ગુજરાતમાં ચોમાસા જામવા લાગ્યું છે ત્યારે દક્ષિણ ગુજરાતમાં વરસાદે ધેધનાધમ કર્યા બાદ હવે વરસાદ ધીમે ધીમે ઉત્તર તરફ આગળ વધી રહ્યો છે. સુરત જિલ્લા બાદ મંગળવારે વરસાદે નર્મદા જિલ્લામાં ધબધબાટી બોલાવી હતી. ત્યારે હવે આજે 25 જૂન 2025, બુધવારે દક્ષિણ અને મધ્ય ગુજરાતના જિલ્લાઓમાં વરસાદનું રેડ એલર્ટ આપવામાં આવ્યું છે.
આજે વરસાદ આ જિલ્લાઓમાં ભુક્કા બોલાવશે
વરસાદી માહોલ વચ્ચે હવામાન વિભાગે ગુજરાતના 10 જિલ્લાઓમાં વરસાદનું રેડ એલર્ટ જાહેર કર્યું છે. આ વિસ્તારોમાં ભારેથી અતિ ભારે વરસાદની આગાહી કરી છે. આ જિલ્લાઓની વાત કરીએ તો દાહોદ, મહિસાગર, વડોદરા, નર્મદા, ભરૂચ, સુરત, નવસારી, વલસાડ, દમણ, દાદરા નગર હવેલીમાં ભારેથી અતિ ભારે વરસાદ પડવાની શક્યતા છે. આ વિસ્તારોમાં વરસાદનું રેડ એલર્ટ છે.
હવામાન વિભાગની આગાહી પ્રમાણે સાબરકાંઠા, ગાંધીનગર, અરવલ્લી, ખેડા, આણંદ, પંચમહાલ, છોટા ઉદેપુર, ડાંગ, તાપી તેમજ સૌરાષ્ટ્રના અમરેલી અને ભાવનગરમાં અતિ ભારે વરસાદની આગાહી કરવામાં આવી છે.
