સુરત શહેરમાં નશો વિરુદ્ધ ચાલી રહેલી “NO DRUGS IN SURAT CITY” અભિયાન અંતર્ગત પોલીસને એક વધુ મોટી સફળતા મળી છે. શહેરના પોલીસ કમિશનરશ્રીના માર્ગદર્શન હેઠળ JCP ક્રાઈમ, DCP ક્રાઈમ અને સુરત ક્રાઈમ બ્રાંચે મળીને આંતરરાષ્ટ્રીય ડ્રગ્સ રેકેટનો ભાંડાફોડ કર્યો છે. મળેલી ચોક્કસ બાતમીના આધારે બેંગકોકથી એર ઈન્ડિયા એક્સપ્રેસ ફ્લાઈટ IX-263 દ્વારા સુરત આવનાર મુસાફર જાફરખાન ઉર્ફે જાફર મોબાઈલવાલાને સુરત એરપોર્ટ પરથી ઝડપી લેવામાં આવ્યો હતો.

બાતમી હકિકત મળી આવતાં જ ડુમસ પોલીસ, એર ઈન્ટેલિજન્સ યુનિટ અને CISF ની ટીમ સાથે સંયુક્ત ઓપરેશન હાથ ધરાયું. આરોપીની ચેક–ઈન લગેજની તપાસ કરતાં તેની ટ્રોલી બેગમાંથી પ્રતિબંધિત માદક પદાર્થ ‘હાઈડ્રો વીડ’ એટલે કે હાઈબ્રિડ ગાંજાના કુલ 4035.97 ગ્રામનો જથ્થો મળ્યો, જેની કિંમત રૂ. 1,41,25,895 જેટલી થાય છે. તાત્કાલિક અસરથી NDPS એક્ટ મુજબ ગુનો દાખલ કરી આરોપીને ધરપકડ કરવામાં આવ્યો હતો.

આગામી તપાસ માટે આરોપીને પોલીસ રીમાન્ડ પર લઈ પૂછપરછ કરવામાં આવી. આ દરમિયાન જાફરે ખુલાસો કર્યો કે ગેરકાયદેસર માદક પદાર્થનો વધુ જથ્થો તેણે બેગના પડમાં છુપાવ્યો છે. કોર્ટ દ્વારા મંજૂર કરાયેલા વધારાના રીમાન્ડ બાદ ક્રાઈમ બ્રાંચે તેની ટ્રોલી બેગનું ટેક્નિકલ સાધનોની મદદથી ઊંડાણપૂર્વક નિરીક્ષણ કર્યું. બેગના ઉપર–નીચેના પડમાંથી વધુ ચાર પેકેટ મળી આવ્યા, જેમાં કુલ 4 કિલો 852 ગ્રામ હાઈબ્રિડ ગાંજો હતો, જેની અંદાજીત કિંમત રૂ. 1,69,82,000 જેટલી થાય છે.

આ રીતે સમગ્ર ઓપરેશન દરમિયાન પોલીસે કુલ 8.88 કિલો (8887.97 ગ્રામ) હાઈબ્રિડ ગાંજો કબ્જે કર્યો છે, જેની આંતરરાષ્ટ્રીય બજાર કિંમત રૂ. 3,11,07,895 જેટલી છે.

પોલીસ અનુસાર આ જથ્થો ભારતના વિવિધ શહેરોમાં સપ્લાય કરવાનો હતો અને આરોપી ડ્રગ્સ રેકેટનો મહત્વપૂર્ણ ભાગ હોવાનું પણ પ્રાથમિક તપાસમાં સામે આવ્યું છે. હાલ મુખ્ય સપ્લાયર, નેટવર્ક અને આંતરરાષ્ટ્રીય કનેક્શન અંગે વધુ તપાસ ચાલુ છે. આ કાર્યવાહી દર્શાવે છે કે સુરત પોલીસ શહેરમાંથી નશાના નેટવર્કને નાબૂદ કરવા માટે સંપૂર્ણ રીતે પ્રતિબદ્ધ છે.

ભાજપ નેતા વરુણ પટેલે આપેલા નિવેદન બાદ હવે સુરતના પાટીદાર નેતા અલ્પેશ કથીરિયા પણ મેદાને ઉતર્યા છે. અનામત આંદોલનનો ચહેરો રહેલા અલ્પેશ કથીરિયાએ ચૂંટણીમાં 10 ટકા EWS ની માંગણી કરી છે. તેમજ ચૂંટણીમાં EWS થી દરેક વર્ગને પ્રતિનિધિત્વ મળી રહેશે એવો સૂર પણ આલાપ્યો છે.

