સુરતમાં એક મહિલા પાસે ગાંજો મળી આવ્યાની ઘટના સામે આવી છે. ચોકબજાર પોલીસની ટીમે ગાંજાના જથ્થા સાથે એક મહિલાને ઝડપી પાડી છે.પોલીસે 8.210 કિલોગ્રામ ગાંજાનો જથ્થો જપ્ત કર્યો છે.આરોપી મહિલા ઓરિસ્સાથી ગાંજાનો જથ્થો લાવી હોવાનું પોલીસ તપાસમાં સામે આવ્યું છે. પોલીસે મહિલા સામે ગુનો નોંધી કાયદેસરની કાર્યવાહી હાથ ધરી છે.
મળતી માહિતી મુજબ સુરતમાં ચોકબજાર પોલીસની ટીમે ભરીમાતા રોડ ફૂલવાડી ઝૂપડપટ્ટી પાસે આવેલા ઘરમાં રેડ કરી હતી. જ્યાંથી પોલીસે ઇજાઈના કાસમ નુરમોહમદ સંઘવાની (ઉ.31)ને ઝડપી પાડી હતી.પોલીસે તેની પાસેથી કુલ રુ. 4,10,500ની કિંમતનો 8.432 કિ.ગ્રા ગાંજાનો જથ્થો જપ્ત કર્યો હતો. પોલીસે તેની પૂછપરછ કરતા સામે આવ્યું હતું કે, તેને ઘણું બધું દેવું થઈ ગયું હતું. જેથી તે પોતે ટ્રેનમાં બેસીને ઓરિસ્સાના ભરમપુર ખાતે ગઈ હતી. જ્યાંથી મહિલાએ બુલ્લુ માલિયા નામના શખ્સ પાસેથી ગાંજો લાવીને સુરતમાં વેચાણ કરવાની હતી.
DCP રાઘવ જૈનએ જણાવ્યું હતું કે, પકડાયેલી મહિલા સિલાઈનું કામ કરે છે. થોડા મહિના અગાઉ જ તેના પતિનું અવસાન થયું છે. તેના પતિના ઓરિસ્સામાં સંપર્ક હતા.જેથી મહિલા ત્યાં જઈને ગાંજો લઈને આવી હતી. પોલીસે મહિલા સામે NDPS એક્ટ હેઠળ ગુનો નોંધીને કાયદેસરની કાર્યવાહી હાથ ધરી હતી. જોકે, મહિલાને પૈસાની જરુર હતી. જેથી મહિલાએ ઓરિસ્સાથી સુરત ગાંજો લઈને આવી હતી અને તેનો એજન્ડા એ હતો કે, આસપાસની ઝૂંપડપટ્ટી અને સ્લમ એરિયામાં નાની નાની માત્રામાં ગાંજો વહેચે અને વધુમાં વધુ પૈસા કમાઈ શકે.
