંબિક વાતાવરણ આનંદમય અને ઉત્સાહવર્ધક રહેશે, કોઈ માંગલિક પ્રસંગની યોજના બની શકે છે. જૂની સમસ્યાઓ કે આર્થિક ચિંતાઓમાંથી મુક્તિ મળતાં રાહત અનુભવશો. દિવસભર મન પ્રફુલ્લિત અને સકારાત્મક રહેશે.
વૃશ્ચિક (Scorpio):
કારકિર્દી અને વ્યવસાયમાં પ્રગતિના નવા દરવાજા ખુલશે અને વિરોધીઓ પર તમારો પ્રભાવ વધશે. કાર્યક્ષેત્રે તમારું વર્ચસ્વ મજબૂત બનશે અને નવી યોજનાઓ સફળતાપૂર્વક આગળ ધપાવી શકશો. વડીલોના આશીર્વાદ અને યોગ્ય માર્ગદર્શનથી મુશ્કેલ કાર્યો પણ સરળતાથી પાર પડશે. સ્વાસ્થ્ય ઊર્જાવાન અને સંતોષકારક રહેશે, કાર્ય કરવાનો ઉત્સાહ વધશે. આર્થિક આયોજનમાં સ્થિરતા અને લાભ જોવા મળશે.
ધન (Sagittarius):
રાશિ સ્વામી દેવગુરુ બૃહસ્પતિની વિશેષ કૃપાથી ભાગ્યનો પૂરો સાથ મળશે અને અટકેલા મહત્વના કાર્યો પૂર્ણ થવા લાગશે. ધાર્મિક પ્રવૃત્તિઓ, સત્સંગ કે પૂજા-પાઠમાં મન વિશેષ લાગશે અને પુણ્યકાર્યો થશે. લાંબા અંતરની સુખદ અને લાભદાયી યાત્રાનો સુંદર યોગ બની રહ્યો છે જે મનને નવી પ્રેરણા આપશે. સંતાનો તરફથી ઉત્સાહવર્ધક અને ગૌરવપ્રદ સમાચાર પ્રાપ્ત થશે. માનસિક સંતોષ ઉત્તમ રહેશે.
મકર (Capricorn):
આજે દરેક કાર્યમાં ધીરજ અને સંયમ જાળવવો, વાદ-વિવાદ કે ઉગ્ર ચર્ચાઓથી સંપૂર્ણપણે દૂર રહેવું હિતાવહ છે. કાર્યક્ષેત્રે પરિશ્રમ વધુ કરવો પડશે પરંતુ તેનું પરિણામ ભવિષ્યમાં ખૂબ જ સકારાત્મક અને ફાયદાકારક રહેશે. નાણાકીય બાબતોમાં આયોજનપૂર્વક આગળ વધવું અને જોખમી રોકાણોથી બચવું જરૂરી છે. જીવનસાથીનો સહયોગ મુશ્કેલ સમયમાં હિંમત પૂરી પાડશે. નિયમિત દિનચર્યા રાખવાથી સ્વાસ્થ્ય સારું રહેશે.
કુંભ (Aquarius):
ભાગીદારીના વ્યવસાયમાં સારો આર્થિક લાભ થશે અને નવી યોજનાઓ શરૂ કરવા માટે અનુકૂળ સમય છે. વૈવાહિક જીવનમાં મધુરતા વધશે અને જીવનસાથી તરફથી દરેક મહત્વપૂર્ણ બાબતમાં સહયોગ મળશે. તમારી સર્જનાત્મકતા, કાર્યશૈલી અને નવીન વિચારોની કાર્યસ્થળે યોગ્ય પ્રશંસા થશે. સામાજિક વર્તુળમાં માન-પ્રતિષ્ઠા અને વર્ચસ્વ વધશે. આર્થિક સ્થિતિ એકંદરે મજબૂત અને સુદ્રઢ રહેશે.
મીન (Pisces):
રાશિ સ્વામી ગુરુના આશીર્વાદથી કાર્યક્ષેત્રે તમારી મહેનતનું શ્રેષ્ઠ અને ધાર્યું પરિણામ પ્રાપ્ત થશે. સ્પર્ધાત્મક પરીક્ષાઓની તૈયારી કરતા વિદ્યાર્થીઓને સારા અને પ્રોત્સાહક સમાચાર મળવાના ઉત્તમ યોગ છે. નાણાકીય બચતમાં સારો વધારો થશે અને બિનજરૂરી ખર્ચ પર યોગ્ય અંકુશ રાખી શકશો. સ્વાસ્થ્ય ઉત્તમ રહેશે અને દિવસભર આંતરિક સંતોષ તેમજ તાજગી જળવાઈ રહેશે. સેવાકીય કાર્યોમાં રુચિ વધશે.
