પશ્ચિમ બંગાળના મુર્શિદાબાદમાં 16 વર્ષના ઇકબાલ શેખની જિંદગી જાણે પાણી સાથે જ બંધાઈ ગઈ છે. છેલ્લા લગભગ પાંચ વર્ષથી તે દિવસ-રાતનો મોટો ભાગ તળાવના પાણીમાં પસાર કરે છે. કારણ એવું છે કે, તેના કહેવા મુજબ, પાણીની બહાર આવતા જ આખા શરીરમાં અસહ્ય બળતરા શરૂ થઈ જાય છે. આ અનોખી સ્થિતિને કારણે તે સામાન્ય જીવન, અભ્યાસ અને મિત્રો સાથે રમી પણ શક્તો નથી .
ઇકબાલ મુર્શિદાબાદના બેલડાંગા વિસ્તારનો રહેવાસી અનેક દિવસો સુધી તળાવમાં રહે છે અને ક્યારેક પાણીમાં જ ભોજન પણ કરે છે. પરિવાર તથા સ્થાનિક લોકો તેને પાણીમાં જ ખાવાનું પહોંચાડે છે. પાણીની બહાર આવતાં શરીરમાં આગ જેવી બળતરા થતી હોવાનો તેનો દાવો છે, જ્યારે પાણીમાં જતા તેને રાહત મળે છે.
આ સ્થિતિ અંગે ઇકબાલનું માનવું છે કે તેને ભૂતનો વડગાડ હોવાથી તે પાણીની બહાર રહી શકતો નથી, જોકે આવી માન્યતાઓને તબીબી પુરાવાનો આધાર મળ્યો નથી. અહેવાલો પ્રમાણે, તબીબી નિષ્ણાતોએ ચામડી અથવા અન્ય શારીરિક સમસ્યાની શક્યતા વ્યક્ત કરી છે, પરંતુ ઇકબાલને ચોક્કસ કઈ બીમારી છે તેની પુષ્ટિ થઈ નથી.
તબીબી રીતે, પાણીના સંપર્ક સાથે ખંજવાળ, ચુભન અથવા બળતરા જેવી લાગણી થતી Aquagenic Pruritus નામની સ્થિતિ જાણીતી છે. Cleveland Clinic અને DermNet અનુસાર, કેટલાક દર્દીઓમાં પાણીના સંપર્ક પછી અત્યંત તીવ્ર બળતરા અથવા ખંજવાળ થઈ શકે છે; ક્યારેક તેનું કારણ અન્ય બીમારી સાથે પણ સંકળાયેલું હોઈ શકે છે. જોકે, ઇકબાલને આ જ સ્થિતિ છે એવું હાલમાં કહેવું યોગ્ય નથી.
પરિવારની આર્થિક મુશ્કેલીઓ સારવારમાં અડચણ બની રહી છે. લાંબા સમય સુધી પાણીમાં રહેવાને કારણે ઇકબાલને અન્ય શારીરિક તકલીફો થવાની ચિંતા પણ ઊભી થઈ છે. હવે સૌથી મહત્વનું એ છે કે તેને યોગ્ય તબીબી તપાસ અને નિષ્ણાત સારવાર મળે, જેથી આ પાંચ વર્ષ જૂની સમસ્યાનું સાચું કારણ જાણી શકાય.
