સુરત શહેરના ડિંડોલી વિસ્તારમાં મિત્રતા વચ્ચે ઉદ્ભવેલી નાની બોલાચાલી એક ભયાનક ઘટનામાં ફેરવાઈ ગઈ, જેમાં એક યુવાનનું મોત નીપજ્યું છે. આ બનાવને લઈને વિસ્તારમાં ચકચાર મચી ગઈ છે અને પોલીસ તંત્ર પણ સક્રિય બની ગયું છે. ડિંડોલી વિસ્તારમાં રહેતા યુવાનો વચ્ચે સામાન્ય બાબતે બોલાચાલી શરૂ થઈ હતી. વાત એટલી વધતી ગઈ કે, બંને પક્ષ વચ્ચે ઉગ્ર વાદવિવાદ સર્જાયો.
આ દરમિયાન મૃતક તરીકે ઓળખાયેલા આકાશ પાટીલ પોતાના મિત્રોને સમજાવી ઝઘડો શાંત કરાવવા પ્રયાસ કરી રહ્યો હતો. પરિસ્થિતિ કાબૂ બહાર જતી રહી અને આરોપી તરીકે ઓળખાયેલા રઘુવીરસિંહે ગુસ્સામાં આવી ચપ્પુ વડે આકાશ પર હુમલો કરી દીધો. અચાનક થયેલા આ હુમલાથી ત્યાં હાજર લોકો ગભરાઈ ગયા અને ગંભીર રીતે ઘાયલ આકાશને તરત જ સારવાર માટે હોસ્પિટલમાં ખસેડવામાં આવ્યો. પ્રાથમિક સારવાર બાદ આકાશને વધુ સારવાર માટે સુરત સિવિલ હોસ્પિટલ ખાતે લઈ જવામાં આવ્યો હતો. જ્યાં ડોક્ટરોએ તેની હાલત ગંભીર હોવાનું જણાવ્યું હતું. જોકે, ટૂંકી સારવાર બાદ આકાશ પાટીલનું મોત નીપજ્યું હતું.
આ ઘટનાની જાણ થતાં જ સુરત પોલીસે તાત્કાલિક હરકતમાં આવી હતી અને તપાસ શરૂ કરી હતી. ડિંડોલી પોલીસે ઝડપી કાર્યવાહી કરતા આરોપી મિત્ર રઘુવીરસિંહની ધરપકડ કરી લીધી છે. પોલીસ દ્વારા હત્યાનો ગુનો નોંધી આગળની કાયદેસરની કાર્યવાહી હાથ ધરવામાં આવી રહી છે. પ્રાથમિક તપાસમાં સામે આવ્યું છે કે, ઘટના સમયે આરોપી અને મૃતક વચ્ચે કોઈ જૂનો વેરઝેર નહોતો, પરંતુ તાત્કાલિક ગુસ્સામાં આવીને આ પગલું ભરાયું હતું. આ ઘટનાએ એક વખત ફરીથી બતાવ્યું છે કે, ક્ષણિક ગુસ્સો કેટલો ભયંકર પરિણામ આપી શકે છે. હાલ પોલીસ આ કેસમાં વધુ તપાસ કરી રહી છે, તેમજ ઘટનાની પાછળના અન્ય કોઈ કારણો છે કે નહીં તે અંગે પણ તપાસ હાથ ધરવામાં આવી છે.
