કેક, ફુગ્ગા અને ‘હેપ્પી બર્થડે’… આ કોઈ બાળકની બર્થડે પાર્ટી નથી, પરંતુ ભેંસ ‘બસંતી’ના ચોથા જન્મદિવસની ઉજવણી છે! ઉત્તર પ્રદેશના બલિયા જિલ્લામાં એક વ્યક્તિએ પોતાની પાળેલી ભેંસને પરિવારના સભ્યની જેમ માન આપીને તેનો જન્મદિવસ એવી ધામધૂમથી ઉજવ્યો કે તેનો વીડિયો હવે સોશિયલ મીડિયા પર ચર્ચાનો વિષય બન્યો છે.
બલિયાના બડગાંવ ગામમાં રાજેશ કુમાર વર્માએ પોતાની પાળેલી ભેંસ ‘બસંતી’નો ચોથો જન્મદિવસ અનોખી રીતે ઉજવ્યો હતો. મંગળવારે રાત્રે યોજાયેલી આ ઉજવણી માટે ઘર અને આસપાસનો વિસ્તાર રંગબેરંગી ફુગ્ગાઓથી સજાવવામાં આવ્યો હતો. બસંતીને પણ આ ખાસ પ્રસંગ માટે તૈયાર કરવામાં આવી હતી. તેના ગળામાં ફૂલોની માળા પહેરાવવામાં આવી હતી અને માથા પર ‘હેપ્પી બર્થડે’ લખેલી કેપ મૂકવામાં આવી હતી.
આ પાર્ટીમાં એક નહીં પરંતુ બે કેક રાખવામાં આવી હતી. ગામના લોકોની હાજરીમાં કેક કાપવામાં આવી અને લોકોએ તાળીઓ પાડીને ‘હેપ્પી બર્થડે બસંતી’ કહીને તેને શુભેચ્છા પાઠવી હતી. ત્યારબાદ રાજેશ વર્માએ બસંતીને કેકના ટુકડા અને કેળા ખવડાવ્યા હતા. ઉજવણીમાં ગ્રામજનોએ પણ ઉત્સાહપૂર્વક ભાગ લીધો હતો.
રાજેશ કુમાર વર્માનું કહેવું છે કે બસંતી તેમના માટે માત્ર પશુ નથી, પરંતુ પરિવારના એક સભ્ય જેવી છે. તેના પ્રત્યેનો પ્રેમ વ્યક્ત કરવા માટે તેમણે તેનો જન્મદિવસ પણ પરિવારના સભ્યની જેમ ઉજવવાનું નક્કી કર્યું હતું. તેમણે જણાવ્યું કે બસંતી તેમની વાત સમજે છે અને તેમની સાથે ખાસ લાગણીનું જોડાણ છે.
આ સમગ્ર ઉજવણીનો વીડિયો સોશિયલ મીડિયા પર વાયરલ થયા બાદ લોકોનું ધ્યાન બસંતી તરફ ખેંચાયું છે. ઘણા લોકો રાજેશના પશુપ્રેમની પ્રશંસા કરી રહ્યા છે, જ્યારે આ અનોખી બર્થડે પાર્ટી લોકોમાં ઉત્સુકતા અને ચર્ચાનું કારણ બની છે.
