ઉત્તર પ્રદેશથી 1500થી વધુ યુવતીના ધર્માંતરણ થયાની ઘટના પ્રકાશમાં આવી છે. જેમાં યુપી એટીએસે ધર્માંતરણના માસ્ટરમાઇન્ડ છાંગુર બાબાની ધરપકડ કરી છે. જેમાં ગેરકાયદે ધર્માંતરણ ગેંગના મુખ્ય સૂત્રધાર જલાલુદ્દીન ઉર્ફે છાંગુર બાબા અને તેની સાથી નીતુ ઉર્ફે નસરીનએ અનેક મોટા ખુલાસા કર્યા છે. પોલીસ રિમાન્ડના પ્રથમ દિવસે છાંગુર બાબા અને નીતુએ એટીએસ સમક્ષ કબૂલાત કરી હતી કે તેઓ છેલ્લા 15 વર્ષથી ગેરકાયદે ધર્માંતરણમાં સામેલ હતા. છાંગુર બાબાએ પણ ઘણા દેશો સાથે સંબંધો હોવાની કબૂલાત કરી છે.
પૂછપરછ દરમિયાન ખુલાસો કર્યો
છાંગુર બાબા અને નીતુએ એટીએસ દ્વારા પૂછપરછ દરમિયાન ખુલાસો કર્યો છે કે તેમણે આઠ અલગ અલગ બેંકોમાં અનેક ખાતા ખોલાવ્યા હતા. છાંગુર બાબાના બેંક ઓફ બરોડા સહિત ઘણી બેંકોમાં ખાતા હતા. આ ખાતાઓની તપાસ દ્વારા, સો કરોડથી વધુની સંપત્તિના વ્યવહાર સંબંધિત બધી માહિતી પ્રકાશમાં આવી શકે છે. છાંગુર બાબાએ ઘણા દેશો સાથે સંબંધો હોવાની પણ કબૂલાત કરી છે.
છાંગુર બાબાના આઠ બેંકોમાં ખાતા
છાંગુર બાબાએ નેપાળની સરહદે મહારાષ્ટ્ર અને ઉત્તર પ્રદેશમાં ઘણી જગ્યાએ કરોડો રૂપિયાની જમીન ખરીદી હતી. આ ઉપરાંત, ઘણી વિવાદિત જમીનો પણ નકલી દસ્તાવેજો દ્વારા તેના નામે નોંધાઈ હતી. છાંગુર બાબા લવ જેહાદમાં સામેલ યુવાનોને મોટા ઈનામો આપતો હતો. છાંગુર બાબા વૈભવી હવેલીની અંદર યુવાનોને લવ જેહાદ માટે તાલીમ આપતો હતો.
વડાપ્રધાનને પત્ર લખીને છાંગુર બાબાના રેકેટ અંગે ફરિયાદ
ઉલ્લેખનીય છે કે, બલરામપુરના રહેવાસી વસીઉદ્દીન ચૌધરીએ વર્ષ 2023માં વડાપ્રધાનને પત્ર લખીને છાંગુર બાબાના રેકેટ અને નાગપુરના ભારત પ્રતિકાર્થ સેવા સંઘના ઈદુલ ઈસ્લામ આસી વિશે ફરિયાદ કરી હતી અને તપાસની માંગ કરી હતી. ઈદુલે છાંગુર બાબાને પોતાના સંગઠન ભારત પ્રતિકાર્થ સેવા સંઘના યુપીના પ્રમુખ બનાવ્યા હતા. આ માટે ઔપચારિક પત્ર આપવામાં આવ્યો હતો.
