બોલિવૂડ અભિનેત્રી હુમા કુરેશીના પિતરાઈ ભાઈ આસિફ કુરેશીની હત્યાને લઈ સૌથી મોટા સમાચાર સામે આવ્યા છે. વાસ્તવમાં ગઇકાલે સાંજે હુમા કુરેશીના પિતરાઇ ભાઈની હત્યા થયા બાદ હવે ઘટનાના CCTV વીડિયો સામે આવ્યો છે. આ વીડિયોમાં બંને આરોપીઓ આસિફ પર તીક્ષ્ણ હથિયારથી હુમલો કરતા જોઈ શકાય છે. પ્રાથમિક વિગતો મુજબ પાર્કિંગની બાબતમાં આ હત્યા કરાઇ હોવાનું સામે આવ્યું છે.
મળતી માહિતી મુજબ, નિઝામુદ્દીન પોલીસ સ્ટેશન વિસ્તારના જંગપુરા ભોગલ બજારની ગલીમાં ગુરુવારે મોડી રાત્રે પાર્કિંગને લઈને વિવાદ થયો હતો. એવું કહેવાય છે કે બે યુવાનોએ આસિફના ઘરની સામે સ્કૂટી પાર્ક કરી હતી. આસિફે તેમને સ્કૂટી પાર્ક કરવા દેવાની ના પાડી દીધી. આ બાબતે વિવાદ વધ્યો અને બંનેએ આસિફ પર તીક્ષ્ણ હથિયારોથી હુમલો કર્યો. હુમલામાં આસિફ ગંભીર રીતે ઘાયલ થયો. તેને તાત્કાલિક હોસ્પિટલમાં લઈ જવામાં આવ્યો જ્યાં ડોક્ટરોએ આસિફને મૃત જાહેર કર્યો.
આરોપી કોણ છે?
આરોપી ગૌતમ અને ઉજ્જવલ ભાઈઓ છે. ગૌતમ ડ્રગ્સનો વ્યસની છે. તે વિસ્તારમાં તેના ઝઘડાળુ સ્વભાવ માટે જાણીતો છે. તે ઘણીવાર પડોશમાં ઝઘડો કરે છે. બંનેની ધરપકડ કરવામાં આવી છે. આસિફના પિતાની ફરિયાદ પર પોલીસે ભારતીય દંડ સંહિતા (BNS) ની કલમ 103(1)/3(5) હેઠળ FIR નંબર 233/25 નોંધી છે.
પત્નીએ ઘટનાનો સમગ્ર ક્રમ જણાવ્યો.
આસિફની પત્ની સૈનાઝે તેના નિવેદનમાં પોલીસને જણાવ્યું હતું કે પડોશીઓએ તેમના ઘરની બહાર તેમની સ્કૂટી પાર્ક કરી હતી. આસિફે તેમને ફક્ત સ્કૂટી બાજુ પર ખસેડવા કહ્યું, જેનાથી દલીલ શરૂ થઈ. થોડીવારમાં, દલીલ હિંસક બની ગઈ અને બંને યુવાનોએ પહેલા એકબીજાને ધક્કો માર્યો અને પછી અચાનક હુમલો કર્યો.
