અમેરિકાના પ્રમુખ ડોનાલ્ડ ટ્રમ્પને આંચકો આપતાં એક નિર્ણયમાં સુપ્રીમ કોર્ટે મહિલા લેખિકા ઈ. જીન કેરોલના જાતીય શોષણના કેસમાં પાંચ મિલિયન ડોલરનું વળતર આપવાના જ્યુરીના નિર્ણયને ફગાવી દેવાની ટ્રમ્પની અરજીને નકારી કાઢી છે. જ્યુરીએ તેના ચુકાદામાં જણાવ્યું હતું કે, 90ના દાયકામાં મેનહટ્ટનના એક ડિપાર્ટમેન્ટલ સ્ટોરમાં ટ્રમ્પે મહિલા લેખિકા ઈ. જીન કેરોલનું જાતીય શોષણ કર્યું હતું અને બાદમાં તેને બદનામ કરી હતી.
ટ્રમ્પના વકીલોએ દલીલ કરી હતી કે, પાંચ મિલિયન ડોલરનું વળતર આપવાના નિર્ણયમાં પુરાવાના નિયમોનું ઉલ્લંઘન થયું હતું, પરંતુ અદાલતે કોઈ કારણ આપ્યા વિના આ કેસ હાથ ધરવાનો ઇનકાર કર્યો. આ કેસમાં ટ્રમ્પ પર જાતીય શોષણનો આરોપ મુકનાર અન્ય બે મહિલાઓની જુબાનીને પણ પુરાવા તરીકે ગણવામાં આવી હતી, જેની સામે ટ્રમ્પે વાંધો ઉઠાવ્યો હતો.
ટ્રમ્પના વકીલોએ દલીલ કરતાં જણાવ્યું હતું કે,આ કેસમાં ન્યાયાધીશે પુરાવા સંબંધી ફેડરલ નિયમોની અવગણના કરી છે. જોકે આ ચુકાદો ટ્રમ્પ ફરીથી વ્હાઇટ હાઉસમાં સત્તા પર પર આવ્યા તે પહેલાં આવી ગયો હતો, છતાં વકીલોએ તેને રાષ્ટ્રપતિ તરીકેની તેમની વિશિષ્ટ ફરજોમાં વિક્ષેપ સમાન ગણાવ્યો હતો.
અદાલતી દસ્તાવેજોમાં વકીલ જસ્ટિન ડી. સ્મિથે નોંધ્યું હતું કે, એક રાષ્ટ્રપતિ પ્રત્યેના આવા દુર્વ્યવહારને ના ચલાવી લેવાય.ટ્રમ્પની નીતિઓ સાથે સંકળાયેલા સહિતના મહત્વના કેસોમાં અભિપ્રાયો આપી રહેલી સુપ્રીમ કોર્ટનો આ આ નિર્ણય અમેરિકાના રાષ્ટ્રપ્રમુખ માટે વધુ એક ફટકા સમાન બની રહેશે. ટ્રમ્પ અગાઉ પણ સુપ્રીમ કોર્ટમાં અન્ય કેસોમાં પોતાની હાર અંગે આક્રોશ વ્યક્ત કરી ચૂક્યાં છે. જેમાં કટોકટીની સત્તાઓ આપતા કાયદા હેઠળ તેમણે લાદેલા વૈશ્વિક ટેરિફને સર્વોચ્ચ અદાલતે ફગાવ્યો ત્યારે કરવામાં આવેલી અસાધારણ અને વ્યક્તિગત ટીકાનો સમાવેશ થાય છે.
ફેડ રિઝર્વના ગવર્નર લીઝા કૂકની હકાલપટ્ટી અટકી
સુપ્રીમ કોર્ટે સોમવારે રાષ્ટ્રપ્રમુખની સત્તાનો વ્યાપ વધારતા, સ્વતંત્ર સરકારી એજન્સીઓના વડાઓને બરતરફ કરવાના ડોનાલ્ડ ટ્રમ્પના નિર્ણયને લીલી ઝંડી આપી છે. જોકે સુપ્રીમે અપવાદ રૂપે ફેડરલ રિઝર્વના ગવર્નર લીઝા કૂકને હાંકી કાઢવાના નિર્ણયને હાલ પૂરતો મોકૂફ રાખ્યો છે. દેશની મધ્યસ્થ બેન્ક સિવાય તમામ સંસ્થાઓના વડાઓને પદ પરથી હાંકી કાઢવા માટે રાષ્ટ્રપ્રમુખને સંપૂર્ણ સત્તા હોવાનું સુપ્રીમ કોર્ટે જણાવ્યું હતું.
