પશ્ચિમ બંગાળમાં વિધાનસભા ચૂંટણી 2026 માટે મતગણતરી ચાલુ છે, ત્યારે ઘણા મતગણતરી કેન્દ્રો પર હંગામાની ખબર સામે આવી રહી છે. આ જ કડીમાં સૌથી હાઈપ્રોફાઇલ ગણાતી ભવાનીપુર વિધાનસભા બેઠકના એક મતગણતરી કેન્દ્ર પર હોબાળો મચ્યાની માહિતી મળી છે. આ પછી મુખ્યમંત્રી મમતા બેનર્જી ખુદ સ્થળ પર પહોંચી ગયા હતા, જ્યારે ભાજપના ઉમેદવાર શુભેન્દુ અધિકારી પણ ત્યાં પહોંચ્યા હતા. સોશિયલ મીડિયા પર સામે આવેલા કેટલાક વીડિયોમાં મતગણતરી કેન્દ્ર પર ભાજપ અને TMCના કાર્યકરો મોટી સંખ્યામાં જોવા મળી રહ્યા છે.
મતગણતરીની હાલની સ્થિતિ
ચૂંટણી પંચની સત્તાવાર વેબસાઈટ મુજબ, સાંજે 5 વાગ્યા સુધી ભારતીય જનતા પાર્ટી 199 બેઠકો પર આગળ ચાલી રહી છે. જેમાંથી 12 બેઠકો પર જીત મેળવી છે અને 187 બેઠકો પર લીડ ધરાવે છે. બીજી તરફ સત્તાધારી તૃણમૂલ કોંગ્રેસ 87 બેઠકો પર આગળ છે, જેમાંથી 5 બેઠકો જીતી છે અને 82 બેઠકો પર આગળ છે. કોંગ્રેસ માત્ર 2 બેઠકો પર લીડ ધરાવે છે. અન્ય પક્ષોમાં હુમાયૂં કબીરની AJUP 2 બેઠકો પર આગળ છે, જ્યારે CPI(M) અને AISF એક-એક બેઠક પર આગળ છે.
રાજ્યમાં બંપર મતદાન
પશ્ચિમ બંગાળની 294 વિધાનસભા બેઠકો માટે પ્રથમ તબક્કામાં 23 એપ્રિલે 152 બેઠકો પર મતદાન થયું હતું, જ્યારે બીજા તબક્કામાં 29 એપ્રિલે 142 બેઠકો પર મતદાન થયું હતું. ચૂંટણીના પરિણામો 4 મેના રોજ જાહેર થવાના છે. બંને તબક્કામાં રાજ્યમાં ભારે મતદાન નોંધાયું હતું. ચૂંટણી પંચ મુજબ, પ્રથમ તબક્કામાં 93.19% અને બીજા તબક્કામાં 92.67% મતદાન નોંધાયું હતું. કુલ મળીને રાજ્યમાં 92.93% થી વધુ મતદાન નોંધાયું છે, જે દેશ માટે એક નવો રેકોર્ડ ગણાય છે.
