ભરૂચ શહેરમાં એક મહિલા પોલીસ કોન્સ્ટેબલે આપઘાત કરી લેતા પોલીસ તંત્રમાં હાહાકાર મચી ગયો છે. ગઈ કાલે રાતના સમયે ભરૂચ હેડક્વાર્ટર ખાતે આવેલા પોતાના રહેણાંક રૂમમાં યુવતીએ ગળે ફાંસો ખાઈ આત્મહત્યા કરી છે.

આપઘાતનું કારણ હજુ અકબંધ
મૂળ ભાવનગરની 27 વર્ષીય પ્રીતિ ઉદેસિંહ પરમારના આપઘાતનું કારણ હજુ અકબંધ છે. ઘટનાની જાણ થતા જ પોલીસના ઉચ્ચ અધિકારીઓ તાત્કાલિક સ્થળ પર પહોંચ્યા હતા. બી ડિવિઝન પોલીસની મદદથી મૃતદેહને નીચે ઉતારવામાં આવ્યો હતો. ત્યાર બાદ મૃતદેહને પોસ્ટમોર્ટમ માટે ભરૂચ સિવિલ હોસ્પિટલમાં ખસેડવામાં આવ્યો હતો.

આ મામલે બી ડિવિઝન પોલીસે અકસ્માત મોતનો ગુનો નોંધી વધુ તપાસ હાથ ધરી છે. પોલીસ દ્વારા આપઘાત પાછળનું સાચું કારણ જાણવા માટે મૃતકના પરિવારજનો અને સહકર્મીઓની પૂછપરછ કરવામાં આવી રહી છે.

પહાડી વિસ્તારોમાં અવારનવાર અકસ્માતો થતા રહે છે. જમ્મુ-કાશ્મીરના ડોડા જિલ્લામાં સેનાના એક વાહન સાથે મોટી દુર્ઘટના ઘટી છે. આજે બપોરે જમ્મુ-કાશ્મીરના ડોડા જિલ્લામાં એક અત્યંત દુખદ અકસ્માત સર્જાયો છે. ભારતીય સેનાના જવાનોને લઈ જઈ રહેલા એક વાહને અચાનક કાબૂ ગુમાવતા તે ઊંડી ખીણમાં ખાબક્યું હતું. આ ગમખ્વાર અકસ્માતમાં સેનાના 10 જેટલા જવાન શહીદ થયા છે, જ્યારે અન્ય 7 જવાનો ઈજાગ્રસ્ત થયા છે.

સેનાના અધિકારીઓ પાસેથી મળતી માહિતી મુજબ આ અકસ્માત ડોડાના પહાડી વિસ્તારમાં સર્જાયો હતો. સેનાના 17 જવાનોને બેસાડીને એક ગાડી પહાડી વિસ્તારમાં આવેલી ચેક પોસ્ટ પર જઈ રહી હતી. ત્યારે ડ્રાઈવરે કંટ્રોલ ગુમાવતા ગાડી 200 ફૂટ ઊંડી ખાઈમાં ખાબકી હતી.

દુર્ઘટના બાદ તુરંત જ સ્થાનિક લોકો અને સેનાની અન્ય ટુકડીઓ દ્વારા બચાવ કામગીરી યુદ્ધના ધોરણે શરૂ કરવામાં આવી હતી. ઈજાગ્રસ્ત જવાનોને તાત્કાલિક નજીકની હોસ્પિટલમાં સારવાર અર્થે ખસેડવામાં આવ્યા છે. જોકે, ઈજાગ્રસ્ત જવાનમાં ત્રણની હાલત ગંભીર હોવાનું સૂત્રો જણાવી રહ્યા છે. આ ત્રણ જવાનોને એરલિફ્ટ કરવામાં આવ્યા છે.

