કોલકાતાની મહિલા ડોક્ટર સાથે દુષ્કર્મ કરીને બર્બરતાપૂર્વક હત્યા કરવાના બનાવમાં રોજ નવા ચોંકાવનારા ખુલાસા થઇ રહ્યા છે. હૈવાનિયતની હદ પાર કરનારો આરોપી સંજય રોય ગુનાઇત ભુતકાળ ધરાવે છે અને ભુતકાળમાં જો તેની સામે પોલીસે કડક કાર્યવાહી કરી હોત તો કદાચ મહિલા ડોક્ટર સાથે આ ખરાબ બનાવ ના બન્યો હોત.
પશ્ચિમ બંગાળમાં કોલકાતાની આરજી કાર મેડિકલ કોલેજ અને હોસ્પિટલની ઘટના ખૂબ જ દર્દનાક છે. તે ખુબ જ ભયાવહ છે. એક જુનિયર લેડી ડોક્ટર, જે પોતાનું કામ પતાવીને સૂઈ રહી હતી, તેની સાથે એવી નિર્દયતાથી વર્તન કરવામાં આવ્યું કે સાંભળનારાઓ પણ કંપી જાય. ઘાતકી સંજય રોયે પહેલા લેડી ડોક્ટર પર દુષ્કર્મ કર્યું અને પછી તેની હત્યા કરી હતી. મહિલા ડૉક્ટરનો પોસ્ટમોર્ટમ રિપોર્ટ જણાવે છે કે સંજય રોયે તેના પર કેવી રીતે અત્યાચાર કર્યો હતો. તે જ સમયે, આ કેસ ખુલ્યા પછી, સંજય રોયની આખી કુંડળી પણ ખુલ્લેઆમ સામે આવી છે.
પોલીસની પૂછપરછમાં જાણવા મળ્યું કે સંજયે ઘણીવાર લગ્ન કરેલા છે પરંતુ હવે તેની કોઈ પત્ની તેની સાથે રહેતી નથી. તેમાંથી તેની એક પત્ની તો એવી છે કે જે ગર્ભવતી હતી ત્યારે સંજયે તેની પર અત્યાચાર ગુજાર્યો હતો. અહેવાલ મુજબ, આ કેસની તપાસ કરી રહેલા પોલીસ અધિકારીઓને સંજય વિરુદ્ધ તેની પૂર્વ પત્ની દ્વારા કાલીઘાટ પોલીસ સ્ટેશનમાં નોંધાયેલી બે વર્ષ જૂની ફરિયાદ મળી છે. આ ફરિયાદ અંગે સંજયની પૂર્વ સાસુ દુર્ગા દેવીએ જણાવ્યું કે જ્યારે તેની પુત્રી ત્રણ મહિનાની ગર્ભવતી હતી ત્યારે સંજય તેને રોજ મારતો હતો.
દુર્ગા દેવીના જણાવ્યા અનુસાર, ‘તેણે 4 ઓગસ્ટ 2022ના રોજ કાલીઘાટ પોલીસ સ્ટેશનમાં તેની પુત્રી વતી ફરિયાદ નોંધાવી હતી. આ ફરિયાદ બે વખત આગળ કરવામાં આવી હતી, પરંતુ સંજય સામે કોઈ કાર્યવાહી કરવામાં આવી ન હતી. આવી સ્થિતિમાં, સ્પષ્ટ છે કે જો તે સમયે સંજય વિરુદ્ધ કાર્યવાહી કરવામાં આવી હોત અને તેને સજા થઈ હોત, તો કોલકાતાના જુનિયર ડૉક્ટરનો જીવ બચી ગયો હોત. એવું કહેવામાં આવી રહ્યું છે કે તે સમયે સંજય પોલીસ કલ્યાણ બોર્ડના કેટલાક અધિકારીઓની તેના પર કૃપા દ્રષ્ટી હતી અને તેથી જ તેની વિરુદ્ધ કોઈ કાર્યવાહી કરવામાં આવી ન હતી.
સીસીટીવી ફૂટેજ પરથી પોલીસને ખબર પડી કે સંજય ગુરુવારે બે વખત હોસ્પિટલમાં ગયો હતો. પહેલા રાત્રે 11 વાગ્યે અને પછી એ જ રાત્રે 3:30 વાગ્યે. સંજયના મિત્રનો એક પરિચિત હોસ્પિટલમાં દાખલ હતો અને તે તેને જોવાના બહાને હોસ્પિટલમાં દાખલ થયો હતો. તે પોલીસમાં નાગરિક સ્વયંસેવક હોવાથી, જ્યારે તે હોસ્પિટલમાં આવ્યો ત્યારે તેની પૂછપરછ કરવામાં આવી ન હતી. સંજય કોલકાતાના સોલ્ટ લેકમાં સિટી પોલીસની ચોથી બટાલિયનની બેરેકમાં રહેતો હતો. પોલીસે જણાવ્યું કે ઘટના બાદ સંજય શુક્રવારે સવારે બેરેકમાં સુઈ ગયો હતો.
આ પણ વાંચો :-
