મુંબઈના બાંદ્રા કુર્લા કોમ્પ્લેક્સમાં આવેલા નીતા મુકેશ અંબાણી કલ્ચરલ સેન્ટરમાં વડાપ્રધાન નરેન્દ્ર મોદીના કાર્યક્રમ પહેલાં સુરક્ષામાં મોટો ભંગ થયાની ઘટના નોંધાઈ છે. ઘટનાસ્થળેથી બે શંકાસ્પદોની પીએમઓ ઓફિસના આઈડી તથા બંદૂક સાથે અટકાયત કરવામાં આવી છે.
આજે વડા પ્રધાન નરેન્દ્ર મોદી નીતા મુકેશ અંબાણી કલ્ચરલ સેન્ટર ખાતે ગ્લોબલ ફિનટેક ફેસ્ટનું ઉદ્ઘાટન કરવાના છે. એ સ્થળેથી બે વ્યક્તિઓની અટકાયત કરવામાં આવી છે. તેમાંથી એકે પોતાને વડા પ્રધાન કાર્યાલયના અધિકારી તરીકે ઓળખાવ્યા હોવાનો આરોપ છે. અટકાયત કરાયેલ વ્યક્તિની ઓળખ 24 વર્ષીય રોહન પારેખ તરીકે થઈ છે. સૂત્રોના જણાવ્યા અનુસાર, પારેખ પાસે નકલી PMO ઓળખપત્ર હતું, જે સુરક્ષા કર્મચારીઓએ તપાસ કરતાં નકલી હોવાનું જણાયું હતું.
સૂત્રોએ એમ પણ જણાવ્યું હતું કે પારેખ સાથે એક બોડીગાર્ડ પણ હતો જે બંદૂકથી સજ્જ હતો. મુંબઈ ક્રાઈમ બ્રાન્ચ આ મામલાની વધુ તપાસ કરી રહી છે. ગ્લોબલ ફિનટેક ફેસ્ટની સાતમી આવૃત્તિ 8 થી 11 સપ્ટેમ્બર, 2026 દરમિયાન મુંબઈમાં યોજાઈ રહી છે. GFF 2026 ની થીમ “પોટેન્શિયલ ટુ ઇમ્પેક્ટ: એજન્ટિક AI, ટોકનાઇઝેશન, ક્વોન્ટમ – ટ્રસ્ટેડ, કનેક્ટેડ, ગ્લોબલ સિસ્ટમ્સ ફોર ઇન્ક્લુઝિવ ફાઇનાન્સ” છે.