જમ્મુ-કાશ્મીરમાં થયેલી આ દુર્ઘટનાના સમાચાર વાયુવેગે પ્રસરી ચૂક્યા છે. જેને લઈને સમગ્ર દેશમાં અને સેનાના છાવણીઓમાં શોકનું મોજું ફરી વળ્યું છે. પહાડી રસ્તાઓ પર બરફ અથવા લપસણી હોવાને કારણે કે અન્ય કોઈ ટેકનિકલ ખામીને લીધે વાહન ખાઈમાં પડ્યું છે કે કેમ, તે અંગે વધુ તપાસ હાથ ધરવામાં આવી રહી છે.

આર્મીના અધિકારીએ કહ્યું કે આ બનાવ ભદ્રવાહ-ચંબા ઈન્ટરસ્ટેટ ખાતેની ખન્ની ટોપ ખાતે બન્યો હતો. ખાઈમાં ખાબકેલી ગાડી બુલેટ પ્રુફ છે, જેમાં 17 જવાન સવાર હતા. ઊંચાઈ પરની પર્વતીય પોસ્ટ ખાતે વાહન જઈ રહ્યું હતું ત્યારે ડ્રાઈવરે કંટ્રોલ ગુમાવ્યો હતો, જેથી 200 ફૂટ ઊંડી ખાઈમાં ખાબક્યું હતું. આ બનાવની તપાસ હાથ ધરવાનો નિર્દેશ આપ્યો છે, જ્યારે મૃતકના પરિવારને પણ જાણ કરવામાં આવી હોવાનું અધિકારીએ જણાવ્યું હતું.

રાજ્યના રાજ્યપાલ મનોજ સિંહાએ ડોડા અકસ્માતમાં શહીદ જવાન પ્રત્યે શોક વ્યક્ત કર્યો છે. એક્સ પર પોસ્ટ મૂકીને લખ્યું છે કે સેનાના 10 બહાદુર જવાનની શહીદીથી બહુ દુખ થયું છે. દેશ તેમની શ્રેષ્ઠ સેવા અને સર્વોચ્ચ બલિદાન હંમેશા યાદ રાખશે. દરમિયાન ઘાયલ સૈનિકોને ઝડપથી એરલિફ્ટ કરીને હોસ્પિટલ પહોંચાડવાની સાથે શ્રેષ્ઠ મેડિકલ સર્વિસ પૂરી પાડવાનો પ્રયાસ કરવાનું પણ જણાવ્યું છે.

ઉત્તર પ્રદેશના વારાણસીમાં પોલીસે લોક ગાયિકા નેહા સિંહ રાઠોડને 2025 માં વડા પ્રધાન નરેન્દ્ર મોદી વિરુદ્ધ અપમાનજનક ટિપ્પણી કરવા બદલ નોંધાયેલા કેસના સંદર્ભમાં નોટિસ ફટકારી છે, પોલીસ અધિકારીઓએ ગુરુવારે પુષ્ટિ આપી. લંકા પોલીસ સ્ટેશનના ઇન્ચાર્જ ઇન્સ્પેક્ટર રાજકુમાર શર્માએ જણાવ્યું હતું કે નેહા સિંહ રાઠોડ વિરુદ્ધ 2025 માં કેસ નોંધવામાં આવ્યો હતો, જેમાં તેમના પર વડા પ્રધાન વિશે અપમાનજનક ટિપ્પણી કરવાનો આરોપ મૂકવામાં આવ્યો હતો. તેમણે કહ્યું કે આ કેસમાં ચાર્જશીટ દાખલ કરવાની પ્રક્રિયાના ભાગ રૂપે બુધવારે રાઠોડને કાનૂની નોટિસ મોકલવામાં આવી હતી.

પોલીસના જણાવ્યા મુજબ, આ નોટિસ કાનૂની પ્રક્રિયાનો સખત ભાગ છે અને તે કોઈ વધારાની કે અસાધારણ કાર્યવાહી નથી. અધિકારીઓએ સ્પષ્ટતા કરી કે કાયદા મુજબ આ કેસમાં આગળની કાર્યવાહી કરવામાં આવી રહી છે. આ ઘટનાક્રમ પર પ્રતિક્રિયા આપતા, નેહા સિંહ રાઠોડે સોશિયલ મીડિયા પ્લેટફોર્મ X પર પોતાની નારાજગી વ્યક્ત કરી. તેણીએ દાવો કર્યો હતો કે લખનૌના હઝરતગંજ પોલીસ સ્ટેશન તરફથી સમન્સ મળ્યા બાદ, વારાણસીના લંકા પોલીસ સ્ટેશનની પોલીસ પણ તેના ઘરે ગઈ હતી.