“ચંદુ નહીં, ચેમ્પિયન છું હું!” કાર્તિક આર્યને પહેલો નેશનલ એવોર્ડ ‘લાલબાગચા રાજા’ના ચરણોમાં અર્પણ કર્યો
શું સખત મહેનત અને અડગ વિશ્વાસ ક્યારેય નિષ્ફળ જાય છે? ગ્વાલિયરના એક સામાન્ય પરિવેશમાંથી આવતા યુવાને એક સમયે જે સપનું જોયું હતું, આજે તે સાચા અર્થમાં દેશનો ‘ચેમ્પિયન’ બનીને હકીકત બની ચૂક્યું છે! અભિનેતા કાર્તિક આર્યને કરિયરનો સર્વપ્રથમ નેશનલ ફિલ્મ એવોર્ડ જીતીને સાબિત કરી દીધું છે કે મક્કમ ઇરાદા આગળ કોઈ પણ મંઝિલ અશક્ય નથી. આ ઐતિહાસિક સન્માન મેળવ્યાના બીજા જ દિવસે કાર્તિકે મુંબઈના વિખ્યાત ‘લાલબાગચા રાજા’ના દરબારમાં પહોંચીને પોતાનો ‘રજત કમળ’ બાપ્પાના ચરણોમાં અર્પણ કર્યો હતો.
આજે પારંપરિક કુર્તામાં સજ્જ કાર્તિક આર્યન હાથમાં નેશનલ એવોર્ડ સાથે પંડાલમાં જોવા મળ્યો હતો. તેણે ગણપતિ સમક્ષ માથું ટેકવી, એવોર્ડને ભગવાનના ચરણોમાં સ્પર્શ કરાવીને કૃતજ્ઞતા વ્યક્ત કરી હતી. સોશિયલ મીડિયા પર આ ભાવનાત્મક ક્ષણની તસવીર શેર કરતા તેણે લખ્યું, “મારા સુખકર્તા દુખહર્તા. આ લાગણીઓને શબ્દોમાં વર્ણવી શકું તેમ નથી. આભાર બાપ્પા!!” મરાઠી આરતીના આ શબ્દો ગણેશજીને સુખ લાવનાર અને દુઃખ હરનાર તરીકે પ્રસ્થાપિત કરે છે.
ગુજરાતના એકતા નગરમાં આયોજિત 72મા નેશનલ ફિલ્મ એવોર્ડ્સમાં રાષ્ટ્રપતિ દ્રૌપદી મુર્મુના હસ્તે કાર્તિકને ‘બેસ્ટ એક્ટર’નો એવોર્ડ એનાયત કરવામાં આવ્યો હતો. આ સન્માન તેને કબીર ખાન દિગ્દર્શિત ફિલ્મ ‘ચંદુ ચેમ્પિયન’માં ભારતના પ્રથમ પેરાલિમ્પિક ગોલ્ડ મેડાલિસ્ટ મુરલીકાંત પેટકરની ભૂમિકા જીવંત કરવા માટે મળ્યું છે. નોંધનીય છે કે, તે મલયાલમ ફિલ્મ ‘ભ્રમયુગમ’ના દિગ્ગજ અભિનેતા મમૂટી સાથે આ એવોર્ડ શેર કરી રહ્યો છે.
પોતાની આ ઐતિહાસિક સિદ્ધિ પર ભાવુક થતાં કાર્તિકે એક પોસ્ટમાં લખ્યું હતું કે, “એક નાના શહેરના છોકરાનું સપનું આજે હકીકત બની ગયું છે. ‘ચંદુ નહીં, ચેમ્પિયન હૈ મૈં!'” તેણે પોતાના માતા-પિતા, મિત્રો અને ડિરેક્ટર કબીર ખાન તથા નિર્માતા સાજિદ નડિયાદવાલાનો વિશેષ આભાર માન્યો હતો. આ પડકારજનક ભૂમિકા માટે કાર્તિકે 14 મહિના સુધી શારીરિક પરિવર્તન, સ્વિમિંગ અને બોક્સિંગની આકરી તાલીમ લીધી હતી. કઠોર પરિશ્રમની આ સફરનું પરિણામ આજે તેના માટે ‘રસમલાઈ’ જેટલું જ મીઠું સાબિત થયું છે.
Asian Games 2026: ચોથા દિવસે શૂટિંગથી બેડમિન્ટન સુધી ભારતનો જલવો, એક દિવસમાં 5 મેડલ!
