ચક્રવાત બૌઆલોઈથી આવેલા ભારે વરસાદ અને ભારે પવનને કારણે મધ્ય વિયેતનામમાં રસ્તાઓ પાણીમાં ડૂબી ગયા, છત ઉડી ગઈ અને ઓછામાં ઓછા 12 લોકો માર્યા ગયા. ચક્રવાત નબળું પડીને વાવાઝોડામાં ફેરવાઈ ગયું અને સોમવારે લાઓસ તરફ આગળ વધ્યું. ચક્રવાતને કારણે ભારે વિનાશ થયો, ઘરો, શાળાઓ અને વીજળીના થાંભલાઓને નુકસાન થયું, અનેક કામચલાઉ પુલ ધોવાઈ ગયા અને અનેક પ્રાંતોમાં રસ્તાઓ અને નીચાણવાળા જળમાર્ગો ડૂબી ગયા. શહેરોમાં પૂરને કારણે વાહનો ડૂબી ગયા અને ઊંચાઈ પર રહેતા સમુદાયોનો સંપર્ક કપાઈ ગયો.
હવામાનશાસ્ત્રીઓએ શું કહ્યું?
અહેવાલો અનુસાર, થાન હોઆ પ્રાંતમાં એક સ્થાનિક અધિકારી ચક્રવાતની તૈયારીનું કામ પૂર્ણ કરીને રાત્રે પરત ફરી રહ્યા હતા ત્યારે તેમના પર ઝાડ પડવાથી તેમનું મૃત્યુ થયું. હ્યુ શહેરમાં એક વ્યક્તિ પૂરના પાણીમાં તણાઈ ગયો. દાનાંગમાં વધુ એક મૃત્યુ થયું. વિયેતનામી હવામાનશાસ્ત્રીઓએ જણાવ્યું હતું કે સોમવારે સવારે 10 વાગ્યે ચક્રવાતનું કેન્દ્ર ન્ગે એન પ્રાંત અને લાઓસ સરહદ વચ્ચે હતું, જ્યાં પવનની ગતિ 74 કિલોમીટર પ્રતિ કલાકની હતી.
વિયેતનામી સત્તાવાળાઓએ માછીમારી બોટોને દરિયામાં જવા પર પ્રતિબંધ મૂક્યો છે અને ચાર દરિયાકાંઠાના એરપોર્ટ પર કામગીરી સ્થગિત કરી દીધી છે. નવમાંથી છ મૃત્યુ ન્હાન બિન્હ પ્રાંતમાં થયા છે, જ્યાં ભારે પવનને કારણે ઘરો ધરાશાયી થયા હતા. ક્વાંગ ટ્રાઇ પ્રાંતમાં, દરિયાકાંઠે લંગરાયેલી માછીમારી બોટના લંગર દોરડા ભારે પવનને કારણે તૂટી ગયા હતા, જેના કારણે બોટ અને તેના નવ ક્રૂ સભ્યો તણાઈ ગયા હતા. તેમાંથી ચાર તરીને કિનારે પહોંચવામાં સફળ રહ્યા હતા. ગિયા લાઈ પ્રાંતમાં, પરિવારોએ માછીમારી કરવા ગયેલા આઠ માછીમારો સાથે સંપર્ક ગુમાવવાની જાણ કરી હતી.
વાવાઝોડાની આવી અસર હતી
રાજ્ય મીડિયાએ અહેવાલ આપ્યો છે કે રવિવારે મધ્યરાત્રિ પછી ચક્રવાત દરિયાકાંઠે ત્રાટકતા પહેલા 347,000 થી વધુ ઘરોમાં વીજળી ગુલ થઈ ગઈ હતી. જોરદાર પવનને કારણે હાઇવે પરના ઘરોની ધાતુની છત ઉડી ગઈ હતી અને કોંક્રિટના થાંભલાઓ તૂટી પડ્યા હતા. ચક્રવાત અપેક્ષા કરતાં વધુ ઝડપથી આગળ વધતા હજારો લોકોને સ્થળાંતર કરવામાં આવ્યા હતા. ચક્રવાત રાત્રે 12:30 વાગ્યે ઉત્તરીય દરિયાકાંઠાના પ્રાંત હા તિન્હમાં ત્રાટક્યું હતું. તેમાં 133 કિલોમીટર પ્રતિ કલાકની ઝડપે પવન ફૂંકાયો હતો, એક મીટરથી વધુ ઊંચા તોફાની મોજાં આવ્યા હતા અને ભારે વરસાદ પડ્યો હતો.
