ડોલર સામે રૂપિયો સતત ગગડ્યો: છઠ્ઠા સત્રમાં ફરી ઐતિહાસિક નીચલા સ્તરે પહોંચ્યો

ભારતીય રૂપિયામાં સતત નબળાઈ જોવા મળી રહી છે. ડોલર સામે રૂપિયો સતત છઠ્ઠા સત્રમાં ઘટ્યો છે. આજે રૂપિયો 96.37 પર ખુલ્યો હતો, જ્યારે અગાઉના સત્રમાં તે 96.35 પર બંધ થયો હતો. ક્રૂડ ઓઇલના ભાવમાં ઘટાડો અને શેરબજારમાં શરૂઆતથી જ સુધારો જોવા મળ્યો હોવા છતાં રૂપિયામાં દબાણ યથાવત રહ્યું. સોમવારે ટ્રેડિંગ દરમિયાન રૂપિયો 96.39 સુધી ગગડી ગયો હતો, જે અત્યાર સુધીનો સૌથી નીચો સ્તર માનવામાં આવે છે.

2026માં રૂપિયો સૌથી નબળું એશિયન ચલણ બન્યો
રૂપિયામાં આ વર્ષે ભારે ઘટાડો નોંધાયો છે. 2026 દરમિયાન રૂપિયો એશિયાનું સૌથી નબળું પ્રદર્શન કરતું ચલણ બની ગયું છે. માત્ર આ મહિનામાં જ તેમાં 1.5 ટકા અને સમગ્ર વર્ષ દરમિયાન 7 ટકા કરતાં વધુનો ઘટાડો થયો છે. ઇન્ટરબેંક ફોરેન એક્સચેન્જ માર્કેટમાં રૂપિયો યુએસ ડોલર સામે 96.38 પર ખુલ્યો હતો અને ટ્રેડિંગ દરમિયાન વધુ ઘટીને 96.47 પ્રતિ ડોલરના સર્વકાલીન નીચા સ્તરે પહોંચી ગયો હતો. આ અગાઉના બંધની સરખામણીએ 27 પૈસાનો ઘટાડો દર્શાવે છે. સોમવારે રૂપિયો 96.20 પ્રતિ ડોલરના સ્તરે બંધ થયો હતો. બીજી તરફ, ડોલર ઇન્ડેક્સમાં પણ 0.03 ટકાનો ઘટાડો નોંધાઈ 99.16 પર આવી ગયો હતો.

રૂપિયો ફરી સર્વકાલીન નીચા સ્તરે પહોંચ્યો
રૂપિયામાં ઘટાડાનો સિલસિલો અટકતો નથી. સતત છઠ્ઠા દિવસે ઘટાડા સાથે રૂપિયો 96.47ના સર્વકાલીન નીચલા સ્તરે પહોંચી ગયો હતો. અગાઉ તેનો સૌથી નીચો સ્તર 96.3875 નોંધાયો હતો. સોમવારે ટ્રેડિંગ દરમિયાન પણ રૂપિયો આ સ્તરે તૂટી પડ્યો હતો. નિષ્ણાતોના મતે ઈરાન યુદ્ધ બાદથી અત્યાર સુધી રૂપિયામાં લગભગ 6 ટકાનો ઘટાડો નોંધાયો છે.

ડોલર સામે રૂપિયો 18 પૈસા નબળો પડ્યો
મંગળવારે શરૂઆતના કારોબારમાં રૂપિયો અમેરિકન ડોલર સામે 18 પૈસા ઘટીને 96.38 પર પહોંચ્યો હતો. અમેરિકા અને ઈરાન વચ્ચે વધતા તણાવને કારણે વૈશ્વિક બજારમાં અનિશ્ચિતતા વધી રહી છે. ફોરેક્સ ટ્રેડર્સના જણાવ્યા અનુસાર, ક્રૂડ ઓઇલના વધતા ભાવ અને હોર્મુઝ સ્ટ્રેટમાં ઉભી થયેલી પરિસ્થિતિના કારણે રૂપિયો વધુ સંવેદનશીલ બન્યો છે. ગલ્ફ દેશોમાંથી થતી આયાત અને નિકાસ પર પણ તેની અસર પડી રહી છે.

રૂપિયો કેમ સતત નબળો પડી રહ્યો છે?
LKP સિક્યોરિટીઝના કોમોડિટી અને કરન્સી રિસર્ચ એનાલિસ્ટ જતીન ત્રિવેદીએ જણાવ્યું હતું કે કાચા તેલના ભાવમાં સતત વધારો થવાથી રૂપિયામાં દબાણ વધી રહ્યું છે. બજારમાં રૂપિયા પ્રત્યેનો વ્યાપક મત નબળો છે અને રોકાણકારો સરકારના તેલના ભાવ ઘટાડવા તથા પુરવઠા નિયંત્રણ સંબંધિત પગલાં પર નજીકથી નજર રાખી રહ્યા છે. તેમના જણાવ્યા અનુસાર, રૂપિયાને 96.55ની આસપાસ સપોર્ટ મળી રહ્યો છે, જ્યારે તાત્કાલિક પ્રતિકાર 96 થી 96.10ની વચ્ચે જોવા મળી રહ્યો છે.