ભારત માટે 23 સપ્ટેમ્બરનો દિવસ એશિયન ગેમ્સ 2026માં મેડલની દૃષ્ટિએ ખાસ રહ્યો છે. એક તરફ ઓલિમ્પિક મેડલ વિજેતા મીરાબાઈ ચાનુએ લાંબી રાહ બાદ એશિયન ગેમ્સમાં પોતાનું પ્રથમ મેડલ જીત્યુ, તો બીજી તરફ શૂટિંગ અને સોફ્ટ ટેનિસ બાદ ભારતીય પુરુષ બેડમિન્ટન ટીમે પણ બ્રોન્ઝ મેડલ પક્કું કર્યું હતું. દિવસના અંત સુધી ભારતના ખાતામાં કુલ પાંચ મેડલ ઉમેરાયા છે.
મીરાબાઈ ચાનુનો પ્રથમ એશિયન ગેમ્સ મેડલ
મહિલાઓની 49 કિગ્રા વેઇટલિફ્ટિંગ કેટેગરીમાં મીરાબાઈ ચાનુએ સિલ્વર મેડલ જીત્યું હતું. મીરાબાઈએ કુલ 198 કિગ્રા વજન ઉઠાવ્યો હતો. તેમણે સ્નેચમાં 87 કિગ્રા અને ક્લીન એન્ડ જર્કમાં 111 કિગ્રાનું સફળ લિફ્ટ નોંધાવ્યું હતું. ઉત્તર કોરિયાની રી સોંગ ગમ 215 કિગ્રા સાથે ગોલ્ડ જીતી હતી. આ મીરાબાઈનું એશિયન ગેમ્સમાં પ્રથમ મેડલ છે.
શૂટિંગમાં બે બ્રોન્ઝ
ભારતીય શૂટર્સે પણ મેડલ ટેબલમાં મહત્વનો ફાળો આપ્યો હતો. પુરુષોની સ્કીટ ટીમ અને મહિલાઓની સ્કીટ ટીમ, બંનેએ બ્રોન્ઝ મેડલ જીત્યા હતા. પુરુષોની ટીમમાં અનંતજીત સિંહ નરુકા, મેરાજ અહમદ ખાન અને ભવતેગ સિંહ ગિલનો સમાવેશ હતો.
સોફ્ટ ટેનિસમાં જય મીનાનો ઐતિહાસિક બ્રોન્ઝ
સોફ્ટ ટેનિસમાં જય મીનાએ બ્રોન્ઝ મેડલ જીતીને ભારત માટે આ રમતનો એશિયન ગેમ્સ ઇતિહાસમાં પ્રથમ મેડલ નોંધાવ્યુ હતું.
બેડમિન્ટનમાં પણ બ્રોન્ઝ પક્કું
ભારતીય પુરુષ બેડમિન્ટન ટીમને સેમિફાઇનલમાં ચીન સામે 1-3થી હાર મળી હતી. લક્ષ્ય સેન અને આયુષ શેટ્ટી પોતાના સિંગલ્સ ગુમાવ્યા, જ્યારે સાત્વિકસાઈરાજ રેન્કિરેડ્ડી-ચિરાગ શેટ્ટીએ ભારતને એક મેચમાં જીત અપાવી. અંતે એમઆર અર્જુન-હરિહરન અમસાકરુનનની જોડી હારી જતા ભારત ફાઇનલની રેસમાંથી બહાર થયું, પરંતુ ટીમે બ્રોન્ઝ મેડલ પોતાના નામે કર્યું હતું.
આ રીતે 23 સપ્ટેમ્બરના દિવસે ભારતે 1 સિલ્વર અને 4 બ્રોન્ઝ સહિત કુલ 5 મેડલ મેળવ્યા છે.
ભાજપના નવા પ્રભારીઓ: ગુજરાતમાં તરુણ ચૂગ, તો સુરતના દર્શના જરદોષ સહિત 4 ગુજરાતીઓને મળી આ જવાબદારી
ગુજરાત ભાજપમાં સંગઠનાત્મક સ્તરે મહત્વનો ફેરફાર થયો છે. ભાજપના રાષ્ટ્રીય અધ્યક્ષ નીતિન નવીને 23 સપ્ટેમ્બર 2026ના રોજ 28 રાજ્યો અને 8 કેન્દ્રશાસિત પ્રદેશો માટે પ્રભારી અને સહ-પ્રભારીઓની નવી જવાબદારીઓ જાહેર કરી છે. નવી યાદીમાં ગુજરાત માટે તરુણ ચૂગને પ્રભારી તરીકે યથાવત રાખવામાં આવ્યા છે, જ્યારે અજય મહાવર અને ગોમતી સાઈને સહ-પ્રભારી બનાવવામાં આવ્યા છે. આ તમામ નિમણૂકો તાત્કાલિક અસરથી અમલમાં આવશે.
