ઉત્તર અને મધ્ય ફિલિપાઇન્સમાં આવેલા ઉષ્ણકટિબંધીય તોફાન ‘ફેંગશેન’ના કારણે ઓછામાં ઓછા 7 લોકોના મોત થયા છે. તોફાનને કારણે 22,000 થી વધુ લોકોને પૂર અને ભૂસ્ખલન-સંભવિત વિસ્તારો છોડીને સુરક્ષિત સ્થળોએ જવાની ફરજ પડી છે. હવામાન આગાહી એજન્સીએ જણાવ્યું હતું કે ‘ફેંગશેન’ રવિવારે મોડી રાત્રે ઉત્તર ફિલિપાઇન્સના લુઝોનથી દક્ષિણ ચીન સમુદ્ર તરફ આગળ વધ્યું હતું અને આ સમય દરમિયાન આ વિસ્તારમાં 65 થી 80 કિલોમીટર પ્રતિ કલાકની ઝડપે પવન ફૂંકાયો હતો.
રોક્સાસ સિટીમાં પરિસ્થિતિ વધુ ખરાબ થઈ ગઈ છે
સરકારની આપત્તિ વ્યવસ્થાપન એજન્સીએ વાવાઝોડાને કારણે સાત લોકોના મોતની પુષ્ટિ કરી છે. તેમણે જણાવ્યું હતું કે મધ્ય કેપિઝ પ્રાંતના રોક્સાસ શહેરમાં ઊંચી ભરતી પછી પરિસ્થિતિ વધુ વણસી ગઈ હતી, જેના કારણે અનેક ગામોમાં પૂરની સ્થિતિ વધુ ખરાબ થઈ હતી. બચાવ કાર્યકરોએ લોકોને સલામત સ્થળે ખસેડ્યા હતા. મૃત્યુઆંક વધવાની શક્યતા છે.
હજારો લોકો બેઘર બન્યા
સરકારી આપત્તિ વ્યવસ્થાપન એજન્સી અનુસાર, રોક્સાસમાં પૂરના પાણીમાં ડૂબી જવાથી એક વ્યક્તિનું મૃત્યુ થયું હોવાના અહેવાલ છે, જ્યારે પૂર્વી ક્વેઝોન પ્રાંતના પિટોગો શહેરમાં એક ઝૂંપડી પર ઝાડ પડવાથી બે બાળકો સહિત પાંચ લોકોના મોત થયા છે. એજન્સીના જણાવ્યા અનુસાર, વાવાઝોડાને કારણે લગભગ 14,000 લોકો બેઘર થયા છે. ફેંગશેન દક્ષિણ ચીન સમુદ્રમાંથી વિયેતનામ તરફ આગળ વધવાની આગાહી છે.
