વડોદરા અને સુરત મહાનગરપાલિકાની કચેરીઓને બોમ્બથી ઉડાવી દેવાની ધમકીભર્યો ઈ-મેઇલ મળતા તંત્રમાં દોડધામ મચી ગઈ છે. પ્રાપ્ત માહિતી મુજબ વડોદરા મહાનગરપાલિકાના મ્યુનિસિપલ કમિશનર અને મેયરના સત્તાવાર ઈ-મેઇલ પર ધમકીભર્યો સંદેશ મોકલવામાં આવ્યો હતો.
ધમકી મળતાની સાથે જ પોલીસ અને સુરક્ષા એજન્સીઓ સતર્ક બની ગઈ હતી. બોમ્બ સ્કવોડ, ડોગ સ્કવોડ તેમજ અન્ય સુરક્ષા ટીમોને તાત્કાલિક સ્થળ પર મોકલી તપાસ શરૂ કરવામાં આવી હતી. સમગ્ર કચેરી પરિસરમાં સઘન ચેકિંગ હાથ ધરાયું છે.
બીજી તરફ સુરત મહાનગરપાલિકાની કચેરીને પણ બોમ્બથી ઉડાવી દેવાની ધમકી આપતો ઈ-મેઇલ મળ્યો હતો. સવારે ઈ-મેઇલ મળતા જ ઉચ્ચ અધિકારીઓ અને પોલીસ કાફલો તાત્કાલિક કચેરીએ પહોંચ્યો હતો. સુરક્ષા દળોએ સમગ્ર પરિસરની તપાસ હાથ ધરી છે.
પ્રાથમિક તપાસમાં કોઈ શંકાસ્પદ વસ્તુ મળી આવી હોવાની માહિતી સામે આવી નથી. જોકે સુરક્ષા એજન્સીઓ કોઈપણ સંભાવનાને અવગણવા તૈયાર નથી અને સમગ્ર મામલાની ગંભીરતાથી તપાસ કરી રહી છે.
ઉલ્લેખનીય છે કે સુરત શહેરમાં અગાઉ પણ આવા પ્રકારના ધમકીભર્યા અને ફેક ઈ-મેઇલ મળવાના બનાવો બની ચૂક્યા છે. હાલ સાયબર ક્રાઈમ પોલીસે ઈ-મેઇલ મોકલનારની ઓળખ મેળવવા અને તેની પાછળના તત્વો સુધી પહોંચવા તપાસ શરૂ કરી છે.