ગુજરાત માટે ખાસ વાત એ છે કે તરુણ ચૂગની ગુજરાતના પ્રભારી તરીકે નિમણૂક અગાઉ 18 ઓગસ્ટ 2026ના રોજ કરવામાં આવી હતી. તે સમયે તેમણે ભૂપેન્દ્ર યાદવનું સ્થાન લીધું હતું. ત્યારથી હવે નવી રાષ્ટ્રીય યાદીમાં તેમની સાથે બે સહ-પ્રભારીઓ ઉમેરાતા ગુજરાત ભાજપની સંગઠનાત્મક ટીમ ત્રણ સભ્યોની બની છે.
નવી જવાબદારીનો વ્યાપ માત્ર સંગઠન પૂરતો મર્યાદિત નથી. રાજ્યોમાં પાર્ટીની સંગઠનાત્મક કામગીરી, ચૂંટણીની તૈયારી અને કેન્દ્ર તથા રાજ્ય સંગઠન વચ્ચેના સંકલન માટે પ્રભારીઓ મહત્વની ભૂમિકા ભજવે છે. 2027માં ગુજરાત ઉપરાંત ઉત્તર પ્રદેશ, ઉત્તરાખંડ, પંજાબ, ગોવા, મણિપુર અને હિમાચલ પ્રદેશમાં વિધાનસભા ચૂંટણી યોજાવાની છે, તેથી આ રાજ્યો માટેની નવી ટીમોને ખાસ મહત્વ આપવામાં આવ્યું છે.
ગુજરાતના કેટલા નેતાઓને બહાર જવાબદારી?
ગુજરાત સાથે જોડાયેલા કુલ ચાર નેતાઓને ગુજરાત બહાર મહત્વની જવાબદારી સોંપવામાં આવી છે. જગદીશ પટેલને ઉત્તર પ્રદેશના સહ-પ્રભારી, રોહન ગુપ્તાને બિહારના સહ-પ્રભારી, દર્શનાબેન જરદોશને દિલ્હી ભાજપના સહ-પ્રભારી અને વર્ષાબેન દોશીને દાદરા-નગર હવેલી તથા દમણ-દીવના પ્રભારી બનાવવામાં આવ્યા છે.
કયા રાજ્યમાં કોને જવાબદારી?
નવી યાદી મુજબ હરિયાણા અને છત્તીસગઢની જવાબદારી સ્મૃતિ ઈરાનીને, જ્યારે તમિલનાડુ અને ઉત્તરાખંડની જવાબદારી રામ માધવને સોંપવામાં આવી છે. સુનીલ બંસલને તેલંગાણા અને પશ્ચિમ બંગાળ, હરીશ દ્વિવેદીને બિહાર અને કર્ણાટક, તેમજ સતીશ પુનિયાને જમ્મુ-કાશ્મીર અને પંજાબની જવાબદારી મળી છે. અનિલ એન્ટોની નાગાલેન્ડના પ્રભારી ઉપરાંત ગોવાના સહ-પ્રભારી રહેશે. આમ, કુલ છ નેતાઓની બે રાજ્યો સાથે જવાબદારી જોડાઈ છે, જોકે અનિલ એન્ટોનીના એક રાજ્યમાં પ્રભારી અને બીજા રાજ્યમાં સહ-પ્રભારી તરીકે અલગ હોદ્દા છે.
ઉત્તર પ્રદેશમાં વિનોદ તાવડે પ્રભારી રહેશે અને તેમની સાથે ચાર સહ-પ્રભારીઓ રાખવામાં આવ્યા છે. મહારાષ્ટ્રમાં બૈજયંત જય પાંડા પ્રભારી બન્યા છે, જ્યારે અмит માલવિયા, સદાનંદ શેટ તાનાવડે અને કમલજીત સેહરાવત સહ-પ્રભારી રહેશે. રાજસ્થાનમાં સંજય ભાટિયા સાથે કવિતા પાટીદાર અને કુલજીત ચહલને જવાબદારી આપવામાં આવી છે.
બાકીના રાજ્યોમાં આંધ્રપ્રદેશમાં અરવિંદ ભદૌરિયા, આસામમાં મંગલ પાંડે, ઝારખંડમાં ગજેન્દ્ર પટેલ, કેરળમાં એમ. નાગરાજા, મધ્યપ્રદેશમાં બિપ્લબ કુમાર દેબ, ઓડિશામાં ડી. પુરંદેશ્વરી, બિહારમાં હરીશ દ્વિવેદી અને ત્રિપુરામાં મૃગાંક દેવ બર્મનને પ્રભારી બનાવવામાં આવ્યા છે. કર્ણાટકમાં હરીશ દ્વિવેદી, મિઝોરમમાં ભગવત કરાડ, સિક્કિમમાં રાજુ બિસ્તા અને મેઘાલયમાં કનાદ પુરકાયસ્થ સહિત અન્ય રાજ્યો માટે પણ નવી જવાબદારીઓ નક્કી થઈ છે.
