મુખ્યમંત્રીશ્રી ભુપેન્દ્ર પટેલે મુંબઇ નેશનલ સ્ટોક એક્ષ્ચેજ ખાતે સુરત મહાનગરપાલિકાના મ્યુનિસિપલ ગ્રીન બોન્ડનું બેલ રીંગિંગ કરીને મેયર દક્ષેશ માવાણીની ઉપસ્થિતિમાં લીસ્ટિંગ કરાવ્યું હતું.

આ પ્રસંગે મુખ્યમંત્રીએ જણાવ્યું કે, સુરત મહાનગરપાલિકાએ જારી કરેલા રૂ.૨૦૦ કરોડના ગ્રીન મ્યુનિસિપલ બોન્ડ થકી ગ્રીન અને સસ્ટેનેબલ ડેવલપમેન્ટ માટે લોકોને ભાગીદાર બનાવ્યા છે. સુરત મહાનગરપાલિકાના ગ્રીન બોન્ડનું ૮ ગણું સબસ્ક્રિપ્શન દર્શાવે છે કે રોકાણકારોએ ગ્રીન બોન્ડમાં રોકાણમાં અસાધારણ ઉત્સાહ બતાવ્યો છે. સુરત મહાનગરપાલિકાના દીર્ઘદ્રષ્ટિયુક્ત આયોજન સુરતનો વિકાસ વધુ તેજ બનશે.

વર્ષ ૨૦૭૦ સુધીમાં વડાપ્રધાનના નેટ ઝીરો કાર્બન ફૂટપ્રિન્ટના લક્ષ્યને હાંસલ કરવાની દિશામાં રાજ્ય સરકારે ગ્રીન ગ્રોથ અને ગ્રીન મોબિલિટી પર વિશેષ ભાર મૂક્યો હોવાનું જણાવી મુખ્યમંત્રીશ્રીએ કહ્યું કે, વડાપ્રધાનશ્રીના નેતૃત્વમાં ભારતે ઇકોલોજી અને ઈકોનોમી વચ્ચે ઉમદા સંતુલન જાળવ્યું છે.

ભારતના G20 અધ્યક્ષપદ હેઠળ ‘વન અર્થ, વન, ફેમિલી, વન ફ્યુચર’ ના સંદેશ સાથે સભ્ય દેશોએ પણ વડાપ્રધાનશ્રીના સસ્ટેનેબલ ડેવલપમેન્ટ અને ગ્રીન ગ્રોથને પ્રાધાન્ય આપ્યું છે.

મુખ્યમંત્રીએ ઉમેર્યું કે, વડાપ્રધાન નરેન્દ્રભાઈ મોદીએ ૨૦૪૭ સુધીમાં વિકસિત ભારતના નિર્માણનો સંકલ્પ કર્યો છે. આ સંકલ્પ પૂરો કરવા માટે ગુજરાતે ‘વિકસિત ગુજરાત @ ૨૦૪૭’ ના રોડમેપ સહિત અનેકવિધ વિકાસલક્ષી આયામો શરૂ કર્યા છે. વડાપ્રધાનશ્રી હંમેશા જનભાગીદારીના અગ્રાહી રહ્યા છે. ‘સરકારી પદ્ધતિને અસરકારી બનાવવી’ એવા ધ્યેય સાથે રાજ્ય અને કેન્દ્ર સરકારના જનહિતલક્ષી પ્રયાસો રહ્યા છે.

સુરત શહેર અને મહાનગરપાલિકા સ્વચ્છતા અને ગ્રીન મોબિલિટી ક્ષેત્રે દેશભરમાં આદર્શ બન્યા છે એમ જણાવી મુખ્યમંત્રીશ્રીએ સુરત મનપાના તંત્રવાહકોને અભિનંદન પાઠવ્યા હતા. આ સંદર્ભે તેમણે વધુમાં કહ્યું કે, દેશમાં સૌપ્રથમ વાર ઈન્ટરનેશનલ ગ્રીન સર્ટીફીકેશન સાથે મ્યુનિસિપલ ગ્રીન બોન્ડ પબ્લિક ઈસ્યુથી બહાર પાડવામાં આવ્યા છે, ત્યારે સુરત મનપાના ‘મ્યુનિસિપલ ગ્રીન બોન્ડ ઈસ્યુ’માં વૈશ્વિક રોકાણકારો થકી આંતરરાષ્ટ્રીય રૂચિ વધી છે. મનપાએ વિકાસના ઉત્તમ આયોજન સાથે જનભાગીદારીને જોડી છે.

