અર્જેન્ટિનાના સેન્ટિયાગો ડેલ એસ્ટેરો પ્રાંતમાં ગુરુવારે 5.7 તીવ્રતાનો ભૂકંપ આવ્યો હતો. યુનાઇટેડ સ્ટેટ્સ જિયોલોજિકલ સર્વે (USGS) મુજબ ભૂકંપ રાત્રે 21:37 વાગ્યે (UTC) આવ્યો, જેનું કેન્દ્ર ઉત્તર અર્જેન્ટિનાના એલ હોયો શહેરથી 29 કિલોમીટર પશ્ચિમમાં હતું.
ભૂકંપ ધરતીથી 571 કિલોમીટર (354 માઈલ)ની ઊંડાઈમાં હતો. તેનું કેન્દ્ર 27.064S અને 63.523W અક્ષાંશ–દેશાંશ પર નોંધાયું હતું. હાલ સુધી કોઈ પ્રકારના જાનમાલના નુકસાનની માહિતી મળી નથી.
આટલી ઊંડાઈમાં આવતાં ભૂકંપો ધરતીની સપાટી પર વ્યાપક વિનાશ સર્જવાની સંભાવના ઓછી હોય છે, પરંતુ મોટા વિસ્તારમાં તેને અનુભવી શકાય છે. USGS મુજબ આ ભૂકંપ નાઝ્કા પ્લેટ દક્ષિણ અમેરિકન પ્લેટની નીચે ધસતા (Subduction) પ્રક્રિયા સાથે સંકળાયેલો છે. આ વિસ્તાર ઊંડા અને શક્તિશાળી ભૂકંપીય ઘટનાઓ માટે જાણીતો છે. નાઝ્કા પ્લેટની નીચે ધસાવાથી ઉત્પન્ન થતો તાણ ઘણી વાર ધરતીની સપાટીથી સૈંકડો કિલોમીટર નીચે ભૂકંપનું કારણ બને છે.
ઇન્ડોનેશિયાના વેસ્ટ પાપુઆમાં 5.5 તીવ્રતાનો ભૂકંપ
ઇન્ડોનેશિયાના વેસ્ટ પાપુઆ વિસ્તારમાં પણ 5.5 તીવ્રતાનો ભૂકંપ આવ્યો હોવાનું યુએસ જિયોલોજિકલ સર્વે (USGS) એ પુષ્ટિ કરી છે. ભૂકંપનું કેન્દ્ર દક્ષિણ કિનારા નજીક હતું અને તેની ઊંડાઈ લગભગ 20 કિલોમીટર હતી. જોકે, જાનમાલના નુકસાનની કોઈ માહિતી નથી.
ઇન્ડોનેશિયાનું આ પ્રાંત “રિંગ ઓફ ફાયર” પર આવેલું છે, જેના કારણે આ વિસ્તારમાં ભૂકંપીય ઘટનાઓ સામાન્ય છે. અહીં ઇન્ડો-ઓસ્ટ્રેલિયન પ્લેટની ટેક્ટોનિક પ્રવૃત્તિ સતત સક્રિય રહે છે.
ફિલિપિન્સના સેબૂ કિનારે 6.9 તીવ્રતાનો ભૂકંપ, 72નાં મોત
તાજેતરમાં, દુનિયાના અલગ–અલગ ભાગોમાં ભૂકંપીય પ્રવૃત્તિ જોવા મળી છે. ફિલિપિન્સના સેબૂ કિનારે 30 સપ્ટેમ્બરે 6.9 તીવ્રતાનો ભૂકંપ આવ્યો હતો, જેનું કેન્દ્ર બોગો સિટી નજીક હતું. આ ભૂકંપ માત્ર 5 કિલોમીટરની ઊંડાઈમાં હોવાથી સપાટી પર ભારે અસર થઈ હતી.
ફિલિપિન્સમાં આ ભૂકંપના કારણે 72 લોકોનાં મોત થયા અને અનેક સો લોકો ઘાયલ થયા. ઘરો, હોસ્પિટલો અને પુલોને નુકસાન પહોંચ્યું. રસ્તાઓ, વીજળી અને અન્ય આધારીક માળખાં પર પણ ભારે અસર પડી.