કેન્દ્રશાસિત પ્રદેશોમાં પણ નવી નિમણૂકો કરવામાં આવી છે. દિલ્હીમાં વિનય સહસ્રબુદ્ધે, ચંડીગઢમાં મહેન્દ્ર પાંડે, જમ્મુ-કાશ્મીરમાં સતીશ પુનિયા, લદ્દાખમાં રાજકુમાર ભાટિયા, લક્ષદ્વીપમાં જ્યોર્જ કુરિયન, પુડુચેરીમાં કે. સુરેનદ્રન અને અંડમાન-નિકોબારમાં જય પ્રકાશને જવાબદારી સોંપવામાં આવી છે.
આ રીતે 23 સપ્ટેમ્બરની આ યાદી ગુજરાત સહિત ભાજપના સમગ્ર રાજ્ય અને કેન્દ્રશાસિત પ્રદેશ સ્તરના સંગઠનમાં નવી ટીમની રચના દર્શાવે છે. ગુજરાતમાં તરુણ ચૂગની સાથે અજય મહાવર અને ગોમતી સાઈની નિમણૂકને કારણે હવે આગામી સંગઠનાત્મક અને ચૂંટણી પૂર્વ કામગીરી માટે ત્રણ સભ્યોની પ્રભારી ટીમ રહેશે.
ગણેશ વિસર્જન ૨૦૨૬: ૨૪ કે ૨૫ સપ્ટેમ્બર? જાણો બાપ્પાની વિદાયની સાચી તારીખ અને મુહૂર્ત
‘ગણપતિ બાપ્પા મોરિયા, અગલે બરસ તું જલ્દી આ…’ દસ દિવસ સુધી જેમના નાદથી ઘર, સોસાયટીઓ અને મોટા પંડાલો ભક્તિમય વાતાવરણમાં ગુંજી ઉઠ્યા છે, એવા વિઘ્નહર્તા દેવને વિદાય આપવાની ભાવનાત્મક ઘડી હવે એકદમ નજીક આવી ગઈ છે. બાપ્પાની સ્થાપના તો ધામધૂમથી થઈ ગઈ, પરંતુ ભક્તોના મનમાં આ વખતે એક મોટો પ્રશ્ન ઘૂમરાઈ રહ્યો છે—બાપ્પાનું વિસર્જન ૨૪ સપ્ટેમ્બરે કરવું કે ૨૫ સપ્ટેમ્બરે? જો તમે પણ આ તારીખની અસમંજસમાં છો અને સોશિયલ મીડિયા પર ફરતા મેસેજિસથી મૂંઝાઈ ગયા છો, તો પંચાંગની સચોટ ગણતરીએ આ કન્ફ્યુઝનનો સંપૂર્ણ અને સ્પષ્ટ ઉકેલ આપી દીધો છે.
૨૪ કે ૨૫ સપ્ટેમ્બર? સમજો તિથિનું ગણિત
વર્ષ ૨૦૨૬માં અનંત ચતુર્દશી અને મુખ્ય ગણેશ વિસર્જન માટે ૨૫ સપ્ટેમ્બર, શુક્રવારનો દિવસ જ ફાઇનલ ગણાશે. પંચાંગ અનુસાર, ચતુર્દશી તિથિ ૨૪ સપ્ટેમ્બરની રાત્રે લગભગ ૧૧:૧૮ વાગ્યે શરૂ થઈને ૨૫ સપ્ટેમ્બરની રાત્રે ૧૧:૦૬ વાગ્યા સુધી રહેવાની છે. સનાતન ધર્મમાં ‘ઉદયાતિથિ’ (સૂર્યોદય સમયે રહેલી તિથિ)ને વિશેષ મહત્વ આપવામાં આવે છે. ૨૫ સપ્ટેમ્બરે સૂર્યોદય સમયે ચતુર્દશી હાજર હોવાથી, અનંત ચતુર્દશીનો મુખ્ય પર્વ અને વિસર્જન આજ દિવસે માન્ય ગણાશે.
