સુરતના લિંબાયત વિસ્તારમાં ઉત્તરાયણના તહેવાર પહેલાં જ એક અત્યંત કરુણ ઘટના સામે આવી છે. પતંગ પકડવાની લાયમાં એક 12 વર્ષના કિશોરનું જૂની દીવાલ નીચે દબાઈ જવાથી ગંભીર ઈજા થતાં મોત નીપજ્યું છે. આ અકસ્માત બાદ સમગ્ર વિસ્તારમાં શોકનું મોજું ફરી વળ્યું છે અને મૃતક કિશોરના પરિવાર પર આભ તૂટી પડ્યું છે.
મળતી માહિતી મુજબ, મૃતક કિશોરનું નામ મોહમ્મદ ફૈઝાન (ઉંમર આશરે 12 વર્ષ) હતું. લિંબાયત વિસ્તારમાં સંગમની બાજુમાં આવેલા એક નાના મેદાન નજીક આ ઘટના બની હતી. મોહમ્મદ ફૈઝાન પતંગ પકડવા માટે ગયો હતો, ત્યારે અચાનક જ એક જૂની અને જર્જરિત દીવાલ તેના પર તૂટી પડી હતી, આ આક્ષેપ પરિવાર દ્વારા કરાયો છે.
દીવાલનો મોટો હિસ્સો છાતીના ભાગે પડવાથી કિશોરને ગંભીર ઈજાઓ
દીવાલનો મોટો હિસ્સો કિશોરની છાતીના ભાગે પડવાથી તેને ગંભીર ઈજાઓ પહોંચી હતી. આજુબાજુના લોકોએ તરત જ કિશોરને દીવાલના કાટમાળ નીચેથી બહાર કાઢ્યો હતો. આ ઘટનાની જાણ થતાં જ તેના પિતા મોહમ્મદ શમીમને ફોન દ્વારા તાત્કાલિક હોસ્પિટલ આવવા જણાવાયું હતું.
