સુરતમાં સૌપ્રથમવાર વિશાળ પાયે મોકડ્રીલનું આયોજન કરવામાં આવ્યું. આ મોકડ્રીલ ઉધના વિસ્તારમાં આવેલી ઈન્ટરનેશનલ બિઝનેસ હબ બિલ્ડિંગમાં યોજાઈ, જેમાં ફાયર બ્રિગેડ, NDRF, પોલીસ, મેડિકલ ટીમ અને સ્થાનિક પ્રશાસનની સક્રિય ભાગીદારી રહી.
મોકડ્રીલનો મુખ્ય ઉદ્દેશ આપત્તિજનક સ્થિતિમાં, જેમ કે આગ, ગેસ લીક કે ભૂકંપ દરમિયાન તાત્કાલિક પ્રતિસાદ અને બચાવ કામગીરીની તૈયારીને તપાસવાનો હતો. મોકડ્રીલ દરમિયાન આગ લાગવાની કાલ્પનિક ઘટના ઘડવામાં આવી હતી, જેમાં ઇમારતમાં ફસાયેલા લોકોને સુરક્ષિત બહાર કાઢવામાં આવ્યા હતા. સાથે સાથે પ્રાથમિક સારવાર અને તાત્કાલિક સેવાઓના સંચાલનનો અભ્યાસ પણ કરાયો.
બચાવ ટીમોએ સંપૂર્ણ સતર્કતા અને કાર્યકુશળતા સાથે કામગીરી કરી બતાવ્યું કે જો કોઈ વાસ્તવિક ઘટના બને, તો તેઓ કેવી ઝડપ અને કાર્યક્ષમતા સાથે પ્રતિસાદ આપી શકે.
સ્થાનિક નાગરિકો અને ઓફિસ સ્ટાફે પણ ગંભીરતા સાથે મોકડ્રીલમાં ભાગ લીધો અને સુરક્ષા પ્રત્યે જાગૃતિ વધારવામાં સહકાર આપ્યો. પ્રશાસન દ્વારા આવી મોકડ્રીલને ભવિષ્યમાં નિયમિત રૂપે યોજવાની યોજના ઘડી છે.