અમદાવાદ અને સુરતમાં વિસર્જનના શુભ મુહૂર્ત
અમદાવાદ અને સુરતમાં સ્થાનિક સૂર્યોદય સમયના આધારે ચોઘડિયાના મુહૂર્તોમાં થોડી મિનિટોનો ફેરફાર જોવા મળે છે. ૨૫ સપ્ટેમ્બર, ૨૦૨૬ ના રોજ આ સમયગાળામાં વિસર્જન કરવું શ્રેષ્ઠ રહેશે:
અમદાવાદ માટે (સૂર્યોદય ૦૬:૨૯, સૂર્યાસ્ત ૦૬:૩૩):
સવારનો સમય:૦૬:૨૯ થી ૧૧:૦૧ (ચર, લાભ અને અમૃત ચોઘડિયું)
બપોરનો સમય: ૧૨:૩૧ થી ૦૨:૦૨ (શુભ ચોઘડિયું)
સાંજનો સમય: ૦૫:૦૩ થી ૦૬:૩૩ (ચર ચોઘડિયું)
રાત્રિનો સમય: ૦૯:૩૨ થી ૧૧:૦૨ (લાભ ચોઘડિયું)
સુરત માટે (સૂર્યોદય ૦૬:૨૮, સૂર્યાસ્ત ૦૬:૩૨):
સવારનો સમય: ૦૬:૨૮ થી ૧૧:૦૦ (ચર, લાભ અને અમૃત ચોઘડિયું)
બપોરનો સમય: ૧૨:૩૦ થી ૦૨:૦૧ (શુભ ચોઘડિયું)
સાંજનો સમય: ૦૫:૦૨ થી ૦૬:૩૨ (ચર ચોઘડિયું)
રાત્રિનો સમય: ૦૯:૩૧ થી ૧૧:૦૧ (લાભ ચોઘડિયું)
વિદાયની શાસ્ત્રોક્ત વિધિ
બાપ્પાને જળમાં પધરાવતા પહેલાં ઉત્તરપૂજા કરવી ખૂબ જ આવશ્યક છે. ગણેશજીને કંકુનું તિલક કરી દૂર્વા, ફૂલ અને તેમના પ્રિય મોદક કે લાડુનો ભોગ અર્પણ કરો. પરિવાર સાથે આરતી કર્યા બાદ, દસ દિવસની પૂજામાં અજાણતા થયેલી ભૂલચૂક માટે બે હાથ જોડીને ક્ષમા યાચના કરો. જો પ્રતિમા નાની અને માટીની હોય તો ઘરે જ એક કુંડા કે પાણીના મોટા પાત્રમાં સ્વચ્છ જળ લઈને ઈકો-ફ્રેન્ડલી વિસર્જન કરવું ઉત્તમ છે. મોટી પ્રતિમાઓ માટે સ્થાનિક પ્રશાસન દ્વારા તૈયાર કરાયેલા કૃત્રિમ તળાવો અને ગાઇડલાઇન્સનું કડક પાલન કરવું જોઈએ.
પરિવારની સ્થાપિત પરંપરા અનુસાર દોઢ, ત્રણ, પાંચ કે સાતમા દિવસે પણ વિસર્જન કરી શકાય છે, પરંતુ અનંત ચતુર્દશીનું મુખ્ય વિસર્જન ૨૫ સપ્ટેમ્બરે જ રહેશે. અન્ય શહેરો માટે સ્થાનિક પંચાંગ મુજબ ચોઘડિયાના સમયમાં પાંચથી દસ મિનિટનો તફાવત હોઈ શકે છે.
27 સપ્ટેમ્બરે રવિવાર છતાં કેમ બેંક ખુલ્લી રહેશે?
જો તમારું કોઈ બેંકિંગ કાર્ય બાકી છે અને સપ્ટેમ્બરના અંતમાં સતત પાંચ દિવસ બેંકો ઠપ રહેવાના ડરથી તમે ચિંતિત છો, તો આ સમાચાર તમારા માટે સૌથી મોટા આશ્વાસન સમાન છે! આગામી ૨૮ થી ૩૦ સપ્ટેમ્બર દરમિયાન બેંક કર્મચારી યુનિયનો દ્વારા જાહેર કરાયેલી ત્રણ દિવસની દેશવ્યાપી હડતાળને ધ્યાનમાં રાખીને કેન્દ્ર સરકાર અને રિઝર્વ બેંક ઓફ ઈન્ડિયા (RBI) એ એક અભૂતપૂર્વ નિર્ણય લીધો છે. આગામી રવિવાર, ૨૭ સપ્ટેમ્બર ૨૦૨૬ના રોજ દેશની તમામ જાહેર ક્ષેત્રની બેંકો (PSBs) અને પ્રાદેશિક ગ્રામીણ બેંકો (RRBs) સામાન્ય કામકાજના દિવસની જેમ જ સંપૂર્ણ રીતે ખુલ્લી રહેશે. સરકારના આ પગલાથી આમ જનતાને હડતાળ પૂર્વે પોતાના મહત્વના નાણાકીય વ્યવહારો અને શાખા આધારિત કામકાજ આટોપી લેવાનો વધારાનો સમય મળી ગયો છે.