રાઠોડે પોતાની પોસ્ટમાં લખ્યું છે, “હું ઈચ્છું છું કે મને હેરાન કરવા માટે જે ખંત અને ઉતાવળ બતાવવામાં આવી રહી છે તે જ ખંત અને ઉતાવળનો ઉપયોગ પટનાની પુત્રી માટે ન્યાય સુનિશ્ચિત કરવા માટે કરવામાં આવે.” તેણીએ વધુમાં ઉમેર્યું, “આ રીતે દીકરીઓનું રક્ષણ કરવામાં આવી રહ્યું છે તે શરમજનક છે.” તેણીની ટિપ્પણી સોશિયલ મીડિયા પર ઝડપથી વાયરલ થઈ રહી છે. પોલીસ અધિકારીઓએ પુનરોચ્ચાર કર્યો કે નોટિસ 2025 માં નોંધાયેલા કેસ સાથે સંબંધિત છે અને કાયદાના દાયરામાં જારી કરવામાં આવી હતી. પોલીસ કહે છે કે આ કાર્યવાહીનો હેતુ ફક્ત કાનૂની પ્રક્રિયાને આગળ વધારવાનો છે.

નેહા સિંહ રાઠોડ બીજા પણ એક કેસમાં લખનૌ પોલીસ દ્વારા તપાસનો સામનો કરી રહી છે. આ કેસ 2025માં પહેલગામ આતંકવાદી હુમલા અંગે તેમણે કરેલી સોશિયલ મીડિયા પોસ્ટ સાથે સંબંધિત છે, જેમાં જમ્મુ અને કાશ્મીરમાં 26 પ્રવાસીઓ માર્યા ગયા હતા. પોલીસના જણાવ્યા અનુસાર, આ કેસમાં 27 એપ્રિલે FIR નોંધવામાં આવી હતી, ત્યારબાદ રાઠોડે તેને કોર્ટમાં પડકાર્યો હતો. કેસની સુનાવણી બાદ, સુપ્રીમ કોર્ટે 7 જાન્યુઆરીએ નેહા સિંહ રાઠોડને ધરપકડથી વચગાળાનું રક્ષણ આપ્યું હતું. હાલમાં, બંને કેસમાં કાનૂની કાર્યવાહી ચાલુ છે.

બેંગ્લુરુના કેમ્પેગૌડા ઈન્ટરનેશનલ એરપોર્ટ પર એક વિદેશી મહિલા સાથે છેડતીનો મામલો સામે આવ્યો છે. અહીં એર ઈન્ડિયા એસએટીએસના ગ્રાઉન્ડ સ્ટાફકર્મી મોહમ્મદ અફ્ફાનની કોરિયન મહિલાની છેડતી કરવાના આરોપમાં ધરપકડ કરવામાં આવી છે.આરોપીએ મહિલાને કથિત રીતે ફ્લાઈટ ચૂકી જવાનો ડર દેખાડ્યો અને સામાનમાં ગડબડના બહાને તેને એકાંતમાં લઈ ગયો અને તેની છેડતી કરી. એરપોર્ટ પોલીસે સીસીટીવી ફૂટેજના આધારે આરોપીની ધરપકડ કરી લીધી છે. બીજી તરફ કંપનીએ કાર્યવાહી કરતા તેને તાત્કાલિક અસરથી બરતરફ કર્યો છે.

