સુરત ગ્રામ્ય પોલીસે ગેરકાયદેસર રીતે ભારતમાં રહેતા વિદેશી નાગરિકો સામે ચાલી રહેલા ‘ઓપરેશન ડેલ્ટા હન્ટ’ અંતર્ગત થોડા દિવસ પહેલાં ઝડપાયેલા 16 બાંગ્લાદેશી નાગરિકોને કાયદેસરની પ્રક્રિયા પૂર્ણ કર્યા બાદ તેમના વતન બાંગ્લાદેશ પરત મોકલી દીધા છે.
પોલીસ તપાસ મુજબ આ તમામ વિદેશી નાગરિકો પશ્ચિમ બંગાળથી ગેરકાયદેસર આવી છેલ દોઢ વર્ષથી જિલ્લામાં છૂટક મજૂરી કરીને રહેતા હતા.
ઝડપાયેલા લોકોમાં 12 મહિલાઓ, 3 પુરુષો અને એક નાની બાળકીનો સમાવેશ થાય છે. સુરત જિલ્લાના વિવિધ પોલીસ સ્ટેશન વિસ્તારોમાં સ્થાનિક પોલીસ, એસઓજી અને એલસીબીની ટીમોએ સંયુક્ત તપાસ અભિયાન ચલાવ્યું હતું. તપાસ દરમિયાન તેમની ઓળખ, દસ્તાવેજો અને અન્ય પુરાવાના આધારે તેઓ બાંગ્લાદેશી નાગરિક હોવાનું સામે આવ્યું હતું.
પોલીસે તેમની બેંકિંગ વિગતો, મોબાઇલ રેકોર્ડ, ઓળખપત્રો અને બાંગ્લાદેશ સાથેના સંપર્કોની વિગતવાર તપાસ કર્યા બાદ કાયદાકીય કાર્યવાહી હાથ ધરી હતી. સુરત ગ્રામ્ય એસઓજીના પીઆઈ એલ. જી. ઓડેદરાના જણાવ્યા મુજબ, જિલ્લામાં ગેરકાયદેસર રીતે વસવાટ કરતા બાંગ્લાદેશી નાગરિકોને શોધી કાઢવા માટેનું અભિયાન હજુ પણ સતત ચાલુ છે અને આગામી દિવસોમાં પણ આવી કાર્યવાહી ચાલુ રહેશે.