રવિવારે બેંકો ખુલ્લી રાખવા પાછળનું મુખ્ય કારણ
સપ્ટેમ્બરના અંતમાં ૨૬ સપ્ટેમ્બરે મહિનાનો ચોથો શનિવાર અને ૨૭ સપ્ટેમ્બરે રવિવાર હોવાથી બે દિવસની નિયમિત સપ્તાહાંત રજાઓ હતી. ત્યારબાદ ૨૮ થી ૩૦ સપ્ટેમ્બર સુધી યુનાઈટેડ ફોરમ ઓફ બેંક યુનિયન્સ (UFBU) દ્વારા ૩ દિવસની કામ રોકો હડતાળનું આહ્વાન કરવામાં આવ્યું છે. જો રવિવારે પણ બેંકો બંધ રહી હોત, તો ગ્રાહકો માટે સળંગ પાંચ દિવસ સુધી બેંકિંગ સેવાઓ સંપૂર્ણપણે ઠપ થઈ જાત. ગ્રાહકોની સુવિધા અને દેશના આર્થિક વ્યવહારો સળંગ જાળવી રાખવા માટે નાણાકીય સેવા વિભાગ (DFS) ની પહેલ પર RBI એ રવિવારે તમામ શાખાઓ, પ્રશાસનિક કાર્યાલયો, ATM-લિંક્ડ બ્રાન્ચો અને કરન્સી ચેસ્ટ પૂર્ણ ક્ષમતા સાથે ચાલુ રાખવા માટે વિશેષ મંજૂરી આપી છે.
બેંક કર્મચારીઓની મુખ્ય માગણીઓ શું છે?
બેંકિંગ ક્ષેત્રના આશરે ૯૦ ટકા કર્મચારીઓનું પ્રતિનિધિત્વ કરતા સંગઠન UFBU ના નેતૃત્વ હેઠળ કર્મચારીઓ હડતાળ પર જઈ રહ્યા છે. કર્મચારી યુનિયનોની મુખ્ય માગણીઓમાં ૫-ડે બેંકિંગ, પેન્શન અપડેશન, સમાન મોંઘવારી ભથ્થું (DA), OPS નો વિકલ્પ રજૂ કરવામાં આવ્યું છે.
અઠવાડિયામાં ૫ દિવસ કામકાજ (શનિ-રવિ રજા) ની વ્યવસ્થા ત્વરિત લાગુ કરવી. તમામ નિવૃત્ત કર્મચારીઓ અને પેન્શનરો માટે પેન્શન રકમમાં સુધારો કરવો. બધા પેન્શનરો માટે એકસમાન ડીએ ફોર્મ્યુલા અમલી બનાવવી. નેશનલ પેન્શન સિસ્ટમ (NPS) હેઠળ આવતા કર્મચારીઓને જૂની પેન્શન યોજના (OPS) પસંદ કરવાનો અધિકાર આપવો.
અર્ધવાર્ષિક ક્લોઝિંગ અને ગ્રાહકો માટે જરૂરી સલાહ
૩૦ સપ્ટેમ્બર એ બેંકિંગ ક્ષેત્ર માટે અર્ધવાર્ષિક ક્લોઝિંગ (Half-Yearly Closing) નો અત્યંત મહત્વપૂર્ણ દિવસ છે. આ દિવસે બેંકોમાં એકાઉન્ટ રિકન્સિલિએશન, પ્રોવિઝનિંગ અને ટ્રેઝરી ઓપરેશન્સ જેવા જટિલ કામકાજ થાય છે. હડતાળના કારણે આ કામગીરી ખોરવાઈ ન જાય તે માટે બેંકોએ ગ્રાહકોને રોકડ ઉપાડ અને ચેક ક્લિયરિંગ જેવા કામકાજ ૨૭ સપ્ટેમ્બર (રવિવાર) સુધીમાં જ પતાવી લેવા અપીલ કરી છે. આ ઉપરાંત, હડતાળ દરમિયાન રોકડ કે ફંડ ટ્રાન્સફર માટે UPI, ઈન્ટરનેટ બેંકિંગ, મોબાઈલ બેંકિંગ અને ATM જેવા ડિજિટલ માધ્યમોનો ઉપયોગ કરવા સલાહ આપવામાં આવી છે.
