ગુજરાતમાંથી ચોમાસાની વિદાયના એંધાણ વચ્ચે શું ઓક્ટોબરમાં મેઘરાજા ફરી ધમાકેદાર વાપસી કરશે? જાણીતા હવામાન નિષ્ણાત અંબાલાલ પટેલે ઓક્ટોબર મહિનાને લઈને એક મહત્વપૂર્ણ આગાહી કરી છે, જેણે રાજ્યભરના ખેડૂતો અને નાગરિકોની ચિંતામાં વધારો કર્યો છે.
અંબાલાલ પટેલના જણાવ્યા મુજબ, ઓક્ટોબરની શરૂઆતમાં બંગાળની ખાડીમાં વરસાદના કોઈ વિશેષ અણસાર નથી, પરંતુ ૧૦ ઓક્ટોબર બાદ હવામાનમાં મોટો પલટો આવી શકે છે. ઓક્ટોબરના બીજા સપ્તાહમાં બંગાળના ઉપસાગરમાં હલચલ જોવા મળશે, જેના કારણે હવાનું હળવું દબાણ સર્જાશે. ખાસ કરીને ૧૬ અને ૧૭ ઓક્ટોબર દરમિયાન રાજ્યમાં ભારે પવનો ફૂંકાવાની અને વાતાવરણમાં ઉથલપાથલ થવાની પૂરી સંભાવના છે. જો આ સિસ્ટમ ઓમાન તરફ ન જાય, તો ગુજરાતના હવામાન પર તેની સીધી અસર પડશે અને કમોસમી વરસાદી ઝાપટાં ત્રાટકી શકે છે.
બીજી તરફ, હવામાન વિભાગની તાજેતરની આગાહી અનુસાર ૨ થી ૪ ઓક્ટોબર દરમિયાન ગુજરાતમાં વરસાદની કોઈ સંભાવના નથી અને આ સમયગાળામાં રાજ્યભરમાં હવામાન મુખ્યત્વે શુષ્ક રહેશે. જોકે, આ દરમિયાન આકરી ગરમી અને બફારાનું પ્રમાણ વધુ રહેશે. હસ્ત નક્ષત્રની વિદાય અને મધ્ય ઓક્ટોબરમાં સર્જાનારી સંભવિત માવઠાની સ્થિતિને ધ્યાનમાં રાખીને ખેડૂતોએ પોતાના પાકની સુરક્ષા માટે અત્યારથી જ આગોતરી તૈયારીઓ અને સાવચેતી રાખવી અનિવાર્ય છે.
