સુરતના ગભેણી વિસ્તારમાં આજે સવારે અચાનક ભડકેલી આગે ગણતરીની મિનિટોમાં વિકરાળ સ્વરૂપ ધારણ કરી લીધું હતું. દુકાનમાં રાખેલા કેમિકલના ડ્રમ આગની ગરમીથી ધડાકા સાથે ફાટતાં આસપાસના વિસ્તારમાં ભયનો માહોલ સર્જાયો હતો. ઘટનાની જાણ થતાં ફાયર બ્રિગેડની પાંચ ગાડીઓ તાત્કાલિક સ્થળે પહોંચી આગને કાબૂમાં લેવાની કામગીરી શરૂ કરી હતી.
મળતી માહિતી મુજબ, બસેરા નગરના ગભેણી ચોકડી વિસ્તારમાં સવારે આશરે 9 વાગ્યાની આસપાસ દુકાનમાંથી ધુમાડાના ગોટેગોટા નીકળતા સ્થાનિકોને આગની જાણ થઈ હતી. જોતજોતામાં આગે ગંભીર સ્વરૂપ ધારણ કર્યું હતું. દુકાનમાં કેમિકલનો જથ્થો સંગ્રહિત હોવાથી આગ વધુ ભડકી હતી અને કેટલાક કેમિકલ ભરેલા ડ્રમ જોરદાર ધડાકા સાથે ફાટ્યા હતા.
આગની ઝપેટમાં દુકાનની બહાર રાખવામાં આવેલી ભંગારની ગાડી સહિત અન્ય સામાન પણ આવી ગયો હતો. આગની તીવ્રતાને કારણે દુકાનની છત પર લગાવવામાં આવેલા ચાદરોને પણ નુકસાન થયું હોવાનું જાણવા મળ્યું છે. પરિસ્થિતિને ધ્યાનમાં રાખીને ફાયરકર્મીઓએ આગ નજીકની મિલકતો સુધી ન પહોંચે તે માટે સાવચેતી સાથે કામગીરી હાથ ધરી હતી.
ઘટનાની જાણ થતાં સચિન GIDC પોલીસ પણ ઘટનાસ્થળે પહોંચી હતી. પ્રાથમિક રીતે શોર્ટ સર્કિટના કારણે આગ લાગી હોવાની શક્યતા વ્યક્ત કરવામાં આવી રહી છે, પરંતુ આગનું ચોક્કસ કારણ સત્તાવાર તપાસ બાદ જ સ્પષ્ટ થશે.
હાલ ઘટનામાં કોઈ જાનહાનિ કે ઈજા અંગે સત્તાવાર માહિતી સામે આવી નથી. બીજી તરફ, આગના કારણે દુકાન, કેમિકલના જથ્થા અને બહારના સામાનને થયેલા નુકસાનનું મૂલ્યાંકન હાથ ધરવામાં આવી રહ્યું છે.