ગ્રીન પીપલ્સ ફાયનાન્સિંગ એ ગ્રીન ગ્રોથનું ઉત્તમ ઉદાહરણ બનશે એમ જણાવતા આ પહેલ શહેર માટે ન માત્ર નાણાકીય રીતે ફાયદાકારક સાબિત થશે, પરંતુ પર્યાવરણીય સ્તર પર પણ સકારાત્મક અસર કરશે. સુરત મહાનગરપાલિકાની આ આ યોજના હવે અન્ય શહેરો માટે પણ પ્રેરણાદાયી બનશે એવો વિશ્વાસ તેમણે વ્યકત કર્યો હતો.

આ અવસરે મેયર દક્ષેશ માવાણીએ જણાવ્યું હતું કે, વડાપ્રધાનશ્રીના ૨૦૪૭ ન વિકાસ વિઝનને સાકાર કરવા સસ્ટેનેબલ એનર્જી પ્રેરક ઉદાહરણ બનશે. સુરતએ મીની ભારત છે, સૌએ સુરતના વિકાસના સાથ સહકાર આપ્યો છે. સુરત શહેરને અત્યાર સુધીમાં ૧૪ જેટલા વિવિધ એવોર્ડ મળ્યા છે.સુરતને ગ્રીન એનર્જી સાથે વિશ્વનું બેસ્ટ સિટી બનાવાશે.

સુરત મહાનગરપાલિકા દ્વારા રૂા. ૨૦૦ કરોડના લીસ્ટેડ, ટેક્ષેબલ, રીડીમેબલ, સીકયોર્ડ નોન કન્વર્ટીબલ મ્યુનિસિપલ બોડ ડીબેન્ચર સ્વરૂપે ઇસ્યુ બહાર પાડવામાં આવ્યા હતા.

આ ગ્રીન બોન્ડ તા.૬/૧૦/૨૦૨૫ ના રોજ ખુલ્યા હતા. અને તા.૯/૧૦/૨૦૨૫ ના રોજ બંધ થાય હતા. આ સમયગાળા દરમિયાન સુરત મહાનગરપાલિકાના ગ્રીન બોન્ડ ૨૦૦ કરોડની ડીમાન્ડ સામે ૮૦૦ કરોડ રૂપિયાનું ભરણું થયું છે. જેથી ડ્રો સીસ્ટમથી બોન્ડની ફાળવણી થશે. રીટેલ સેકટરમાં મહાપાલિકા દ્વારા કુલ બોન્ડના ૧૫ ટકા લેખે ૩૦ કરોડ રૂપિયાના ફાળવવા ઓફર મંગાવવામાં આવી હતી.

સુરત મહાનગરપાલિકા કમિશનર શાલિની અગ્રવાલે સૌને આવકારતાં જણાવ્યું હતું કે, દેશમાં સૌ પ્રથમ આંતરરાષ્ટ્રીય સર્ટિફાઇડ ગ્રીન બોન્ડ સુરત મહાનગરપલિકા લાવ્યું છે. ગ્રીન બોન્ડના માધ્યમથી એકત્ર થનારી રકમ પર્યાવરણનું જતન કરવા સાથે ગ્રીન એનર્જીને લગતા પ્રોજેકટના રિસોર્સ માટે ખર્ચ કરવામાં આવશે. આ ઉપરાંત સોલાર પાવર પ્રોજેકટસ, જળસંચયને લગતા પ્રકલ્પો અને ગ્રીન પરિવહનની દિશામાં સાકાર થનારા પ્રોજકટમાં ગ્રીન બોન્ડ મહત્વના બની રહેશે.

વડાપ્રધાન નરેન્દ્ર મોદીના ‘કન્યા કેળવણી’ના સંકલ્પને સાકાર કરવાની દિશામાં સુરતના એક યુવા ઉદ્યોગપતિએ અદ્ભુત પહેલ કરી છે. મૂળ બનાસકાંઠા જિલ્લાના નાણોટા ગામના અને હાલ સુરતમાં ટેક્સટાઇલ તેમજ બિલ્ડિંગ વ્યવસાય સાથે જોડાયેલા 33 વર્ષીય પીયૂષ દેસાઈએ જરૂરિયાતમંદ 21,000 દીકરીઓની સ્કૂલ ફી અને શિક્ષણ સામગ્રી પાછળ રૂપિયા 15 કરોડથી વધુ રકમ ખર્ચ કરવાનો સંકલ્પ લીધો છે.

