પેન્સિલવેનિયા રાજ્યમાં ગોળીબારમાં ત્રણ પોલીસ અધિકારીઓનાં મોત થયાં છે અને બે ગંભીર રીતે ઘાયલ થયા છે. આ ગોળીબાર કોડોરસ ટાઉનશીપમાં થયો હતો, જે દક્ષિણપૂર્વ પેન્સિલ્વેનિયાના યોર્ક કાઉન્ટી સમુદાયમાં આવેલું છે. રાજ્ય પોલીસ કમિશનર કર્નલ ક્રિસ્ટોફર પેરિસે જણાવ્યું હતું કે ઘટનામાં સામેલ અધિકારીઓ અગાઉના પોલીસ કામના સ્થળે પરત આવ્યા હતા.
“તેઓ ગઈકાલે શરૂ થયેલી એક તપાસને અનુસરી રહ્યા હતા,” એમ તેમણે પત્રકાર પરિષદ દરમિયાન જણાવ્યું હતું. તેમણે વધુ વિગતો આપવાનો ઇનકાર કર્યો હતો, પરંતુ તપાસને “ઘરેલુ સંબંધિત” તરીકે વર્ણવી હતી.
“હું તમને ખાતરી આપી શકું છું કે પેન્સિલવેનિયા રાજ્ય પોલીસના તમામ સંસાધનોનો ઉપયોગ કરવામાં આવી રહ્યો છે,” પેરિસે કહ્યું, ગોળીબારનું સ્થળ હજુ પણ “ખૂબ જ સક્રિય દ્રશ્ય” હતું.
કમિશનરની સાથે પેન્સિલવેનિયાના ગવર્નર જોશ શાપિરો પણ જોડાયા હતા, જેઓ ફિલાડેલ્ફિયાથી લગભગ 185 કિલોમીટર (115 માઇલ) પશ્ચિમમાં આવેલા નોર્થ કોડોરસ ટાઉનશીપમાં ઘટનાસ્થળે દોડી ગયા હતા અને માર્યા ગયેલા અને ઘાયલ પોલીસ અધિકારીઓના પરિવારોને મળ્યા હતા.
ત્રણ અધિકારીઓનાં મોત થયા અને ગોળી વાગેલા અન્ય બે અધિકારીઓને નજીકની હોસ્પિટલમાં ખસેડાયા હતા, જ્યાં તેમને ગંભીર પરંતુ સ્થિર હાલતમાં રાખવામાં આવ્યા છે.
ઘાયલ અધિકારીઓની હાલત ગંભીર
ઘાયલ થયેલા બે અધિકારીઓને હેલિકોપ્ટર દ્વારા હોસ્પિટલમાં લઈ જવામાં આવ્યા હતા. તેમની હાલત ગંભીર છે. અધિકારીઓએ હુમલાખોરની ઓળખ જાહેર કરી નથી, કે ન તો મૃત્યુ પામેલા પોલીસ અધિકારીઓ કઈ એજન્સીના હતા તે જણાવ્યું છે. એટર્ની જનરલ પામેલા બોન્ડીએ આ ઘટનાની નિંદા કરી છે અને તેને સમાજ માટે શ્રાપ ગણાવી છે. તેમણે કહ્યું કે અધિકારીઓ આ મામલાની તપાસ કરી રહ્યા છે. અગાઉ પણ પોલીસ પર હુમલા થયા છે.