કોરિયન મહિલાએ પોલીસને આપેલી ફરિયાદમાં જણાવ્યું છે કે, હું સોમવારે 19 જાન્યુઆરીના રોજ કોરિયા જતી ફ્લાઈટમાં સવાર થવા માટે એરપોર્ટ પર હતી. ઈમિગ્રેશન તપાસ પૂર્ણ કર્યા બાદ હું ટર્મિનલ તરફ જઈ રહી હતી. આ દરમિયાન મોહમ્મદ અફ્ફાન નામના એક પુરુષ કર્મચારીએ મારી સાથે સંપર્ક કર્યો અને મને ફ્લાઈટ ટિકિટ બતાવવા માટે કહ્યું. પછી તેણે દાવો કર્યો કે મારા ચેક-ઈન સામાનમાં કોઈ સમસ્યા છે અને તેમાંથી બીપનો અવાજ આવી રહ્યો છે.

અફ્ફાને કથિત રીતે મહિલાને કહ્યું કે, નિયમિત સ્ક્રીનિંગ કાઉન્ટર પર પાછા જવામાં સમય લાગશે અને તમે ફ્લાઈટ ચૂકી જશો. તેણે ભાર મૂકીને કહ્યું કે, તેની અલગથી તપાસ થવી જોઈએ અને તે મહિલાને પુરુષોના વોશરૂમ પાસે લઈ ગયો. મહિલાએ વાંધો ઉઠાવ્યો છતાં અફ્ફાને તેને અયોગ્ય રીતે સ્પર્શ કર્યો હતો. જ્યારે મહિલાએ વિરોધ કર્યો ત્યારે તેણે કથિત રીતે તેને ગળે લગાવી અને ચાલ્યો ગયો.

આ ઘટના બાદ તરત જ મહિલાએ તેની જાણ એરપોર્ટ સુરક્ષાકર્મીઓને કરી. ત્યારબાદ પોલીસે આરોપીને કસ્ટડીમાં લઈ તપાસ શરૂ કરી. પોલીસે સીસીટીવી ફૂટેજની તપાસ દરમિયાન અફ્ફાનની આ ઘૃણાસ્પદ હરકત જોઈ. કોરિયન મહિલાની ફરિયાદના આધારે વધુ તપાસ ચાલી રહી છે.

કેન્દ્રીય ગૃહમંત્રી અમિત શાહે હરિદ્વારના પતંજલિ યોગપીઠ ખાતે ‘પતંજલિ ઇમરજન્સી અને ક્રિટિકલ કેર હોસ્પિટલ’નું ઉદ્ઘાટન કર્યું. આ હોસ્પિટલ યોગ, આયુર્વેદ, પ્રાકૃતિક ચિકિત્સા અને આધુનિક તબીબી પદ્ધતિઓને એકીકૃત કરીને લોકોને વિશ્વસ્તરીય આરોગ્યસંભાળ સેવાઓ પૂરી પાડશે. ઉદ્ઘાટન સમારોહમાં યોગ ગુરુ સ્વામી રામદેવ, આચાર્ય બાલકૃષ્ણ, ઉત્તરાખંડના મુખ્યમંત્રી પુષ્કર સિંહ ધામી, સાંસદ ત્રિવેન્દ્ર સિંહ રાવત, શિક્ષણ મંત્રી ધન સિંહ રાવત સહિત અનેક અગ્રણી લોકો હાજર રહ્યા હતા. આ પ્રસંગે ગૃહમંત્રી અમિત શાહે પણ હોસ્પિટલનું નિરીક્ષણ કર્યું. તેમણે ઇન્ટિગ્રેટેડ મેડિસિન સિસ્ટમની આ પહેલની ખૂબ પ્રશંસા કરી.

પતંજલિ ઇમરજન્સી અને ક્રિટિકલ કેર હોસ્પિટલ હૃદય, મગજ અને કરોડરજ્જુની સર્જરી માટે સર્જરી સુવિધાઓ પ્રદાન કરે છે. તે નાગરિકોને કટોકટી અને ગંભીર બીમારીઓ માટે ઉચ્ચ ગુણવત્તાની તબીબી સંભાળ પૂરી પાડશે. ગૃહમંત્રી અમિત શાહે બુધવારે રાત્રે પતંજલિ યોગપીઠ કેમ્પસમાં રાત્રિ રોકાણ કર્યું. તેમણે યોગ ગુરુ સ્વામી રામદેવ અને આચાર્ય બાલકૃષ્ણ મહારાજ સાથે દવા, શિક્ષણ, સનાતન જીવનશૈલી અને ઋષિઓના જ્ઞાન વારસાની વૈશ્વિક માન્યતા જેવા વિષયો પર વ્યાપક ચર્ચા કરી.

