બોલિવુડના અભિનેતા સલમાનખાને ધમકી મળવાનો સિલસિલો જારી રહ્યો છે. તેને વધુ એક ધમકી મળી છે. આ ધમકીમાં સલમાન ખાન પાસેથી રૂપિયા પાંચ કરોડની ખંડણી માગવામાં આવી છે. મુંબઈ પોલીસના અધિકારીઓના કહેવા મુજબ, ધમકીભર્યો મેસેજ મુંબઈ ટ્રાફિક પોલીસ હેલ્પલાઈન પર આવ્યો છે.
મુંબઈ પોલીસના એક અધિકારીએ આ અંગે વધુમાં જણાવ્યું કે, મેસેજ મોકલનારે દાવો કર્યો કે એ ગેંગસ્ટર લોરેન્સ બિશ્નોઈનો ભાઈ છે. ધમકીથી ભરેલા મેસેજમાં કહેવામાં આવ્યું કે, જો સલમાન ખાને જીવતા રહેવું છે, તો તેણે અમારા(બિશ્નોઇ સમુદાય) મંદિરમાં જઈને માફી માંગવી જોઈએ, અથવા તો પાંચ કરોડ રૂપિયા આપવા જોઈએ. જો સલમાન ખાન આવું નહીં કરે તો તેને મારી નાંખીશું, અમારી ગેંગ હજુ પણ સક્રિય છે.
થોડા દિવસ પહેલા પણ સલમાન ખાનને જાનથી મારી નાખવાની ધમકી મળી હતી. આ કેસમાં પોલીસે નોઈડામાંથી એક વ્યક્તિની ધરપકડ કરી હતી. વરલી પોલીસે મુંબઈ પોલીસના ટ્રાફિક હેલ્પલાઈન નંબર પર બોલિવૂડના સુપરસ્ટાર પાસેથી રૂ. 2 કરોડની માંગણી કરતા અનેક વોટ્સએપ મેસેજ મોકલવા બદલ એક અજાણ્યા વ્યક્તિ સામે કેસ નોંધ્યો હતો.
આ વિવાદ 1998ના કાળિયારના શિકાર કેસથી સંબંધિત છે, જેમાં સલમાન ખાન પર કાળિયારના શિકારનો આરોપ લાગ્યો હતો. રાજસ્થાન હાઈકોર્ટે તેને દોષિત ઠેરવ્યો હતો અને પાંચ વર્ષની જેલની સજા ફટકારી હતી, જોકે બાદમાં સલમાનને જામીન મળી ગયા હતા. આ દરમિયાન સાબરમતી જેલમાં બંધ ગેંગસ્ટર લૉરેન્સ બિશ્નોઈએ પણ સલમાન ખાનને જાનથી મારી નાખવાની ધમકી આપી છે. જેને ધ્યાનમાં લઈને સલમાનને Y+ સિક્યુરિટી આપવામાં આવી રહી છે.
