ગુજરાતમાં લાંબા સમયથી જેની આતુરતાપૂર્વક રાહ જોવાઈ રહી હતી તે સ્થાનિક સ્વરાજ્યની ચૂંટણીઓનું ચિત્ર આખરે સ્પષ્ટ થઈ ગયું છે. રાજ્ય ચૂંટણી આયોગ દ્વારા આજે બુધવારે(1 એપ્રિલ, 2026) સાંજે ગાંધીનગર ખાતે યોજાયેલી પત્રકાર પરિષદમાં રાજ્યની 15 મહા નગરપાલિકા, 34 જિલ્લા પંચાયત અને 260 તાલુકા પંચાયતનો ચૂંટણી કાર્યક્રમ જાહેર કરી દેવામાં આવ્યો છે.
રાજ્ય ચૂંટણી કમિશનર એસ. મુરલીક્રિષ્નાએ જણાવ્યું કે, ગુજરાતની સ્થાનિક સ્વરાજ્યની ચૂંટણીનું મતદાન 26 એપ્રિલ 2026ના રોજ યોજાશે. જ્યારે મત ગણતરી 28 એપ્રિલ 2026ના રોજ હાથ ધરાશે. આ વખતની ચૂંટણીમાં ઓબીસી (OBC) અનામત બેઠકોના નવા રોટેશનનો અમલ કરાશે.
રાજ્યના મુખ્ય ચૂંટણી કમિશનરના જણાવ્યા અનુસાર મહાનગરપાલિકામાં કુલ 262 વોર્ડ, નપામાં 656 વોર્ડ, જિલ્લા પંચાયતમાં 1090 વોર્ડ, તાલુકા પંચાયતમાં 5234 વોર્ડ, નગરપાલકિાઓમાં 2624 વોર્ડમાં ચૂંટણી યોજાશે. તેમજ મતદાનનો સમય સવારે 7થી સાંજના 6 સુધીનો રહેશે. તેમજ જરૂર જણાશે તો 27 એપ્રિલના રોજ પુન:મતદાન હાથ ધરવામાં આવશે. તેમજ સમગ્ર ચૂંટણી પ્રક્રિયા 30 એપ્રિલના રોજ પૂર્ણ થશે.
નિર્ધારિત 14 ડોક્યુમેન્ટના આધારે મતદાન
આ ચૂંટણીમાં નિર્ધારિત 14 ડોક્યુમેન્ટના આધારે મતદાન કરવામાં આવશે. જેમાં મહાનગરપાલિકા- નગરપાલિકા માટે 23667 મલ્ટી ચોઈસ કંટ્રોલ યુનિટ અને 47102 બેલેટ યુનિટ, જિલ્લા અને તાલુકા પંચાયત માટે 23665 કંટ્રોલ યુનિટ અને 28841 બેલેટ યુનિટની વ્યવસ્થા કરવામાં આવી છે.
ગુજરાતમાં સ્થાનિક ચૂંટણીની જાહેરાત
- મનપા: 15 (જૂનાગઢ અને ગાંધીનગર સિવાય તમામ)
- જિલ્લા પંચાયત: 34
- તાલુકા પંચાયત: 260 (17 નવી તાલુકા પંચાયત સહિત)
- નગર પાલિકા: 84
- મતદારો: 4 કરોડ 18 લાખ 91 હજાર 700
- આચાર સંહિતા: આજથી અમલી
ચૂંટણી કાર્યક્રમ પર એક નજર
- રાજ્ય ચૂંટણી આયોગ દ્વારા જાહેર કરાયેલી વિગતો મુજબ ચૂંટણીનું શિડ્યુલ
- ચૂંટણીનું જાહેરનામું: 6 એપ્રિલ, 2026
- ઉમેદવારી ફોર્મ ભરવાની છેલ્લી તારીખ: 11 એપ્રિલ, 2026
- ફોર્મની ચકાસણી: 13 એપ્રિલ, 2026
- ઉમેદવારી ફોર્મ ખેંચવાની છેલ્લી તારીખ: 15 એપ્રિલ
- મતદાનની તારીખ: 26 એપ્રિલ, 2026
- મતગણતરી અને પરિણામ: 28 એપ્રિલ, 2026
કેટલી બેઠકો પર ચૂંટણી?
- 15 મહાનગરપાલિકા: 1044 બેઠકો
- 84 નગરપાલિકા: 2632 બેઠકો
- 260 તાલુકા પંચાયત: 5271 બેઠકો
- 34 જિલ્લા પંચાયત: 1092 બેઠકો
- કુલ બેઠકો: 10,039 બેઠકો
નવી મહાનગરપાલિકાઓમાં પ્રથમ વખત યોજાશે ચૂંટણી
ગુજરાત સરકારે હાલમાં જે 8 નવી નગરપાલિકાને ‘મહાનગરપાલિકા’નો દરજ્જો આપ્યો છે, ત્યાં પ્રથમ વખત કોર્પોરેશન સ્તરે મતદાન પ્રક્રિયા હાથ ધરાશે. જેમાં આણંદ-કરમસદ, ગાંધીધામ, મહેસાણા, મોરબી, નડિયાદ, નવસારી, પોરબંદર, સુરેન્દ્રનગર, અને વાપી શહેરનો સમાવેશ થાય છે. આ નવા રચાયેલા મ્યુનિસિપલ કોર્પોરેશનમાં વહીવટી માળખું બદલાયા બાદ આ પ્રથમ મોટી રાજકીય કસોટી છે, જેના પર સમગ્ર રાજ્યની નજર ટકેલી છે.
OBC અનામતનું નવું સમીકરણ
આ વખતની ચૂંટણીની સૌથી મોટી વિશેષતા ઓબીસી (OBC) અનામત બેઠકોનું નવું રોટેશન છે. ઝવેરી કમિશનના રિપોર્ટ બાદ અમલી બનેલી નવી જોગવાઈઓ મુજબ, આ વખતે જિલ્લા પંચાયત પ્રમુખની 7 બેઠકો OBC માટે અનામત રાખવામાં આવી છે. આ નવા જ્ઞાતિ સમીકરણો રાજકીય પક્ષો માટે નવી રણનીતિ ઘડવા મજબૂર કરશે.
વહીવટદારોના શાસનનો આવશે અંત
ઉલ્લેખનીય છે કે, રાજ્યની અનેક જિલ્લા અને તાલુકા પંચાયતોની મુદત પૂર્ણ થઈ ગઈ હોવા છતાં સીમાંકન અને અનામતના પ્રશ્નોને કારણે ચૂંટણીમાં વિલંબ થયો હતો. હાલમાં આ સંસ્થાઓમાં વહીવટદારો કાર્યરત છે. હવે ચૂંટણીની જાહેરાત થતાં જ રાજ્યમાં આચારસંહિતા લાગુ થઈ ગઈ છે અને લોકશાહી ઢબે નવા જનપ્રતિનિધિઓની પસંદગીનો માર્ગ મોકળો થશે.
