સુરતના જહાંગીરપુરા વિસ્તારમાં આવેલી જાનકી રેસિડેન્સીમાં સોસાયટીના મુદ્દે થયેલી નાની બોલાચાલી ભયાનક હુમલામાં ફેરવાઈ ગઈ હતી. ક્રિકેટ ટુર્નામેન્ટના આયોજન અંગે ચર્ચા દરમિયાન સોસાયટીના મેઇન્ટેનન્સ મુદ્દે ઉગ્ર વિવાદ સર્જાતા યુવાન પર હથોડાથી જીવલેણ હુમલો કરવામાં આવ્યો હતો. આ સમગ્ર ઘટનાનો વીડિયો પણ સામે આવ્યો છે, જેને જોઈને લોકોમાં ભયનો માહોલ ફેલાયો છે.
પોલીસ ફરિયાદ મુજબ, 22 માર્ચે રાત્રે લગભગ 11:30 વાગ્યે ચિરાગ કોસંબિયા મિત્રો સાથે ગાર્ડન પાસે ક્રિકેટ ટુર્નામેન્ટ અંગે ચર્ચા કરી રહ્યા હતા. તે દરમિયાન ભરત સુરતી ત્યાં આવી પહોંચ્યા અને મીટિંગ અંગે વાંધો ઉઠાવી બોલાચાલી શરૂ કરી હતી. બાદમાં તેમણે હિરેન બરોડિયા અને ડો. વિપુલ બરોડિયાને પણ સ્થળ પર બોલાવ્યા હતા.
વાતચીત દરમિયાન ભરત સુરતી સેન્ટીંગ કામમાં વપરાતો હથોડો લઈને આવ્યા અને ચિરાગના ગળાના ભાગે હુમલો કર્યો હતો. હુમલા દરમિયાન તેમણે ધમકીભર્યા શબ્દોમાં કહ્યું કે, “તારા નાટક વધી ગયા છે, આજે તને પતાવી જ નાખું.” આ દરમિયાન હિરેન બરોડિયા અને ડો. વિપુલ બરોડિયાએ પણ ઝપાઝપી કરી હતી. સોસાયટીના અન્ય રહેવાસીઓ વચ્ચે પડી બંને પક્ષોને અલગ પાડ્યા હતા.
આ બનાવ દરમિયાન હાજર રહેલા એક વ્યક્તિએ સમગ્ર ઘટનાનો વીડિયો બનાવ્યો હતો, જેમાં હુમલાની ક્ષણો સ્પષ્ટ જોવા મળે છે. વીડિયો જોઈ રહેલા લોકો, ખાસ કરીને બાળકો, ચીસો પાડતા જોવા મળે છે.
ઘટના બાદ ત્રણેય આરોપી સ્થળ પરથી ફરાર થઈ ગયા હતા. જોકે, પોલીસે તાત્કાલિક કાર્યવાહી કરીને ભરત સુરતી અને હિરેન બરોડિયાની ધરપકડ કરી છે, જ્યારે ડો. વિપુલ બરોડિયા હજુ ફરાર છે. પોલીસ દ્વારા તેમની શોધખોળ ચાલુ છે અને આગળની તપાસ હાથ ધરાઈ રહી છે.
