તેલંગાણા એન્ટી કરપ્શન બ્યુરો (ACB)એ બુધવારે રિન્યુએબલ એનર્જી ડેવલપમેન્ટ કોર્પોરેશન (REDCO)ના ડિવિઝનલ ઈજનેર મુત્યમ વેંકટ રમણા વિરુદ્ધ આવક કરતાં વધુ સંપત્તિ (Disproportionate Assets) કેસમાં મોટી કાર્યવાહી હાથ ધરી હતી. ACBની ટીમે તેમના નિવાસસ્થાન, કચેરી તેમજ સંબંધીઓ, સહયોગીઓ અને કથિત બેનામીદારો સાથે જોડાયેલા કુલ આઠ સ્થળોએ એકસાથે દરોડા પાડ્યા હતા.
તપાસ દરમિયાન અધિકારીઓને રમણાની જાણીતી આવકના સ્ત્રોત કરતાં ઘણી વધુ સંપત્તિના પુરાવા મળ્યા હોવાનું જણાવાયું છે. આ આધારે પ્રિવેન્શન ઑફ કરપ્શન એક્ટ હેઠળ ગુનો નોંધવામાં આવ્યો છે અને વધુ તપાસ શરૂ કરવામાં આવી છે.
દરોડા દરમિયાન સેરિલિંગમપલ્લી અને કુકટપલ્લી વિસ્તારમાં ચાર રહેણાંક ફ્લેટ મળી આવ્યા, જેમની નોંધણી મુજબની કિંમત અંદાજે ₹1.23 કરોડ છે. ઉપરાંત કુકટપલ્લીના અંજનેયા નગરમાં આવેલી G+3 કોમર્શિયલ બિલ્ડિંગની કિંમત આશરે ₹1.82 કરોડ અને સેરિલિંગમપલ્લીના ગુટ્ટાલા બેગમપેટ વિસ્તારમાં આવેલી G+5 કોમર્શિયલ બિલ્ડિંગની નોંધાયેલ કિંમત લગભગ ₹2.90 કરોડ હોવાનું સામે આવ્યું છે.
તપાસમાં એ પણ બહાર આવ્યું કે આરોપીએ પોતાની પત્નીના નામે નોંધાયેલી ચાર કન્સ્ટ્રક્શન કંપનીઓ મારફતે રિયલ એસ્ટેટમાં મોટા પ્રમાણમાં રોકાણ કર્યું હતું. અંજનેયા નગર અને મૂસાપેટ વિસ્તારમાં દસ રહેણાંક એપાર્ટમેન્ટ પ્રોજેક્ટ વિકસાવવામાં આવી રહ્યા છે, જેમાં અંદાજે ₹20 કરોડનું રોકાણ હોવાનું માનવામાં આવે છે.
આ ઉપરાંત ACBને ₹52.02 લાખની બેંક ડિપોઝિટ, અંદાજે ₹4 કરોડના 2.09 કિલોગ્રામ સોનાના દાગીના, લગભગ ₹45 લાખ કિંમતની ત્રણ કાર, ₹30 લાખના ઘરગથ્થુ સામાન અને ઇલેક્ટ્રોનિક્સ તેમજ અંદાજે ₹2.5 લાખની કિંમતની 20 દારૂની બોટલો મળી આવી છે.
અત્યાર સુધી મળી આવેલી સંપત્તિની સત્તાવાર કિંમત લગભગ ₹27.65 કરોડ આંકવામાં આવી છે. જોકે રિયલ એસ્ટેટ નિષ્ણાતોના મતે વર્તમાન બજારભાવ મુજબ તેની કુલ કિંમત ₹100થી ₹150 કરોડ વચ્ચે હોઈ શકે છે. ACB હાલમાં તમામ સંપત્તિ, રોકાણ અને સંભવિત બેનામી હોલ્ડિંગ્સની વિગતવાર ચકાસણી કરી રહી છે.
તપાસમાં એ પણ સામે આવ્યું છે કે મુત્યમ વેંકટ રમણા વર્ષ 2019માં લાંચ લેવાના ટ્રેપ કેસમાં પણ ઝડપાયા હતા. તે સમયે ₹25 હજારની લાંચ સ્વીકારતા તેમની ધરપકડ કરવામાં આવી હતી અને ત્યારબાદ રોકડ તેમજ સોનાના દાગીના પણ જપ્ત કરવામાં આવ્યા હતા. હાલ આરોપીને વિશેષ અદાલતમાં રજૂ કરવાની કાર્યવાહી હાથ ધરવામાં આવી છે, જ્યારે અપ્રમાણસર સંપત્તિના કેસની તપાસ હજુ ચાલુ છે.
