મહારાષ્ટ્રમાં ખાદ્ય સુરક્ષાને લઈને છેલ્લા કેટલાક અઠવાડિયાથી સતત કડક કાર્યવાહી થઈ રહી છે અને આ સમગ્ર અભિયાનના કેન્દ્રમાં છે IAS અધિકારી તુકારામ મુન્ઢે. ભેળસેળયુક્ત ખાદ્યપદાર્થો, ગેરકાયદે ગુટખા, હોટલોમાં સ્વચ્છતા અને ગ્રાહકોના અધિકારો અંગે તેમણે લીધેલા નિર્ણયો બાદ તેઓ ફરી એકવાર દેશભરમાં ચર્ચાનો વિષય બન્યા છે.
મહારાષ્ટ્રના બીડ જિલ્લાના તાડસોના ગામના તુકારામ હરીભાઉ મુન્ઢે મહારાષ્ટ્ર કેડરના 2005 બેચના IAS અધિકારી છે. ખેડૂત પરિવારમાં ઉછરેલા મુન્ઢેએ ઇતિહાસમાં સ્નાતક અને રાજકીય વિજ્ઞાનમાં અનુસ્નાતક અભ્યાસ પૂર્ણ કર્યા બાદ UPSC પરીક્ષા પાસ કરી ભારતીય વહીવટી સેવામાં સ્થાન મેળવ્યું.
સરકારી સેવામાં તેમણે જિલ્લા કલેક્ટર, મ્યુનિસિપલ કમિશનર અને વિવિધ મહત્વપૂર્ણ વહીવટી પદો પર કામગીરી કરી છે. કડક શિસ્ત, નિયમોના નિષ્પક્ષ અમલ અને ભ્રષ્ટાચાર સામે ઝીરો ટોલરન્સના અભિગમને કારણે તેમની ઘણી વખત બદલી કરવામાં આવી હોવાના અહેવાલો પણ સામે આવ્યા છે. તેમ છતાં તેમણે દરેક જવાબદારીમાં કાયદાના અમલને પ્રથમ પ્રાથમિકતા આપી છે.
મે 2026માં મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA)ના કમિશનર તરીકે ચાર્જ સંભાળ્યા બાદ મુન્ઢેએ રાજ્યવ્યાપી વિશેષ અભિયાન શરૂ કર્યું. તેમના નેતૃત્વમાં ભેળસેળયુક્ત ખાદ્યપદાર્થો, પ્રતિબંધિત ગુટખા અને પાન મસાલા સામે વ્યાપક દરોડા પાડવામાં આવ્યા. સાથે જ હોટલ અને રેસ્ટોરન્ટમાં ગ્રાહકોને મફત અને સ્વચ્છ પીવાનું પાણી ઉપલબ્ધ કરાવવું, સ્વચ્છતા જાળવવી અને ખાદ્ય સુરક્ષા નિયમોનું કડક પાલન કરાવવાની સૂચનાઓ આપવામાં આવી છે.
તાજેતરમાં એનાલોગ પનીર સહિતના ભેળસેળયુક્ત ખાદ્ય ઉત્પાદનો સામે પણ FDAએ કડક કાર્યવાહી શરૂ કરી છે. ગ્રાહકોના આરોગ્યને પ્રાથમિકતા આપતા તેમના નિર્ણયો અને નિયમોના સમાન અમલને કારણે તુકારામ મુન્ઢેને મહારાષ્ટ્રના સૌથી કડક અને ચર્ચિત IAS અધિકારીઓમાં ગણવામાં આવે છે.