ચર્ચા દરમિયાન, શાહે ભવિષ્યમાં પતંજલિ આ દિશામાં શું અગ્રણી ભૂમિકા ભજવશે તે અંગે પણ પૂછપરછ કરી. ગૃહમંત્રીના આગમનથી પતંજલિ પરિવારમાં ગૌરવ, પ્રેરણા અને નવી ઉર્જાનો સંચાર થયો હોવાનું કહેવાય છે. પતંજલિ યોગપીઠ પરિવાર વતી, યોગ ગુરુ સ્વામી રામદેવ અને આચાર્ય બાલકૃષ્ણ, પતંજલિ ગુરુકુલમ અને આચાર્યકુલમના ઘણા સંતો, ભક્તો, શિષ્યો, વિદ્યાર્થીઓએ ગૃહમંત્રીનું ઉષ્માભર્યું સ્વાગત કર્યું અને અભિનંદન પાઠવ્યા. આ કાર્યક્રમને ભારતીય પરંપરા અને આધુનિકતાના મિશ્રણને આરોગ્ય સેવાઓ સાથે મજબૂત બનાવવા તરફ એક પ્રશંસનીય પ્રયાસ માનવામાં આવી રહ્યો છે.

જમ્મુ અને કાશ્મીરના ડોડામાં એક ભયાનક ઘટના બની છે. આર્મી કેસ્પર વાહન ઉંડી ખીણમાં પડી ગયું, જેમાં 4 સૈનિકોના મોત થયા અને 12 અન્ય ઘાયલ થયા. કેસ્પર વાહન ડોડામાં ભદરવાહ-ચંબા રોડ પર મુસાફરી કરી રહ્યું હતું, જે પહેલાથી જ ખૂબ જ ખરાબ સ્થિતિમાં છે. કેસ્પર વાહન લગભગ 200 ફૂટ ઊંડી ખીણમાં પડી ગયું. સૈનિકોને બચાવવા માટે બચાવ કામગીરી ચાલી રહી છે, અને બચાવ ટીમો ઝડપી ગતિએ કામ કરી રહી છે.

એક અધિકારીએ જણાવ્યું કે અજ્ઞાત કારણોસર વાહન રસ્તા પરથી લપસી ગયું. ઘટના બાદ તાત્કાલિક બચાવ અને રાહત ટીમો ઘટનાસ્થળે રવાના કરવામાં આવી હતી. ઘાયલ સૈનિકોને અકસ્માત સ્થળેથી બહાર કાઢવામાં આવ્યા હતા અને નજીકના તબીબી કેન્દ્રમાં લઈ જવામાં આવ્યા હતા, જ્યાં ત્રણ સૈનિકોની હાલત ગંભીર હોવાનું જાણવા મળ્યું છે.

મધ્ય પ્રદેશના ધાર શહેરમાં ઐતિહાસિક ભોજશાળા આવેલી છે. જ્યાં મુસ્લિમ સમુદાય દ્વારા દર શુક્રવારે જુમ્માની નમાઝ પઢવામાં આવે છે. આ સિવાય વસંત પંચમી જેવા દિવસ નિમિત્તે હિંદુઓ પણ અહીં ભેગા થઈને સરસ્વતી પૂજા કરતા હોય છે. પરંતુ આ વર્ષે વસંત પંચમી શુક્રવારના દિવસે આવી રહી છે. જેને લઈને મામલો ગૂંચવાયો હતો. હિંદુ પક્ષે સુપ્રીમ કોર્ટમાં અરજી કરીને ભોજશાળામાં ફક્ત હિંદુઓને સરસ્વતી પૂજા કરવાની મંજૂરી આપવાની અને મુસ્લિમ સમુદાયને નમાઝ પઢતા રોકવાની માંગ કરી હતી. આ અરજીને લઈને આજે સુપ્રીમ કોર્ટે સુનાવણી કરી હતી.