પાટીદાર નેતા મેદાને ઉતર્યા
ભાજપના અગ્રણી પાટીદાર નેતા અને પાટીદાર અનામત આંદોલનના પૂર્વ નેતા વરુણ પટેલે ડાલમાં જ સોશિયલ મિડીયામાં કરેલી પોસ્ટથી ઉડાપોહ મચ્યો છે. તેમને પાટીદારોને આર્થિક રીતે નબળા વર્ગને અનામત આપવા મુદ્દે આકરું નિવેદન આપ્યું હતું. વરૂણ પટેલના આ નિવેદનને હવે પાટીદાર નેતા અલ્પેશ કથીરિયાએ સમર્થન આપતા રાજકારણમાં હલચલ મચી છે.

અલ્પેશ કથીરિયાએ જણાવ્યું કે, ડાલમાં વરુણભાઈએ દૂધસાગર ડેરીમાં 21 ટકાથી પણ વધુ મતદારો હોવા છતાં માત્ર બે ડિરેક્ટરનો સમાવેશ અને ભવિષ્યમાં 10 ટકા EWS લાગું નહીં થાય તો સમાજને નુકશાન થશે એ બે બાબત મૂકી છે.

આ નિવેદનને સંપૂર્ણ સમર્થન છે. સ્વાભાવિક રીતે 10 ટકા EWS હાલમાં શિક્ષણ અને રોજગારીમાં મળી રહ્યું છે ત્યારે ચૂંટણી પંચે EWS લાગુ એટલા માટે પાડવું જોઈએ કે જેનાથી 68 થી પણ વધુ જ્ઞાતિનો એક EWS નો વર્ગ છે, એને પોતાના અધિકારો પ્રાપ્ત થાય, લોકશાહીમાં સત્તાકીય ભાગીદારી નિભાવી શકે અને આ પર્વને રંગેચંગે ઉજવી શકે. વર્તમાનમાં જ્યારે સંપૂર્ણ જે અનામતની વ્યવસ્થા છે એ પ્રથમ વખત સ્થાનિક સ્વરાજ્યની ચૂંટણીમાં લાગુ પડે છે ત્યારે સાથો સાથ 10 ટકા EWSનો સમાવેશ થઈ જાય તો ભવિષ્યમાં કોઈ પણ પ્રકારના ટેકનિકલી પ્રશ્ન ન સર્જાય અને દરેક વર્ગને પોતાનું પ્રતિનિધિત્વ મળી શકે.

સુરતના ઉધના મગદલ્લા રોડ પર વહેલી સવારે થયેલું એક ભયાનક અકસ્માત શહેરમાં શોકની લાગણી ફેલાવી ગયો. માહિતી મુજબ, KTM બાઈક ચલાવી રહેલા 18 વર્ષીય યુવક પ્રિન્સ પટેલનું સ્ટેરીંગ ઉપરથી કાબુ છૂટી જવાથી ગંભીર અકસ્માત થયો હતો. યુનિવર્સિટીથી બ્રેડ લાઈનર બ્રિજ તરફ ઉતરતી વેળાએ બાઈક અચાનક નિયંત્રણમાંથી બહાર જતા તે સીધો અકસ્માતનો ભોગ બન્યો. ટક્કર એટલી પ્રચંડ હતી કે પ્રિન્સનું માથું અને ધડ અલગ થઈ ગયા હતાં, જેને કારણે ઘટનાસ્થળે જ તેનું દુખદ અવસાન થયું.

પ્રાથમિક તપાસમાં જાણવા મળ્યું છે કે પ્રિન્સે હેલ્મેટ પહેર્યું નહોતું, જેના કારણે ઈજાઓ વધુ ઘાતક બની. મૃતક પ્રિન્સ પટેલ યુટ્યુબ પર ‘PKR BLOGGER’ તરીકે જાણીતા હતાં અને બાઈક રાઈડિંગ તથા વ્લોગિંગ કરતા હતાં. બનાવની જાણ થતાં જ ખટોદરા પોલીસનો સ્ટાફ સ્થળ પર દોડી આવ્યો અને સમગ્ર ઘટના અંગે ગુનો દાખલ કરી તપાસ શરૂ કરી છે. આ દુર્ઘટનાએ ફરી એકવાર યુવાનોમાં સેફટી ગિયર્સના ઉપયોગ અંગે ગંભીર પ્રશ્નો ઉભા કર્યા છે.