સુરત મહાનગરપાલિકાની આગામી ચૂંટણીને લઈને રાજકીય માહોલ ગરમાયો છે. આ દરમિયાન આમ આદમી પાર્ટીએ પોતાની નવમી યાદી જાહેર કરીને વિરોધી પક્ષોને ચોંકાવી દીધા છે. આ યાદીની સૌથી મોટી વિશેષતા એ છે કે પાર્ટીએ પોતાના કદાવર નેતા અને પ્રદેશ સંગઠન મહામંત્રી મનોજ સોરઠિયા ને ચૂંટણી જંગમાં ઉતાર્યા છે.
મનોજ સોરઠિયા સુરતના વોર્ડ નંબર 4 માંથી ઉમેદવારી નોંધાવશે. સુરતમાં પાર્ટીના પાયા મજબૂત કરવામાં તેમનો મોટો ફાળો રહ્યો છે, ત્યારે તેમની ઉમેદવારીથી આ બેઠક પરનો જંગ રસપ્રદ બનશે. આ સાથે જ પાર્ટીએ રણનીતિના ભાગરૂપે અગાઉ જાહેર કરેલા કેટલાક ઉમેદવારોના નામમાં ફેરફાર પણ કર્યો છે.
પાર્ટી દ્વારા પ્રાપ્ત માહિતી અનુસાર, સુરતના વોર્ડ નંબર 4 અને વોર્ડ નંબર 13 માં ઉમેદવારો બદલવામાં આવ્યા છે. નવા સમીકરણો મુજબ, વોર્ડ નંબર 4 માં હવે કુંદન કોઠિયાઅને વોર્ડ નંબર 13 માં સુશાંત કાપડિયાને ટિકિટ ફાળવવામાં આવી છે. સ્થાનિક સ્તરે કાર્યકરોના પ્રતિભાવો અને જીતના સમીકરણોને ધ્યાનમાં રાખીને આ મહત્વનો નિર્ણય લેવાયો હોવાનું મનાય છે. સુરત મનપામાં વિરોધ પક્ષ તરીકે મજબૂત પકડ ધરાવતી AAP આ વખતે સત્તા સુધી પહોંચવા માટે એડીચોટીનું જોર લગાવી રહી છે.
