ઉત્તર પ્રદેશની રાજધાની લખનૌમાંથી એક ચોંકાવનારી ઘટના સામે આવી છે, જ્યાં ટ્રેનના ડબ્બામાંથી એક યુવતીનો શિરવિહોણો મૃતદેહ મળી આવતા હડકંપ મચી ગયો છે. આ ઘટના ત્યારે સામે આવી જ્યારે છપરાથી લખનૌ આવી રહેલી ગોમતીનગર એક્સપ્રેસ સ્ટેશન પર પહોંચી હતી. સફાઈ કર્મચારી જ્યારે S1 સ્લીપર કોચની સફાઈ કરવા અંદર ગયો ત્યારે તેને એક બર્થ નીચે શંકાસ્પદ બોક્સ અને બેગ મળી આવ્યા હતા. તેને કંઈક ગડબડ હોવાની શંકા જતા તરત જ ઉચ્ચ અધિકારીઓને જાણ કરવામાં આવી હતી.
યુવતીની ઓળખ હજુ સુધી થઈ શકી નથી
લખનૌ રેલવેના એસપી રોહિત મિશ્રાએ જણાવ્યું હતું કે, “છપરાથી ગોરખપુર થઈ ગોમતીનગર જતી ટ્રેનની નિયમિત તપાસ દરમિયાન રેલવે કર્મચારીઓને સ્લીપર કોચમાં એક બોક્સ અને એક બેગ મળી આવ્યા હતા. માહિતી મળતાં જ સ્ટેશન માસ્ટરને જાણ કરવામાં આવી, ત્યારબાદ RPF અને GRPને સ્થળ પર બોલાવવામાં આવ્યા. બોક્સમાં યુવતીનો ધડ મળી આવ્યો હતો, જ્યારે હાથ-પગ અલગ-અલગ પોલિથિન બેગમાં પેક કરીને બોક્સમાં રાખવામાં આવ્યા હતા. મૃતદેહને પોસ્ટમોર્ટમ માટે મોકલી આપવામાં આવ્યો છે. માથું ન મળતા યુવતીની ઓળખ હજુ સુધી થઈ શકી નથી. FIR નોંધાઈ ગઈ છે અને તપાસ માટે ત્રણ ટીમોની રચના કરવામાં આવી છે.”
#WATCH | Lucknow, UP | Lucknow Railways SP Rohit Mishra says, "During a routine check on a train which runs from Chhapra via Gorakhpur to Gomti Nagar, railway staff discovered a box and a bag in the sleeper coach. Upon notification, the station master was informed, who further… pic.twitter.com/w9jOhEywf7
— ANI (@ANI) May 18, 2026
ફોરેન્સિક ટીમને પણ બોલાવવામાં આવી
તેમણે વધુમાં જણાવ્યું કે, માહિતી મળતા જ GRP ચારબાગની ટીમ અને વરિષ્ઠ અધિકારીઓ સ્થળ પર પહોંચી ગયા હતા. બોક્સ અને બેગ ખોલતા પહેલા ઘટનાસ્થળની તપાસ માટે લખનૌ કમિશ્નરેટની વિશેષ ફોરેન્સિક ફીલ્ડ યુનિટને પણ બોલાવવામાં આવી હતી.
મિશ્રાએ જણાવ્યું હતું કે, “લખનૌ કમિશ્નરેટની ફીલ્ડ યુનિટને બોલાવવામાં આવી અને જ્યારે બોક્સ તથા બેગ ખોલવામાં આવ્યા ત્યારે અંદર એક યુવતીનો મૃતદેહ મળ્યો, જેમાં માત્ર ધડ હતો અને માથું ગાયબ હતું. હાથ અને પગ અલગ પોલિથિન બેગમાં પેક કરવામાં આવ્યા હતા.”
25થી 30 વર્ષની યુવતી હોવાની આશંકા
પોલીસના જણાવ્યા મુજબ મૃતક યુવતીની ઉંમર અંદાજે 25થી 30 વર્ષની વચ્ચે હોવાનું માનવામાં આવી રહ્યું છે. એસપીએ જણાવ્યું કે, “મૃતદેહને પોસ્ટમોર્ટમ માટે મોકલી દેવામાં આવ્યો છે. માથું ન મળવાના કારણે ઓળખ કરવાની પ્રક્રિયામાં મુશ્કેલી પડી રહી છે.”
તપાસમાં જોડાઈ પોલીસની ત્રણ ખાસ ટીમો
સરકારી રેલવે પોલીસ (GRP)એ અજાણ્યા આરોપીઓ સામે FIR નોંધાવી છે. સમગ્ર મામલાની તપાસ માટે ત્રણ વિશેષ પોલીસ ટીમો બનાવવામાં આવી છે. આ ટીમો યુવતીની ઓળખ શોધવા, ટ્રેનના રૂટ પર આવેલા સ્ટેશનોના CCTV ફૂટેજ ચકાસવા અને આરોપીઓને ઝડપવા માટે કામગીરી કરી રહી છે.
