ગુજરાતી ફિલ્મ ‘લાલો કૃષ્ણ સદા સહાયતે’એ આંતરરાષ્ટ્રીય સ્તરે મોટું સિદ્ધિ હાંસલ કરીને ઈતિહાસ રચ્યો છે. આ ફિલ્મ પ્રતિષ્ઠિત કાન્સ ફિલ્મ ફેસ્ટિવલ સુધી પહોંચી છે અને આ સિદ્ધિ મેળવનારી પહેલી ગુજરાતી ફિલ્મ બની છે. ગુજરાતી સિનેમાને વૈશ્વિક ઓળખ અપાવનાર આ ફિલ્મે ભારતની સંસ્કૃતિ અને કથાને આંતરરાષ્ટ્રીય દર્શકો સુધી પહોંચાડવામાં સફળતા મેળવી છે.
ફિલ્મની આ ઐતિહાસિક સફળતા બાદ નિર્માતાઓએ ખુશી વ્યક્ત કરી હતી અને સમગ્ર સફરમાં સાથ આપનાર ચાહકોનો આભાર માન્યો હતો. ફિલ્મની ગ્લોબલ ઓળખને લઈને ગુજરાતી ફિલ્મ ઈન્ડસ્ટ્રીમાં પણ ઉત્સાહનો માહોલ જોવા મળી રહ્યો છે.
ફિલ્મના નિર્દેશક અંકિત સખિયા એ નિવેદનમાં જણાવ્યું હતું કે, “કાન્સ ફિલ્મ ફેસ્ટિવલમાં ‘લાલો’નું પહોંચવું અમારા માટે ગર્વની વાત છે. અમારી ભાષા, અમારી સંસ્કૃતિ અને આ ફિલ્મ અમને અહીં સુધી લાવી છે. ગુજરાત અને તેની સંસ્કૃતિના એક નાનકડા ભાગને વૈશ્વિક સ્તરે રજૂ કરવાનો મોકો મળવો એ સન્માનની વાત છે. અમને આશા છે કે આ ફિલ્મ ભાષાની સીમાઓ પાર કરીને લોકોના દિલ સુધી પહોંચશે.”
‘લાલો: કૃષ્ણ સદા સહાયતે’ એક આધ્યાત્મિક અને ભાવનાત્મક ગુજરાતી ડ્રામા ફિલ્મ છે, જેમાં રીવા રચ, શ્રુહદ ગૌસ્વામી અને કરણ જોશી મુખ્ય ભૂમિકામાં જોવા મળે છે. ફિલ્મ 9 જાન્યુઆરી 2026ના રોજ રિલીઝ થઈ હતી, જ્યારે બાદમાં 6 માર્ચે તે SonyLIV પર સ્ટ્રીમ કરવામાં આવી હતી.
માત્ર 50 લાખના બજેટમાં બનેલી આ ફિલ્મે બોક્સ ઓફિસ પર 100 કરોડથી વધુની કમાણી કરીને સૌને ચોંકાવી દીધા હતા. ગુજરાતી સિનેમામાં આ ફિલ્મે અનેક નવા રેકોર્ડ બનાવ્યા છે. હવે ફિલ્મ હિન્દીમાં પણ રિલીઝ થઈ ચૂકી છે અને અન્ય ભાષાના દર્શકોમાં પણ લોકપ્રિય બની રહી છે.
ફિલ્મની વાર્તા એક સામાન્ય રિક્ષાચાલકના જીવન પર આધારિત છે, જે જીવનમાં અનેક મુશ્કેલીઓનો સામનો કરે છે. ત્યારબાદ તેની જિંદગીમાં ભગવાન શ્રીકૃષ્ણની એન્ટ્રી થાય છે અને તેની સમગ્ર જિંદગી બદલાઈ જાય છે. આ અનોખી અને ભાવનાત્મક સ્ટોરીએ દર્શકોના દિલ જીતી લીધા છે.
‘લાલો: કૃષ્ણ સદા સહાયતે’એ ગુજરાતી ફિલ્મ ઈન્ડસ્ટ્રીમાં માત્ર ઈતિહાસ જ રચ્યો નથી, પરંતુ બોલિવુડ અને સાઉથ સિનેમાના અનેક રેકોર્ડને પણ પાછળ છોડી દીધા હોવાનું માનવામાં આવી રહ્યું છે.
