ભરૂચ જિલ્લાના વાગરા GIDCમાં આવેલી સેનઝીલ ફાર્માકેમ પ્રા. લિ. કંપનીમાં શુક્રવારે મોડી રાત્રે મોટી દુર્ઘટના સર્જાઈ હતી. કંપનીમાં 15 હજાર લિટરની ક્ષમતાવાળા રિએક્ટરમાં પ્રચંડ વિસ્ફોટ થતાં 5 શ્રમિકોનાં ઘટનાસ્થળે જ મોત નીપજ્યાં હતાં, જ્યારે અન્ય 6 શ્રમિકો ગંભીર રીતે ઘાયલ થયા હતા. ઘટનાને પગલે સમગ્ર વિસ્તારમાં અફરાતફરી અને ભયનો માહોલ સર્જાયો હતો.
15 કિમી સુધી સંભળાયો ધડાકાનો અવાજ
પ્રાથમિક માહિતી અનુસાર, રાસાયણિક પ્રક્રિયા દરમિયાન રિએક્ટરમાં અચાનક બ્લાસ્ટ થયો હતો. વિસ્ફોટ એટલો જોરદાર હતો કે આસપાસનો વિસ્તાર ધ્રૂજી ઊઠ્યો હતો અને અંદાજે 15 કિલોમીટર દૂર સુધી ધડાકાનો અવાજ સંભળાયો હતો. અવાજ સાંભળીને આસપાસના લોકો ઘરની બહાર દોડી આવ્યા હતા.
બ્લાસ્ટની તીવ્રતાને કારણે ફેક્ટરીની મશીનરીને ભારે નુકસાન થયું હતું અને શેડના પણ ટુકડા થઈ ગયા હતા. રિએક્ટરમાં વિસ્ફોટ બાદ ગેસ ગળતરની આશંકાને કારણે સ્થાનિકોમાં ચિંતા ફેલાઈ હતી.
ઘાયલોને હોસ્પિટલમાં ખસેડાયા
દુર્ઘટનામાં ગંભીર રીતે ઘાયલ થયેલા 6 શ્રમિકોને સારવાર માટે ભરૂચની એપેક્સ હોસ્પિટલમાં ખસેડવામાં આવ્યા છે. જ્યારે મૃતક શ્રમિકોના મૃતદેહોને ભરૂચ સિવિલ હોસ્પિટલમાં લઈ જવામાં આવ્યા હતા. આ દુર્ઘટનાને પગલે કંપની અને આસપાસના વિસ્તારમાં શોકનો માહોલ છવાઈ ગયો છે.
