ભાવનગર રોડ પર જૂના રામજી મંદિર પાસે રહેતાં દંપતી શનિવારે બાઈકમાં બેસી જઈ રહ્યા હતા ત્યારે ભાવનગર હાઈવે પર પાછળથી ધસી આવેલાં ટ્રક ચાલકે ઠોકર મારી હતી. પત્નીની નજર સામે જ ટ્રકનું ટાયર આધેડના શરીર પર ફરી વળતાં ઘટના સ્થળે જ તેમણે દમ તોડી દીધો હતો.
વધુ વિગતો મુજબ,જૂના રામજી મંદિર પાસે રહેતા પ્રભાબેન હેમતભાઈ મકવાણા શનિવારે સાંજે તેમના પતિ હેમતભાઈ અમરશીભાઈ મકવાણાના બાઈક પાછળ બેસીને જઈ રહ્યા હતાં ત્યારે ભાવનગર હાઈવે પાસે પાછળથી ધસી આવેલાં ટ્રક ચાલકે જોરદાર ઠોકર મારતાં બાઈક સવાર પ્રભાબેન અને હેમતભાઈ બાઈક પરથી નીચે પટકાયા હતા. જેમાં પ્રભાબેનને શરીરે મૂંઢ ઈજા થઈ હતી જ્યારે હેમતભાઈના શરીર પર ટ્રક ફરી વળતાં તેમણે ઘટના સ્થળે જ દમ તોડી દીધો હતો.
બનાવને પગલે આજી ડેમ પોલીસનો કાફલો ઘટના સ્થળે દોડી આવ્યો હતો.મૃતક હેમતભાઈના પત્નીએ ટ્રક ચાલક મુકેશ કાબાભાઈ વિસાવડીયા વિરુદ્ધ ફરિયાદ નોંધાવતા પોલીસે ગુનો નોંધી ટ્રક ચાલકને ઝડપી પાડવા ચક્રો ગતિમાન કર્યા છે. આ ઘટનામાં જાણવા મળ્યું હતું કે, દંપતિ ભત્રિજીના સગપણની વાત માટે ત્રંંબા ગયું હતું.