ધાર શહેરમાં આવેલી ઐતિહાસિક ભોજશાળા સરસ્વતી પૂજા અને નમાઝ પઢવાની બાબતે અવારનવાર વિવાદમાં આવતી રહી છે. જેથી વિવાદ ન સર્જાય તે માટે હિંદુ પક્ષે સુપ્રીમ કોર્ટમાં એક અરજી કરી હતી. જેને લઈને આજે સુપ્રીમ કોર્ટના CJI સૂર્યકાંત, જસ્ટિસ જૉયમાલ્યા બાગચી અને જસ્ટિસ વિપુલ પંચોલીની ખંડપીઠે સુનાવણી કરી હતી.

સરસ્વતી પૂજા માટે શુક્રવારે મુસ્લિમ સમુદાયને નમાઝ પઢતા રોકવાની માંગને લઈને સુનાવણી દરમિયાન મુસ્લિમ પક્ષના વકીલ સલમાન ખુર્શીદે જણાવ્યું હતું કે, બપોરે 1થી 3 વાગ્યાની વચ્ચે નમાઝ પઢવામાં આવશે, ત્યારબાદ ભોજશાળાનું પરિસર ખાલી કરી દેવામાં આવશે. જોકે, હિંદુ પક્ષે સૂચન કરતા જણાવ્યું હતું કે, સાંજે 5 વાગ્યા બાદ નમાઝ પઢવામાં આવે. જેથી એકધારી પૂજ ચાલી શકે. હિંદુ પક્ષના આ સૂચનને લઈને મુસ્લિમ પક્ષના વકીલ સલમાન ખુર્શીદે જણાવ્યું હતું કે, અન્ય નમાઝોનો સમય બદલી શકાય તેમ છે, પરંતુ જુમ્માની નમાઝનો સમય બદલી શકાય તેમ નથી.

અમે 3 વાગ્યા સુધી જગ્યા ખાલી કરી દઈશુ
વકીલ સલમાન ખુર્શીદે ઉમેર્યુ હતુ કે, અગાઉ ત્રણ વખત વસંત પંચમી શુક્રવારના દિવસે આવી ચૂકી છે. ત્યારે ભારતીય પુરાતત્વ સર્વેક્ષણે હિંદુ પક્ષને ત્રણ કલાક પૂજા કરવાની મંજૂરી આપી છે. આનું પુનરાવર્તન કરવામાં આવે. જુમ્માની નમાઝ બપોરે એકથી ત્રણ વાગ્યાની વચ્ચે થાય છે. અમે 3 વાગ્યા સુધી જગ્યા ખાલી કરી દઈશુ. અમે મીનીમમ સમયની માંગણી કરી રહ્યા છીએ અને રાજીખુશીથી સહકાર આપવા માટે તૈયાર છીએ. પૂજા બહાર પણ ચાલુ રહી શકે છે.”

બંને પક્ષોની દલીલો સાંભળ્યા બાદ સુપ્રીમ કોર્ટે બંને પક્ષો અનુસરી શકે તેવો આદેશ આપ્યો છે. સુપ્રીમ કોર્ટે વસંત પંચમીના દિવસે હિંદુ પક્ષને ભોજશાળામાં 12 વાગ્યા સુધી પૂજા કરવા કહ્યું છે. ત્યારબાદ મુસ્લિમ પક્ષ નમાઝ પઢશે. નમાઝ પૂરી થયા બાદ 4 વાગ્યાથી હિંદુ પક્ષ ફરીથી પૂજા શરૂ કરી શકશે. ભારતીય પુરાતત્વ સર્વેક્ષણે ખાતરી આપી છે કે, સુપ્રીમ કોર્ટના આ આદેશના પાલન સાથે કાયદો અને વ્યવસ્થા જળવાઈ રહે તે માટે પૂરતી વ્યવસ્થા કરવામાં આવશે.