હીરાબાનો ખમકાર કાર્યક્રમ હેઠળ સહાય
આ મહત્ત્વપૂર્ણ શૈક્ષણિક સહાય ‘હીરાબાનો ખમકાર’ યોજના હેઠળ આપવામાં આવી રહી છે. પીયૂષ દેસાઈએ આ આંકડાઓ પાછળનો હેતુ સમજાવતા કહ્યું કે, વડાપ્રધાન નરેન્દ્ર મોદીના 75 વર્ષ પૂર્ણ થતાં હોવાથી પ્રત્યેક દીકરી દીઠ રૂપિયા 7,500 અને 21મી સદી હોવાથી 21,000 દીકરીઓને આ સહાય આપવાનો સંકલ્પ કરાયો છે. આ યોજના હેઠળ સુરત શહેરની તમામ શાળાઓમાં અભ્યાસ કરતી, ખાસ કરીને જરૂરિયાતમંદ કે માતા-પિતા વિહોણી દીકરીઓની ફી ભરવામાં આવશે.

સરકારી શાળાની દીકરીઓ માટે પણ જોગવાઈ
ખાનગી શાળાઓની ફી ઉપરાંત, જે દીકરીઓ નગર પ્રાથમિક શિક્ષણ સમિતિ હેઠળની સરકારી શાળાઓમાં અભ્યાસ કરે છે, જ્યાં ફી ભરવાની હોતી નથી, ત્યાં પણ તેમને નિરાશ કરવામાં આવશે નહીં. પીયૂષ દેસાઈની ટીમ દ્વારા આવી દીકરીઓને જરૂરિયાત મુજબ સ્ટેશનરી અથવા અન્ય શૈક્ષણિક ચીજ-વસ્તુઓ માટે રૂપિયા 7,500ની આર્થિક મદદ કરવામાં આવશે.

કાર્યક્રમનો શુભારંભ અને લક્ષ્‍યાંક
આ યોજનાનો પ્રારંભ કેન્દ્રીય મંત્રી સી. આર. પાટીલના હસ્તે 251 દીકરીઓને સહાય આપીને કરવામાં આવ્યો હતો. ધનતેરસના શુભ દિવસે વધુ 151 દીકરીઓને સહાય આપવાનું આયોજન છે. પીયૂષ દેસાઈએ જણાવ્યું કે, વર્ષના અંત સુધીમાં 21,000 દીકરીઓને રૂપિયા 15 કરોડથી વધુની સહાય પૂરી પાડવામાં આવશે. તેમણે ભારપૂર્વક જણાવ્યું હતું કે, દીકરી બે કુળને તારે છે અને આવનારી પેઢીને શિક્ષિત તેમજ સંસ્કારી બનાવે છે, તેથી દીકરીનું શિક્ષણ એ સમાજ માટે સૌથી મહત્ત્વનું છે.

સહાય મેળવવાની પ્રક્રિયા
જરૂરિયાતમંદ વિદ્યાર્થિનીઓ પીયૂષ દેસાઈની ઓફિસ, 502, એમ્પાયર સ્ટેટ બિલ્ડિંગ, રિંગ રોડ, સુરત ખાતેથી એક ફોર્મ મેળવી શકે છે. ફોર્મ ભર્યા પછી તેમની ટીમ આવેદન કરનાર દીકરીની જરૂરિયાતની ખરાઈ કરશે અને ત્યારબાદ જરૂરિયાત મુજબ આર્થિક સહાય પૂરી પાડશે. આ રીતે સુરતનો આ યુવાન ઉદ્યોગપતિ હજારો દીકરીઓના ભવિષ્યને ઉજ્જવળ બનાવવાનું કાર્ય કરી રહ્યો છે.

પુષ્ટિમાર્ગીય વૈષ્ણવ વૃંદ દ્વારા સુરત ખાતે ગો.શ્રીઅનુરાગરાયજીના આત્મજ શ્રીષષ્ઠેશરાયજી શ્રીપુરૂષોત્તમરાયજીના પ્રાગટ્ય ઉત્સવ નિમિત્તે ભક્તિભાવ અને ઉમંગભેર ઢાઢી લીલા, રાસકર્તિન સંગે બધાઈ ઉત્સવની ઉજવણી કરવામાં આવી હતી. ભવ્ય ‘બધાઈ ઉત્સવ’માં વૈષ્ણવોએ ભક્તિગીતો અને સહજ નૃત્ય દ્વારા રાસોત્સવ ભવ્ય મનોરથનો આનંદ લીધો સાથે આપશ્રીના આશીર્વચન ગ્રહણ કર્યા હતા.