શું બોલિવૂડની ઝાકઝમાળ અને ગ્લેમર પાછળ કાળા નાણાંનો કોઈ મોટો ગોટાળો છુપાયેલો છે? આજે મુંબઈ આવકવેરા (ઈન્કમ ટેક્સ) વિભાગે ફિલ્મ ઈન્ડસ્ટ્રીના જાણીતા પ્રોડક્શન હાઉસીસ અને દિગ્ગજ હસ્તીઓ પર અચાનક સપાટો બોલાવીને ભારે ખળભળાટ મચાવી દીધો છે. ટેક્સ ચોરી અને શંકાસ્પદ વિદેશી લેવડ-દેવડના ગંભીર આક્ષેપો સાથે IT વિભાગે જાણીતી અભિનેત્રી રકુલ પ્રીત સિંહ, પીઢ નિર્માતા વાસુ ભગનાની અને ‘પેનોરમા સ્ટુડિયોઝ’ સહિતના ૧૨ જેટલા સ્થળો પર મેગા સર્ચ ઓપરેશન શરૂ કર્યું છે. આ આક્રમક કાર્યવાહીએ સમગ્ર માયાનગરીમાં ડરનો માહોલ ઉભો કરી દીધો છે, અને સૌને એ વિચારતા કરી દીધા છે કે શું રૂપેરી પડદા પાછળ કોઈ કાળો કારોબાર ચાલી રહ્યો છે?
બોલિવૂડ ઈન્ડસ્ટ્રીમાં ફફડાટ
આવકવેરા વિભાગની આ મોટી કાર્યવાહીથી ફિલ્મ જગતના ઘણા મોટા માથાઓ ઊંઘતા ઝડપાયા છે. પ્રાપ્ત માહિતી અને અહેવાલો અનુસાર, રકુલ પ્રીત સિંહ (જે વાસુ ભગનાનીના પુત્ર અને અભિનેતા જેકી ભગનાનીની પત્ની છે) અને વાસુ ભગનાનીના મુંબઈ સ્થિત વિવિધ દફ્તરો તેમજ રહેઠાણો પર તપાસ એજન્સી દ્વારા સઘન તપાસ ચાલી રહી છે. આ દરોડાઓનો મુખ્ય ઉદ્દેશ્ય બોલિવૂડની ફિલ્મોના નામે વિદેશમાં ગેરકાયદેસર રીતે પૈસા મોકલવાના સંભવિત નેટવર્કનો પર્દાફાશ કરવાનો છે.
કેવી રીતે મળ્યા હતા IT વિભાગને ગુપ્ત ઈનપુટ્સ?
સૂત્રોના જણાવ્યા અનુસાર, ઈન્કમ ટેક્સ વિભાગને છેલ્લા લાંબા સમયથી એવી સચોટ માહિતી મળી રહી હતી કે, ફિલ્મોના શૂટિંગ, ઓવરસીઝ ડિસ્ટ્રિબ્યુશન રાઇટ્સ અને પ્રોડક્શન ફાઇનાન્સિંગના બહાને કરોડો રૂપિયાની જંગી રકમ વિદેશમાં મોકલવામાં આવી રહી છે. તપાસ અધિકારીઓને પ્રબળ આશંકા છે કે આ સમગ્ર પ્રક્રિયામાં વ્યાપક સ્તરે ટેક્સની હેરાફેરી અને નાણાકીય અનિયમિતતાઓ આચરવામાં આવી છે.
૧૨ સ્થળો પર સઘન સર્ચ ઓપરેશન
હાલમાં મુંબઈ IT વિભાગની ડઝનબંધ ટીમો આ શંકાસ્પદ ફંડિંગના મૂળ સુધી પહોંચવા સક્રિય છે. તપાસકર્તાઓ હાલમાં કથિત વિદેશી લેવડ-દેવડના દસ્તાવેજો, ડિજિટલ રેકોર્ડ્સ, હાર્ડ ડ્રાઈવ્સ અને બેંકિંગ વિગતોની ઝીણવટભરી ચકાસણી કરી રહ્યા છે.
બોલિવૂડમાં ફિલ્મોના બજેટ અને બોક્સ ઓફિસ કલેક્શન વચ્ચેના તફાવતો હંમેશાં વિવાદનો વિષય રહ્યા છે. કાગળ પર જે અધધ ખર્ચ દર્શાવવામાં આવે છે, વાસ્તવમાં તે નાણાંનો અન્યત્ર ઉપયોગ અથવા હવાલા મારફતે વિદેશ મોકલાતા હોવાની વાતો અગાઉ પણ ઉઠતી રહી છે. વાશુ ભગનાની જેવા મહારથી નિર્માતા અને ‘પેનોરમા સ્ટુડિયોઝ’ જેવી મોટી કંપનીઓ જ્યારે તપાસના ઘેરાવામાં આવે છે, ત્યારે તેની સીધી અસર સમગ્ર બોલિવૂડની પારદર્શિતા પર પડે છે. જો આ દસ્તાવેજોમાં કોઈ મોટો ગોટાળો સાબિત થશે, તો આગામી દિવસોમાં એન્ફોર્સમેન્ટ ડિરેક્ટોરેટ (ED) પણ આ કેસમાં મની લોન્ડરિંગના એન્ગલથી જોડાઈ શકે છે. અત્યારે સમગ્ર ઈન્ડસ્ટ્રીના શ્વાસ અદ્ધર છે!
