પશ્ચિમ બંગાળ વિધાનસભા ચૂંટણીમાં ભવ્ય જીત બાદ હવે રાજ્યમાં ભાજપના મુખ્યમંત્રી કોણ બનશે અને શપથવિધિ ક્યારે યોજાશે તે મુદ્દે સૌની નજર છે. આ પ્રશ્નનો જવાબ આપતા ભાજપના રાજ્ય અધ્યક્ષ સમીક ભટ્ટાચાર્યએ મહત્વપૂર્ણ માહિતી આપી છે. તેમણે જણાવ્યું કે રાજ્યમાં ભાજપના પ્રથમ મુખ્યમંત્રીનો શપથવિધિ સમારોહ 9 મેના રોજ યોજાશે.
શું કહ્યું ભાજપ પ્રદેશ અધ્યક્ષ સમીક ભટ્ટાચાર્યએ?
ભાજપના પ્રદેશ અધ્યક્ષે પ્રવાસી મજૂરોની પ્રશંસા કરતા કહ્યું કે તેમણે અનેક મુશ્કેલીઓ વચ્ચે પોતાનો ખર્ચ કરીને મતદાન કરવા માટે મુસાફરી કરી. તેમણે આવા મતદારોને સલામ કર્યો. તેમણે વધુમાં જણાવ્યું કે ટોરોન્ટો, ડલાસ, સિલિકોન વેલી, કોપેનહેગન, જર્મની અને યુકે જેવા દેશોના વિવિધ ભાગોમાંથી પણ લોકો મતદાન કરવા આવ્યા હતા. તેમણે કહ્યું કે ભાજપનું લક્ષ્ય માત્ર સરકાર કે મુખ્યમંત્રી બદલવાનું નથી, પરંતુ સમગ્ર રાજકીય વાતાવરણમાં ફેરફાર લાવવાનો છે, જે તેમના અનુસાર સામાજિક રીતે દબાણભર્યું બની ગયું છે. તેઓ સમાજમાં વૈવિધ્યતા અને સંતુલન પાછું લાવવા માંગે છે. ‘ડબલ એન્જિન સરકાર’ની વાત કરતા તેમણે જણાવ્યું કે પાર્ટીનું ઘોષણાપત્ર કેન્દ્ર અને રાજ્ય બંને સ્તરે તૈયાર કરવામાં આવ્યું છે, જેમાં વડાપ્રધાન અને ગૃહમંત્રીની પણ ભાગીદારી રહી છે. તેમણે વિશ્વાસ વ્યક્ત કર્યો કે તમામ વચનો પૂરા કરવામાં આવશે.
બંગાળ વિધાનસભા ચૂંટણીના પરિણામો
પશ્ચિમ બંગાળમાં બે તબક્કામાં મતદાન બાદ 4 મેના રોજ મતગણતરી કરવામાં આવી હતી. તેમાં સત્તાધારી તૃણમૂલ કોંગ્રેસને ભારે પરાજયનો સામનો કરવો પડ્યો. આંકડા મુજબ, TMCને માત્ર 80 બેઠકો મળી, જ્યારે અગાઉની ચૂંટણીમાં તેને 215 બેઠકો મળી હતી. બીજી તરફ ભાજપે મજબૂત પ્રદર્શન કરતા 206 બેઠકો પર કબજો જમાવ્યો, જ્યારે અગાઉ તેને માત્ર 77 બેઠકો મળી હતી.
રાજ્યમાં બંપર મતદાન
પશ્ચિમ બંગાળની 294 બેઠકો માટે પ્રથમ તબક્કામાં 23 એપ્રિલે 152 બેઠકો પર અને બીજા તબક્કામાં 29 એપ્રિલે 142 બેઠકો પર મતદાન થયું હતું. બંને તબક્કામાં ભારે મતદાન નોંધાયું હતું. ચૂંટણી પંચ મુજબ, પ્રથમ તબક્કામાં 93.19% અને બીજા તબક્કામાં 92.67% મતદાન નોંધાયું હતું. કુલ મળીને રાજ્યમાં 92.93%થી વધુ મતદાન નોંધાયું છે, જે દેશ માટે નવો રેકોર્ડ છે.
