પંજાબ પોલીસે પાકિસ્તાન સરહદને અડીને આવેલા તરનતારન જિલ્લામાંથી એક વ્યક્તિની પાકિસ્તાની ગુપ્તચર અધિકારી સાથે સૈન્ય ગતિવિધિઓ સંબંધિત સંવેદનશીલ માહિતી શેર કરવા બદલ ધરપકડ કરી છે. પંજાબ પોલીસે આ વ્યક્તિ પાસેથી એક મોબાઇલ ફોન જપ્ત કર્યો છે, જેમાં પાકિસ્તાની ગુપ્તચર અધિકારી સાથે શેર કરેલી માહિતી પણ છે.
પોલીસે જણાવ્યું હતું કે આરોપી ISI ના સંપર્કમાં હતો અને તેને સંવેદનશીલ માહિતી આપવાના બદલામાં પૈસા પણ મળ્યા છે. પંજાબ પોલીસના DGP ગૌરવ યાદવે જણાવ્યું હતું કે આરોપીની ઓળખ ગગનદીપ સિંહ ઉર્ફે ગગન તરીકે થઈ છે. તે તરનતારનના મોહલ્લા રોડુપુર, ગલી નજર સિંહ વાલીનો રહેવાસી છે. તરનતારન પોલીસ અને પોલીસની કાઉન્ટર ઇન્ટેલિજન્સ વિંગના સંયુક્ત ઓપરેશનમાં તેની ધરપકડ કરવામાં આવી છે.
પ્રાથમિક તપાસમાં જાણવા મળ્યું છે કે, ધરપકડ કરાયેલ ગગનદીપ સિંહ છેલ્લા પાંચ વર્ષથી પાકિસ્તાન સ્થિત ખાલિસ્તાની સહાનુભૂતિ ધરાવતા ગોપાલ સિંહ ચાવલા સાથે સંપર્કમાં હતો, જેના દ્વારા તેનો પરિચય પાકિસ્તાની ગુપ્તચર ઓપરેટિવ્સ (PIOs) સાથે થયો હતો. પંજાબ પોલીસના ડીજીપી ગૌરવ યાદવે કહ્યું કે, ગગનદીપે પીઆઈઓ દ્વારા પૈસા પણ લીધા હતા. મોબાઈલ ફોન દ્વારા તેણે પીઆઈએ સાથે ગુપ્ત માહિતી શેર કરી હતી. આ સાથે, તે ૨૦થી વધુ આઈએસઆઈ લોકોના સંપર્કમાં હતો. પોલીસે આ સંદર્ભમાં વિગતો મેળવી છે. આરોપીઓ વિરુદ્ધ તરનતારન પોલીસ સ્ટેશનમાં ઓફિશિયલ સિક્રેટ્સ એક્ટ હેઠળ એફઆઈઆર નોંધવામાં આવી છે અને વધુ તપાસ ચાલી રહી છે.
પોલીસના જણાવ્યા અનુસાર, ગગનદીપ સિંહ પાસેથી મળેલા મોબાઇલ ફોનથી તેણે તેના પાકિસ્તાની એજન્ટો સાથે શેર કરેલી ગુપ્ત માહિતી અને તેના ૨૦થી વધુ ISI સંપર્કો વિશે મહત્વપૂર્ણ માહિતી બહાર આવી છે. DGPએ જણાવ્યું હતું કે અન્ય કડીઓ શોધવા અને આ જાસૂસી નેટવર્કના સંપૂર્ણ અવકાશને સ્થાપિત કરવા માટે સઘન નાણાકીય અને તકનીકી તપાસ ચાલી રહી છે. પંજાબ પોલીસે આરોપ લગાવ્યો હતો કે, ખાલિસ્તાની આતંકવાદી ગોપાલ ચાવલા, જે હાલમાં પાકિસ્તાનમાં છે તે ISI સાથે મળીને ભારતમાં જાસૂસી રેકેટ ચલાવી રહ્યો છે અને પહેલગામ આતંકવાદી હુમલા પછી ભારતની બદલો લેવાની કાર્યવાહી દરમિયાન ઓપરેશન સિંદૂર દરમિયાન જાસૂસીમાં સક્રિય રીતે સામેલ હતો. ચાવલા પાકિસ્તાનમાં આતંકવાદી નેટવર્ક સાથે પણ જોડાયેલો છે અને લશ્કર-એ-તૈયબાના વડા હાફિઝ સઈદ સાથેના તેના ફોટા સામે આવ્યા છે.