બંગાળની ખાડીમાં ‘ડીપ ડિપ્રેશન’નું ખૌફનાક રૂપ! તબાહીના સંકટ વચ્ચે આ બે રાજ્યમાં હાઈએલર્ટ જાહેર
બંગાળની ખાડીમાં આકાર લઈ રહેલું વાવાઝોડું ‘અર્નબ’ શું દરિયાકાંઠે તબાહી મચાવશે? છેલ્લા કેટલાક દિવસોથી ચાલી રહેલી આ અટકળો અને ચિંતાઓ વચ્ચે ભારતીય હવામાન વિભાગે (IMD) એક અત્યંત મહત્વનો અને સ્પષ્ટ ખુલાસો કર્યો છે. જોકે, આ ખુલાસા બાદ પણ ઓડિશા અને આંધ્ર પ્રદેશના લોકો માટે સંકટ સંપૂર્ણપણે ટળ્યું નથી! આ મજબૂત સિસ્ટમ ચક્રવાતમાં પરિણમશે નહીં, પરંતુ ‘ડીપ ડિપ્રેશન’ તરીકે બુધવારની રાત્રે જ કાલિંગપટ્ટનમ નજીક દરિયાકાંઠે ત્રાટકવા સજ્જ છે. પોતાની સાથે મુશળધાર વરસાદ, જળબંબાકાર અને 75 કિમી પ્રતિ કલાકની ઝડપે પવન લાવનારી આ પ્રણાલીને કારણે ઓડિશાના અનેક જિલ્લાઓમાં શાળાઓ બંધ કરી દેવાઈ છે અને રાહત ટીમોને હાઈએલર્ટ પર મૂકવામાં આવી છે.
IMD ના તાજેતરના સત્તાવાર બુલેટિન અનુસાર, પશ્ચિમ-મધ્ય અને ઉત્તર-પશ્ચિમ બંગાળની ખાડી પર સ્થિત આ ડીપ ડિપ્રેશન કલિંગપટ્ટનમથી આશરે 60 કિલોમીટર દક્ષિણ-પૂર્વમાં કેન્દ્રિત હતું. ધીમી ગતિએ આગળ વધી રહેલી આ સિસ્ટમ બુધવારની રાત્રે વિશાખાપટ્ટનમ અને ગોપાલપુર વચ્ચે દરિયાકાંઠો ઓળંગશે. વિશાખાપટ્ટનમ સ્થિત ડોપ્લર વેધર રડાર દ્વારા તેની પલેપલની ગતિવિધિ પર કડક નજર રાખવામાં આવી રહી છે. કાંઠે પહોંચતી વખતે તે સાયક્લોન બનવાને બદલે ડીપ ડિપ્રેશનનું જ સ્વરૂપ જાળવી રાખશે, જેથી આ સિસ્ટમ ‘અર્નબ’ ચક્રવાત તરીકે ઓળખાશે નહીં.
સિસ્ટમ વાવાઝોડું ન બનવા છતાં તેની અસરો અત્યંત ખતરનાક નીવડી શકે છે. હવામાન વિભાગે આજે અને આવતી કાલ માટે દક્ષિણ ઓડિશા અને ઉત્તર તટીય આંધ્ર પ્રદેશમાં અત્યંત ભારે વરસાદનું ‘રેડ એલર્ટ’ આપ્યું છે. ગંજામ, ગજપતિ, રાયગડા અને કોરાપુટ જેવા વિસ્તારોમાં પૂર અને ભૂસ્ખલનની ભીતિ સેવાઈ રહી છે. આ ગંભીરતાને ધ્યાનમાં રાખીને ઓડિશા સરકારે સંવેદનશીલ જિલ્લાઓમાં શાળાઓ બંધ રાખવાનો નિર્ણય લીધો છે. આંધ્ર પ્રદેશ અને યાનમમાં 55 થી 65 કિમી અને ઝાટકા સાથે 75 કિમી/કલાકની ઝડપે પવન ફૂંકાઈ શકે છે.
24 સપ્ટેમ્બરની સાંજ સુધી બંગાળની ખાડીમાં દરિયાઈ પરિસ્થિતિ અત્યંત જોખમી રહેવાની હોવાથી ઓડિશા, આંધ્ર પ્રદેશ અને પશ્ચિમ બંગાળના માછીમારોને દરિયામાં ન ખેડાવાની કડક સૂચના અપાઈ છે. કોઈપણ આપાતકાલીન સ્થિતિને પહોંચી વળવા NDRF અને ODRAF ની ટીમો તૈનાત છે. હાલ મુખ્ય ધ્યાન ચક્રવાતના નામ પર નહીં, પરંતુ ભારે વરસાદ અને પૂરના સંકટ સામે સાવચેતી રાખવા પર છે.
